Read Huli Mini Bayale Gigabi 6 Bible Online

Mini Bayale Gigabi 6 - Huli bible

Mini Bayale Gigabi 6

¹I̱ igini-o agali mbirame mendealila dano ho heagola dano yadai nabiyagua í̱na nguliya lalu lo wiriyagua mana ogoni nakarulapeore.

²Í̱na dano henego nguliya lalu lo wirigome í̱ni garabaya ale bialu gono í̱ni wia harigome do wulebere.

³I̱ igini-o anidagua buliya lalu lo wiriyagua í̱ agali ogoni ibu andaneha taga pani nalu garabaya holene nakarulapego ibu karia gerai puwa i̱ golopeha lalu lamibe.

⁴Í̱na palia nabi ha̱lo birabi nabi abale pole manda bibe.

⁵Ega nogorume gono ngago hondowa ti ibida piagadagua í̱ abale ibida pole anidagua bulene wulebira.

⁶Wali agali biabe nabiaga mangahe kamiru tíhondo i̱na bi mbira langulene yido. Tí uburulime bialu heagoni de handalu o bialu heagonidagua bule manda bialu tí mo yalimu.

⁷Uburuli biaruni tinaga de handameho hagabi haguanebi ogoale bidaba lowa haru hagabi mbira nahego handabe.

⁸Ani nahegoyu tini hangu hangu mini wialu tomo bu payabu ngangi bu hombedo yalu pialu tomo gari porangi nalu hole lowa bu wia do haga kagoni.

⁹Ani biaga kago ai wali agali mangahe kamiru tí tamuni u palu ngamigoni wene paliaho wiaabo dege hole hame ledamibe. Tínaga tamu yu wahalu angi heyulenaga paliaho dege ngamibe.

¹⁰U palu hameledogo emeneore lone palu wuliya laga kamigoni. Gi geru mo muli haga buwa u emeneore paluwa nde heyuliya laga kamigoni.

¹¹Anidagua birimiyagua tínaga mbirale ngamiruni abaleore ereba hai haragola tí mbirale mbira nawi yagibanoore holeberami. Pagealime anda bangu lalu mbirale ngaru bibahendeore hilu gangalibu yalu piai haragola mbirale mbira nawiore hagadagua tí ogonibi holeberami.

¹²Wali agali habane nabulene mana ko hangu biaga karume ke̱ hangu hama ibaga biaga.

¹³Tigua bi tigatiga latagi nahe howa tini mitangi bidago gimebi gemebi demebi mana tara tara biragome ti aria maru karu manda bilo walia haga.

¹⁴Ani bialu howa tigua mana ko hangu biaabo hole mitangi bialu wali agali maru karu ko bilo mo bia haga ka.

¹⁵Anidagua biragome ti kagoria mo ko holene abaleore íbu wialu mo ko haragola ti lone mo bayale holene henge nawulebira.

¹⁶Anduane Homogo ibu handabe mangaore hagane mana koore karia ngago uruni wali agalime bilo hame nalagaorego mana uru. Mbira: Mine halu wali agali maru karu nagalone ka mitangi biagabi Mende: Ne harigaha howa ke̱ hagabi Tebone: Wali agali bame irane nawini bo wahagabi Mane: Ko bule miniha magoyu hagabi Dauni: Ko bule abale porabu hagabi Waragane: Godi lalu ke̱ howa lagabi Kane: Hamene damenemabi hoba mu hagahaga bilo ndelope hagabi Mana urunibi Anduane Homogo ibu hame nalagaore ka.

²⁰I̱naga igini-o í̱ abahanda bia larago hale howa bialu í̱ ai̱yahanda mana lawai harago mo embeda nahabe.

²¹Libugua bi í̱hondo langirago í̱naga bu miniha mo hongowa talialu bialu haabo holene nga. Ani mo hongo howa biriyagua bi mana ogoni í̱naga mani magagua wirilidaguabi mandani yári birilidaguabi wu haabo holebere.

²²Í̱ ibaga bialu poregoha bi ogonime í̱naga hariga mo walia halu í̱ u paleregohabi ogonime í̱ mamage holebira. Palialu heyaregola bi ogoni degeme í̱ mini bayale wulene ngulebira.

²³Í̱ aba ai̱yalanaga bi mana larago hariga mo walia haga wá holene hale ale holebira. Bi mana ogonime í̱ mo tiga biragola í̱na mana bayale tigabi ngago bialu bayale dege haabo habelonaga bulebira.

²⁴Libunaga bi mana langiragome í̱ wali ko biaga arume mo pila nahelonagabi mendeali ti one bedarume í̱ dimagoli howa ndole biyagua hale nahabelonagabi langulebira.

²⁵Wali tingini bayale bedaru de hondowa dimagoli nahabe. Tinaga deme í̱ handaya hayagua ti bedagoha poleni napobe.

²⁶Mbirali ibu wali agali kayu biaga baba kayu biyagua ogoni ibunaga yolo timbuni ndo emene dege tomo halu mbira hangu nolene karulape yu waholebira. Anigo mbiralime agali mendeali one baba kayu biyagua ogoni ibunaga yolo timbuni dewaore yu waholebira. Ibuninaga holene yupe halu homoleneore wulebira.

²⁷Ira dedaore í̱naga galukunini ya para hariyagua irame í̱naga tingiliya bidego nadolebirabe.

²⁸Ira timbuni dedagoria daligani ibagabu kegola í̱naga ge habe nadolebirabe.

²⁹Ogonidagua dege mbirali agali mendeali one bedago kayu biriyagua tigua í̱ yo pialu pe nalolebira mo ko howa baore bulebira.

³⁰Mbirali ibu tomo garibi laragola mendealinaga tomo wialu pedago mo nayagua nde tomo anduane biagome bi ko mbira nalolebirabe.

³¹Anigo ibugua binida lalu handa walia hayagua anduane biagome manani haru poragola ibugua ibu wu heneda ale bibahendeore anduanedagohondo miai holebira.

³²Anigo mbiralime agali mendeali one bedago kayu biyagua nde mana ogoni tigabi ndogo lulu howaore bulebira. Agali mana ko ogoni ale biaga kago ibugua ibuni mo ko hagaore ka.

³³Ani biragola marume ibu mo ko howaore balu ibuhondo bi ko lamialu biragola taga timbuniore ho haabo holebira.

³⁴Agali mbirali ibu one agali mendeme kayu biyagua agalinime keba timbuniore haga ngagoni. Ai ogonidagua dege wali agalinidago ibugua keba timbuni howa ibu one kayu biaga biago pani nelo mo ko howaore bolebira. Ibugua dara holene mbira nawulebiraore.

³⁵Nogo muniru dewaoreme ibu one tawa bo miyaguabi urunime ibunaga lembo holene timbuni ngago mo ereba naholebiraore.