Read Huli Mini Bayale Gigabi 7 Bible Online

Mini Bayale Gigabi 7 - Huli bible

Mini Bayale Gigabi 7

¹I̱ igini-o i̱na í̱hondo bi larogo hale halu embeda nahe í̱naga miniha bayuwaore mo yabe.

²Ani bialu i̱na bi larogodagua bialu hariyagua í̱ bayale holebere. I̱naga bi larogoni baya hanguore yani ho habe. Í̱ninaga de kira kegoni mo ko holani hondowa hogorale bu hondo harilidaguaore hondo habe.

³I̱na bi laga beroru í̱naga miniha mo yuwa haabo habe. Mani magagua wiradagua wu haabo habe.

⁴Mini bayale gigabi wulenegobi manda bayale bulenebi í̱ mbalini nguinioregohondobi í̱ dameneoregohondobi mitangi tigabi birilidagua bibe.

⁵Anidagua mitangi bu hariyagua wali ibu agali one bedagome í̱hondo page bibiya mbaibu lowa ndole biyagua mini bayale gigabi wulene ogonime í̱naga pabe tigila dibidagola í̱ porabutagi halu puwa walime laradagua hale halu bibe nahe holebere.

⁶Horo mbiruore i̱ i̱ni andagani howa anda windoha de handatagi ho haru.

⁷Ani howa handalu hewaria igiri daliahe dewaore mini nawi odahe urubi degedegeru dewa harigani puíbu biyaria handaru. Maru haru dege lowa mini nawi lulu andaore igiri daliahe mbiraore panigi bendo lalu piyaria handaru.

⁸Igiri daliahe odagoni ibu pialu wali koore mbira bereago andagani anda hanehane kaware pu banga biyaria handaru.

⁹Ne̱ lo waheaha arumaha piyaria handaru.

¹⁰Wali biago ibu yári bayanda walime biagadagua bu berenego ibugua igiri odagoni haru palue lowa ndole bule manda bini. Ani manda buwa igiri biago pialu hearia hondowa wali biagome abale lola hole tagira ibini.

¹¹Wali odagoni ibu elahe taga nahagaore biruwa andagani biru dambo nalaga hariga hariga hangu ibagabu haabo haga berene.

¹²Wali odagoni ibu horo bibahendengi agali dege taya bima hariganibi magedi hamarunagabi ibaga bume haga berene.

¹³Ani biaga berenego wali odagonime igiri daliahe o biagoni minu yani howa nu̱nu̱ laya. Nu̱nu̱ lowa igiri biagonaga deni tigatiga handaya howa au laya.

¹⁴I̱ áyu mbirale loma bini mbira bo delalu henego o delarudagonaga nogo mbirini maru i̱ andagani dawa ngelalu ibiru, laya.

¹⁵Anidagua dawa ngelalu ai í̱ lola harabe hondole hai bima ibalu hewaria ndodabe. Ai áyu ibalu heria lolaore kogoni, laya.

¹⁶Ani bialu i̱ andagani paluene tamu bayaore mo ginibu ngelalu ibiru. Tamunguru aga bayaore Iyibi dindi tawe kala tara taraherume dungua ho ngeledo, laya.

¹⁷Ani bialu tamu odagoriani padua tara tara nga baya tara tara biagaru odope howa baya ngabu ngeledo, laya.

¹⁸Ani bidogo iya gini bialu turuho bedabaore egabile labiyago mbaibu, laya.

¹⁹I̱ agalini ona andagaha nahego ibulubada lowa gi nahabe. I̱ agalini ibu dindi kaundiaore mbiraha ho hama piyagoni.

²⁰Ibu muni dewaore hombedo yalu piyago abale dai nabulebira. Sarere kira ale hai halu dai bulebira manda bido, laya.

²¹Wali biagome igiri daliahe biago ndole bu mialu igiri biagonaga bu mini mo heya holenaga bi hale hoabi tara tara dewaore lene.

²²Wali biagome bi ani layagola igiri ibugua hale halu ibu abale wali biago andaga piyadagua haruru pene. Nogome ibu bo dawale haru piarua manda nabi howa nogo anduanenaga geha haruru piagadagua ibu wali biago haruru pene. Agali luluyu karia garabaya helo gi minu huba buwa garabaya haru poradagua bini.

²³Igiri odagoni ibugua manda bialu ibu timu mbirame ibunaga gubalini mogo bianeoregoria bolomogo biragola ibu bo ibira holobada lowa ibu manda nabi pene. Nogo gabuame ni̱a̱o̱ weda manda nabi howa gerai mabu dugua hole pupe halu karia ibuni ni̱a̱o̱ wedagoha do wiaganedagua do wialu homole porogonida ibu manda nabini.

²⁴Ani biyane handarugo ai i̱naga iginiru-o tígua i̱na bi larogo baya hanguore hale hoa howa hale halimu.

²⁵Wali ko ngubi ogonibime tínaga bu mini ba mulani tí gi howa igilo muwa halimu.

²⁶Agali igini dewaore wali ko ogoni aleme mo ko hai halu agali dagalabe nahe dewaore balu homelai hene ngago wali ko ogoni ale bedagoria tí kaware hapara nahe gi howa igilo mialu tí kaundia halimu.

²⁷Bayanda wali andaga pole hariga pedagoni homaliha anda pole hariga poradagua bida. Wali ko ogoni ale bedago andaga pole pirimiyagua o homene dinini pu hagaha pole poramigoni.