Read Huli Mini Bayale Gigabi 5 Bible Online

Mini Bayale Gigabi 5 - Huli bible

Mini Bayale Gigabi 5

¹I̱ igini-o i̱na bi larogo bayuwa hale habe. I̱na mini bayale gigabi wulenebi manda bulenebi í̱hondo ngule hame ledo.

²Ogonigo í̱na mana tigabi bialu howa í̱naga bi larego bibahende agali manda bayalewime laradagua bulebere.

³Wali mana ko biaga bedago ibugua í̱ haru pole lowa dimagoli bi dewa laabo haragome í̱naga bu bamulebirago de hondo habe.

⁴Í̱na ibunaga bi layago hale halu biriyagua mani handalu keria mbirale kaubi wiagagobibi ayu tibu alemebi í̱ nogoba haragola tandaga biraligobi bulebira.

⁵Wali ogonibigome í̱ haru halu homene dinini pu hagaha haru tagira polebira.

⁶Ibu haabo holenenaga hariga tigabi pedagoria napiaga beda. Ibu hariga ko pedagoha pialu haruda manda nabi howa pupebe dege biaga beda.

⁷I̱ igini-o ai i̱na bi larogo bayuwa hale halu embeda nahabe.

⁸Wali ogonibi bedagoria habagi howa kaundia habe. Ibu anda haneni ge bolanguabi heba nahabe.

⁹Í̱ mini bayale wirigo yu waholenego dege de hondo habe. Wali biagonaga anda haneni bolangua hariyagua agali ko karume í̱hondo dara naholebiraore ndobe. Í̱ igiri daliahe keore bo waholebira.

¹⁰Í̱naga mbirale biabe erekuibi bialu bayale mo wereru agali marume mo yalu pialu tinaga holebira.

¹¹Waragome í̱ minaragola kuni hangu wulebere. Ani bialu homole wuwa dagiani paluwa dugu taraore bialu wulebere.

¹²Ani wuwa í̱na ogodagua lolebere. I̱ luluyu kogo i̱na mine halu agali marume i̱ mo tiga nabilarugoni irane aginagabe.

¹³I̱naga lawai hagame bi layago hale nahe tingi halu donge harugoni.

¹⁴Áyu i̱ wali agali bibahende deni ko hai kogoni, lalu lolebere.

¹⁵Í̱ agali mendealinaga iba uli ngagoha napobe. Agali mbirame iba uli ibuninaga ngagoha nalu hagadagua í̱ one mbiraore ogonila mandagi halu ibu hangu gubalini holene nga.

¹⁶Wali í̱ one ndoru baba waneigini hono wima ibaga biriyagua mani waneigini urunime í̱ biamogo nabulebira. Ani manda buwa í̱ onela hangu í̱naga waneigini hono wulene nga.

¹⁷Wali kayu dewa yalu waneigini hono wereruni wali biaru ti aria ho tago holebirago ani bulene nawi.

¹⁸Ngode Datagaliwabehanda í̱ oneore mo turu halu biamogo binigo beda. Í̱ one ibu í̱naga iba uli ale bedago í̱na ibuhondo turuho holene nga.

¹⁹Ibu bayaleore biruwa ibunaga mana bayaleore biragome í̱ mo turu helo. Ibugua í̱ gubalini hayago ogoninaga í̱na ibu mitangi bialu gubalini haabo habe.

²⁰I̱ igini-o í̱na wali mendehondo gubalini holene irane aginagabe. Í̱na agali mende oneme bi laragome í̱naga mini daraga bilo kego aginagabe.

²¹Anduane Homogo ibugua mbirale bibahende í̱na beregoni manda biai halu í̱na hariga poregohabi handai haga ka.

²²Agali mana ko biaga kagonaga mana ko biragome ibuni gono wiaga. Ibugua ko biyagome gono wiyagoha ibuni do wiaga.

²³Agali ogonibi ibuninaga mini haru nahaga howa ibugua lulume biagadagua biaabo haragome ibuni bo homelaga.