Read Huli Mini Bayale Gigabi 30 Bible Online

Mini Bayale Gigabi 30 - Huli bible

Mini Bayale Gigabi 30

¹Bi ogo Yage igini Agu ibugua Idiele Ugalalahondo lene.

²Agu ibugua lalu, I̱ agali heneneore hagadagua ndo ko. I̱na agali marume mitangi biagadagua nabiruli. I̱ mini nawi dege ko.

³I̱na mini gigabi wulenebi manda bayalebi nawi dege ko. Ngode Datagaliwabe ibu bayale tigabiore kago helowa i̱na ibu baya hangu manda nabi kogoni.

⁴Mbirali dahuliya andagaha iraga halu pialu dai bini ai kabe. Mbirali ibunaga gime puyabu pu larago mini yania hene ai kabe. Agalime mbirale agame kabu buwa yu hagadagua iba hari beralibaha minu yu kago aiwabe. Dindi bibahende ngaru aiwa mo hongo kagola ngabe. Ogoni biyagoni ibu minibi ibu waneigini minibi ai kabe. Í̱na manda bu keyagua ogo ka lalu langibe.

⁵Ngode Datagaliwabe ibugua bulebero ledaru bibahende biaiore haga ka. Ibugua bi heneneore hangu laga ka. Ami agalirume wai bialu howa humbime tini mo ge hagadagua wali agali Ngode Datagaliwabe ibu karia poraru bibahende ho ge haga ka.

⁶Í̱ninaga bi latagi halu howa bi ogoni Ngode Datagaliwabenaga bi laro lalu nalabe. Anduane Homogohanda í̱ talialu mani wali agalime í̱naga bi lariru hale heneru í̱ tindule laridane walia holebira.

⁷Ngode Datagaliwabe-o i̱na í̱hondo ngibe lalu bi kiraore hale harogo ogoni labo ngibelo hame lo ko. Ngode Datagaliwabe-o i̱ dindini kongi howa

⁸ke̱ hagane mana ngaru erembira mialu holiya i̱ biamogo bibe. Ani bialu i̱ yagibano homogobi mendego nahelabe. Horo bibahendengi tomo karulape nalu holiya ngibe.

⁹I̱na mbirale dewa wu howa Ngode Datagaliwabe í̱ erembira ngialu i̱ni karulape ko manda buligo karulape dege ngibe. Ai yagibano howa nde i̱na mbirale ngaru page bima ibaga bialu koria Anduane Homogo í̱naga mini mo dindiha holigo o larogonidagua bibe.

¹⁰Í̱na agali haguane bedaria puwa ibunaga biabe bia haga kago mege bialu lo gura nabibe. Biabe biahaga biago ibugua Ngode Datagaliwabe mini lalu í̱ mo ko habe lalu bi lamiragola í̱ mo ko holigo lo gura nabibe.

¹¹Wali agali marume tinaga aba mo ko helonaga Ngode Datagaliwabe mini lalu lamiagaya. Marumebi ibuhondo, I̱ ai̱ya dara howa biamogo bia, nalagaya.

¹²Wali agali marume tiha ko mbira nawi kama mitangi biagaya. Anigo uruni biaga karu tinaga ko wiaabo kagola ti Ngode Datagaliwabenaga deni ko dodoheore ka.

¹³Wali agali marume mine howa tini bayaleore kama mitangi bialu maru ko nagalone karuni lo manda biaga ka.

¹⁴Wali agali marume yagibano karu hengedape hagaya. Tinaga ne harigaha wai biaga ayu tibu nene gadele alebi nabi emene nene gadele alebi howa wali agali ko yagibano karunaga dindi dabudabu emene wiago karulai hole biagaya.

¹⁵Gindi darama naga mbira ibu wane kira bereneya. Libu harunaga mini mbiraore laga bereneya. Libunaga mini I̱ Ngi laga bereneya. Mbirale maria urume haru naru nalaga ngago uru

¹⁶Mbira: Homenerunaga dindi Humbirini anda Mende: Wali waneigini nahaga bedago Tebone: Dindi yobime iba hame laabo haganego Mane: Irame mbirale dewaore daragoyu uruni mo emene dege halu ibuha dolene wia dege biaga.

