Read Huli Solomono 1 Bible Online

Solomono 1 - Huli bible

Solomono 1

¹Iba gana ogoni bayaleore Solomono ibunime lenego gilibu winigo nga.

²Í̱na i̱ nu̱nu̱ laabo harilidagua laabo habelo hameledo. Waini iba bayalegome dende biaganego goyane lowa í̱naga gubalini holenego taraoreda.

³Í̱naga tinginini nga biagane iba mini sanda ha̱i̱ harigo ngabioreda. Í̱naga mini hale howa i̱ turu halu nga biagane ogonibi mitangi biruli. Wandari bedarume í̱ gubaliniore haga bedagoni.

⁴Í̱na i̱ haru halu iya ibida mba. Í̱ i̱naga kini ale halu í̱naga tamuha i̱ haru halu pu. Agalime waini iba hame lowa gubalini hagadagua ndo iyane mandagi gubalini halu turu hagabu holeberaba. Wali marume í̱ gubalini timbuniore hagago irane hendedo.

⁵Yarusaleme waliru-o hale hadaba. I̱ tingini mindibi bira bedogonigo i̱ hulu wandari bayawana Keda dindi yobi ngagoha balai anda mindibi kagobi bedo. Kini Solomono anda háini yári labolabo baya burugule gerelaho ngagobi bedogoni.

⁶I̱naga tingini tara mende aledagola mo yo nahandalimu. Nime i̱ do mindibia henego. I̱ mbalinirume i̱ handabe manga howa i̱na gerebi mabuha biabe bialu holiya helaya. Biabe ogoni bialu howa i̱na i̱naga tingini baya hangu handayaho holene henge nawini.

⁷I̱naga yamali-o í̱na nogo memeru tani bayale nelo ogoha haru pu helolebero lalu i̱ langi. Ni tandagabi daragola ti gumba agoha holebirabe. Agali maru nogo meme haru haga kagoria i̱na í̱ taya bialu holiyadago agibe.

⁸I̱ lawini-o í̱ wandari bayaore bedegoni. Í̱na i̱ de hondoleyagua nogo meme sibiru ge piyadadagua talima ibabe. Talima ibalu í̱naga nogo memeru tani bayale nelo nogo sibi haru haga agali marunaga balai anda bu kagoria kawareni tani bayale nolene karia handa walia holebere.

⁹I̱naga yamali debene bedego í̱naga yári bidegoni bayaleore Iyibi kininaga karisi gili lole nogo hosinaga yári biaganego aleda.

¹⁰Í̱naga mandarini yári pingipongo biderumebi hale ira dederumebi í̱naga pe mo bayaleore halu gurubu gele ngegome í̱naga mani ngiringara leda.

¹¹Anigo iname yári maru ngolo silibamebi í̱naga wabuwa nguleberema.

¹²I̱naga kini ibu paliaganeni palearia i̱na sanda bayaleore ha̱i̱ hewagome nga taraore biame haya.

¹³I̱naga yamali ibu sanda nga taraorebigo i̱naga galu hombeni palu paga ho wiarua.

¹⁴I̱naga yamali ibu palawaya minana anda halu Engedi dindinaga gerebi maburuha dedagobi kagoni.

¹⁵I̱naga yamali-o í̱ore nde wali baya buruguleoreda. Í̱na i̱ gubalini kego walia halu í̱naga de gilibida.

¹⁶I̱naga yamali í̱ huliya igiri bayaore kegonigo i̱na í̱ hondowa turu timbuni ho kogoni. Datani bayale ogoni iyanaga dagiani tamunguru ale holebira.

¹⁷Ira tamia karunaga maganerume iyanaga anda dabira helalu ira guraya aleme anda ogoninaga dangi haradagua bulebira.