Read Huli Mini Bayale Gigabi 4 Bible Online

Mini Bayale Gigabi 4 - Huli bible

Mini Bayale Gigabi 4

¹I̱ waneigini-o tí abahanda bi larago baya hangu hale halimu. Ani birimiyagua tí mini bayalewi holeberemi.

²Bi i̱na tí langigi beroru bayaleorego tígua mo wa nahalimu.

³I̱ ai̱yahanda waneigini mende nahonowi i̱ hangu hono winigome

⁴igiri emeneni hewagola i̱ abahanda i̱ lawai halu bi ogodagua langini. I̱na bi laga berogo í̱naga bu habaneha mo yai howa bialu hariyagua í̱ bayale holebere.

⁵Í̱ mini bayale gigabiwi holenebi manda bulenebi mo yu habe. I̱na bi larogo hale howa nahe tingi nahe bayuwa mitangi bialu embeda nahabe.

⁶Mini bayale gigabi wulene yu wa nahe hame laabo hariyagua ogonime í̱ bayale haru holebira.

⁷Í̱na mo yu holene duniniore mbira mini bayale gigabiwi holene ogoni nga. Í̱na mbirale ngaru dewa heneneore mo yu habehego duniniore mini gigabiwi holene ngago ogoni mo yu habe.

⁸Mini bayale gigabi wulene ogoni í̱na hameore lalu hongo howa yu ndibulo hariyagua ogonime í̱naga mini yaraga halu mo timbu holebira.

⁹Ani bialu ogoni ibu í̱naga emboneni yári taraore bini mbau lalu kininaga manda ale holebira, lalu i̱ abahanda i̱hondo bi ani lene.

¹⁰I̱ igini-o i̱na bi larogo baya hangu hale hariyagua dindi ogoria lu haabo holebere.

¹¹Í̱ mini bayale gigabiwi habelobi hariga tigabini pobelobi i̱na lawai halu mo tiga birugoni.

¹²Í̱na hariga tigabi ogoriani pialu hariyagua mbirale mbirame hapai habe nahe howa í̱ gerai lalu piriyaguabi pilo ibira nahabehe holebere.

¹³I̱na bi bayale ogoni lawai harugo yu ndibulo habe. Mana uruni í̱naga holene ibuniorego manda buwa bayuwa de hondo habe.

¹⁴Agali ko biaga karu hariga poradagua í̱ nape tigua biradaguabi nabibe.

¹⁵Í̱na hariga ogoriani nape wandialu habagi halu pobe.

¹⁶Agali ko biaga karume ko mbira nabiyagua ti palia nabi yanga yanga bu haabo haga. Tigua agali maruhondo ko bialuore palue lowa haga ka.

¹⁷Mana ko bulenebi wali agali maru bo waholenebi ogoni tinaga hina ibala ale bu hinaga.

¹⁸Agali mini tigabiwi karunaga hariga ni egerebagi howa dalu horombeni hongohe daraligobi nga.

¹⁹Agali ko biaga karunaga hariga arumahe wiagagobi nga. Ti pilo ibira ho wialu tinaga ge bidi larago ogo aleme bidi laralo manda nabi piaga.

²⁰I̱ igini-o í̱naga hale dugua ho howa bi laga beroru baya hangu hale haga bibe.

²¹I̱na bi laga birugo embeda holigo bayuwa manda bu howa í̱naga bu habaneha mo peho habe.

²²Anigo í̱na i̱naga bi laga beroru baya hangu manda buwa bialu hariyagua bi urunime í̱hondo holene ngialu hongo habelo mo hongo holebira.

²³Í̱na horo bibahendengi í̱naga bu miniha mitangi bulene bayuwa mamage haabo habe. Ani bialu hariyagua iba uliha howa bayale tagira ibagadagua í̱naga miniha howa mitangi bayale tagira ibulebira.

²⁴Bi larego lalu howa tindule lalu mbira lolene nawi. Í̱naga ne harigaha howa ke̱ halu bi ko maru heba lolene nakarulape.

²⁵Í̱na hariga pole manda birigoria tigatiga hondo yalu puabo habe. Handa a̱i̱ na̱i̱ nabi hendedegoria hondo yalu puabo habe.

²⁶Mbirale mbira bule howa ala miniha bayuwa manda manda bibe. Anidagua manda biriyagua mani í̱na mbirale berego bayale holebira.

²⁷Ko ngagoria hondo wandialu hariga tigatiga hendedegoria hondo yalu puabo habe. Hariga gi tigaha pedagoria pialu gi leha pedagoria ge ha amu nahe tigatiga puabo habe.