¹⁷Wali agali tinaga aba ai̱yalanaga bi mo wahalu mege biadai biaga heagua ogoni ega nene bedarume tinaga de halu nalu tini homarangi ega bodo hariawe bedarume tinaga tingini budalu nolene wulebira.

¹⁸Mbirale mariaore bigi biagayago ogoninaga tenego agime bira loabe tobahe gimbuni handabe nahe ogoniha wia.

¹⁹Mbira: Ega bodo hariaweme li hariha yagalo yu ibagabu heago Mende: Nogombime ege to̱le̱ timbuni ngarunaga pu a̱i̱ halu pialu ngaligo Tebone: Iba sibi iba solowarani paga howa polene hariga manda bialu pialu kaligo Mane: Wali agali kiralime libuni gubalini haga haga bialu kaligo uruni bigi bialu hearuni agime bira loabe tobaheya.

²⁰Wali mbira ibu agalini ma hondowa ibu agali kayu biaga bedagome agua biaga. Ibugua agali kayu yuwa tomoru hibilabalo dawa nowa ibunaga ne wayawaya biagadagua bialu birulebira. Ani bu biruwa ibugua lalu, I̱ kagua mbira nabiore bedogo agiyabe, lolebira.

²¹Mana maria dindini tagira ibagaru ogoni ko gibioredagola dindi ibunime ogoni turu nahe howa mogo lowa duru lalu wiaga.

²²Mana uruni ogodagua Mbira: Mbirali ibu garabaya biabe ale bialu henego mani ibu kini ha aribia harago Mende: Mbirali mini nawi kago ibugua tomo dewa no kangi biagago

²³Tebone: Wali mbira ala agalime hondo wahene lu berenego mani ibu agalinimebi ibu hame nalaragola bame biraabo hagago Mane: Wandari mbira biabe bia haga berenego ibu mani wali anduane biago birayagoria bira aribia harago uruni bibahende dindini biaganego nakarulapeore.

²⁴Dindi ogoria ema bialu piaga maria bedago ti emene koore biruwa mini gigabiore beda.

²⁵Mbira: Uburuli ti emene koore bedagoyu tigua tomo nawi harangi nolenaga tomo andaha mo yu pu wiaga beda.

²⁶Mende: Tia pagana ale ege bare ngagoha anda buwa biraga bedaru ti emene ko hangu hongo nahe bedane hendede tiraga ege to̱le̱ ngaruha ti anda pu paliaga.

²⁷Tebone: Pagaya ale bedaru tinaga haru haga nahe bedane hendede tiraga tigua baya hangu biru dugu bialu porane hondolebere.

²⁸Mane: Gau emene ko bedaru gime bame minu yaramaligoyu ti kini andaga timbuni karuha pu bedane hondolebere.

²⁹Mbirale mariame ge porago de hondoabi piaga uru

³⁰Mbira: Laiono karu ti hongo gibiore howa maru karu bolanguahe ka. Ti ibaga bialu howa ti mbirale mbira kagohondo gi nahe howa puabo haga ka.

³¹Mende: Ega gogologo budubai bedaru ti tigatiga howa de handade̱le̱ bigi bialu haga ka. Tebone: Nogo meme wangabe karu Mane: Kini agaliru ti ami hongohe heba kangi mendeme ti bope naholobada manda bu haga.

³²Í̱na mana ko lulu ale mine howa í̱ninaga mini yaraga halu hariyaguabi í̱na mana ko mbira bule lowa manda manda bu hariyaguabi uruninaga í̱naga ne hariga hangai halu uruni abale wahai habe.

³³Nogo bulumaga andu iba hambuwa mo beregeda beregeda biaabo halu hariyagua ogoni ibu mo mbada holebira. Agali mbiralinaga nguini bariyagua darama ibulebira. Manane urunidagua dege mbirali baba keba hariyagua baga baga bulene wulebira.