Read Huli Agali Mandabi Henegonaga Bi 10 Bible Online

Agali Mandabi Henegonaga Bi 10 - Huli bible

Agali Mandabi Henegonaga Bi 10

¹Tawalinarume nga biagane mini sandanaga beha anda pialu homa anda hayagua sanda nga biaga biago ngu bulebira. Ogonidagua dege mbiralime mini nawi howa biragome agalinaga mini gigabi wulene timbuni daliga ngago bo pelalu hengedape holebira.

²Wali agali mini gigabiwi kagome mana bayale biaga ka. Ogonidagua wali agali mini nawi kagome mana tigabi ngaru nabiaga ka.

³Wali agali mini nawi ogonibime harigani pialu howa mbirale mbira biragome wali agali maru karuhondo ibu mini nawiore ka walia haga.

⁴Í̱naga haru hagame í̱hondo keba hayagua í̱na biabe bialu kego wahalu pu nabibe. Í̱na timbuni bia ko hariyagua ema nabi bi nale kegola ibugua í̱na ko birigo la nabi waholebira.

⁵I̱na dindi bibahendeni handalu hewaria agali haru haga haguane marume mana ko mbira bigi biyaria handarugo ogo.

⁶Haru haga haguane karume wali agali mini nawi karuhondo haru haganaga biabe timbuni ngaru bilo mo mialu homogo karuhondo biabe dindiha bayale ndo ngaru bilo mo miaga.

⁷I̱na handa dege bialu hewaria garabaya biabe ale bia haga hearume ti nogo hosini biralu pialu hea. Anigo haru haga timbuni hearume ti garabaya biabe ale bia hagame geni dindi dindi piagadagua pialu heagoni.

⁸Í̱na gundu uli timbuni mbira tombo wiriyagua í̱ni uli ogoniha pilabehe holebere. Í̱na ege to̱le̱ pabe minu gialariyagua nogombime í̱ hayabehe holebira.

⁹Í̱na dindi hari ngagoha to̱le̱ timbuni ngaru polalu hariyagua to̱le̱ urunime í̱ babehe holebira. Í̱na ira balu hariyagua nde ira ogonime í̱ni dibu bai habehe holebira.

¹⁰Ayu ne nahego yu howa nage nawiriyagua erekui biabeore bialu ira dibulebere. Mbirali mini gigabiwi kago ibugua biabe bulenaga ala manda manda bialu haga ka.

¹¹Mbiralime nogombi mo dambola holene mana manda bu karia ibugua nogombi ogonime ibu ala hayilo henge miyagua mo dambola holene mana biago manda bialu hayago nagalone holebira.

¹²Mbirali mini gigabiwi kago ibugua bi larago hale howa maru karume ibunaga mini mo yaraga holebira. Anigo mini nawi kago ibugua bi laragome ibuni mo habane nabulene holebira.

¹³Agali ogoni ibugua bi tehinalu larangi bi la ko howa mani ibu bi lamaro bulebiraha bi larago agali lulume laradagua bulebira.

¹⁴Wali agali mini nawi karume bi laho dege ngane laho wiaabo holebira. Mani agi bulebirabe ina manda nabi kama. Ai ina halu homedemahabi dindi ogoria agi bulebirabe mbiralime ina langibehe ai kabe.

¹⁵Mbirali mini nawiore kagome erekui biabe bialu ibunaga hongo bame biba ho wahowa ibu andaga polene hariga pedagoria nape pu tara howa ibuni andaga handa walia habe nahe holebira.

¹⁶Dindi mbiranaga kini igiri emene mini boga nabime haru haga kayaguabi agali haguane maru karume egerebagi heyalu tomo ibabi timbuni dawa gimbu bu naabo halu kane mbiraga hayaguabi dindi ogoriani genda timbuniore tagira ibulebira.

¹⁷Dindi mendenaga kini kago ibu mini bogabiore howa bulene ngago bayuwa manda bialu ibunime bi lalu haru haga ogoriani karume hina ibabi narago ti lulu yilo lowa nagimbu bialu ndo tingini hongo helo lowa nolene ngadagua nayagua dindi ogoni bayaleore wulebira.

¹⁸Agali mbirame ibunaga anda arema bulene manga howa dangi nalayagua iba bondo lalu anda ogoni podo ibira holebira.

¹⁹Tomo timbuni dawa payabu naragome wali agali mo turu halu waini iba naragome agali mini mo dungula hagane nga. Anigo muni nayi howa ogoni kirabali nabe nahe holebere.

²⁰Í̱ í̱ninaga paliagane tamuha howa í̱na homogo karu nahendedaha mege bialu kini kagobi hagarere bi lowa la hira nabibe. Í̱na larigoni ega mbirame lo yalu puwa tini lamule poligo manda bibe.