Read Huli Solomono 2 Bible Online

Solomono 2 - Huli bible

Solomono 2

¹I̱ Sarono dindi ira teha palawaya minana anda haragobi bedo. I̱ hari bu karuha dindi ulini ngaruha palawaya dedagobi bedogoni.

²Datani anihe bu karu dombeneha palawaya hagadagua i̱ lawini biago ibu wali dege dombeneha bayale birarua.

³Ira dege dombeneha ira lini bayale daga mbira hagadagua i̱naga yamali biago ibu agali dege dombeneha biatago nahe kagoni. Ni tandagabi darangi i̱ ira ogoni teneha gumba birulene hameore ledo. Ira ogoninaga lini bayale dedago do narogola i̱naga ne harigaha dendeore biagane.

⁴Ibunaga anda heagoha tomo timbuni dawa wiagoria ibugua i̱ haru piya. Tomo nagane anda biagoha labolabo bayaleorerume yári bidagonaga turu haradagua ibugua i̱ gubaliniore hayagonaga turuho kogoni.

⁵I̱ lawini i̱na ibu gubaliniore kogola i̱naga kuni gedaore halu hongo naharuago aiore ira linirubi gerebi lini do gembe binirubi i̱ hongo helonaga nabehe bedo.

⁶I̱ lawini biagome ibunaga gi lehagome i̱naga mahayagi yani halu ibunaga gi tigagome i̱naga tinginini yani haya.

⁷Yarusaleme waliru-o tígua nogo gabua mini dia karu mitangi bialu mbira nabuleore lalu i̱hondo bi lo widaba. Mbirale ogoni iyanagago tígua iya mo mogola howa gubalini holene mo dala hangu hangu nahalimu.

⁸I̱ lawini i̱ bedoria ibaruane hale ko. Ibu amura hari bare wiagohayagi howa pogola edene bima gerai lalu ibaruane hale ko.

⁹Ibu gerai lalu biango dudu aleme dai lagadagua lalu nogo bulumaga wangabe daliaheme dai lagadagua lalubi ibarua. Abale ibalu anda mandaha íbu kago hendedo. Íbu howa ibu windoha handa anda haragoni.

¹⁰Handa anda howa ibugua i̱hondo bi langiragoni. I̱naga lawini gubalini-o tagira íbu. Yamali-o iya haru áyu mbaliya tagira íbu.

¹¹Iba dalu to hayago dalunaga gi nahabe.

¹²Áyu ogoni dindi bibahendeha palawaya dame kago ai iba gana lolenengida. Ega bedarume turu halu bi taratara lagalaga biarua.

¹³Ira poge ale karume lini dalu ibirarua. Pu kuabu tara tara irabuha karume lini dagadaga biaruago ai palawaya uruninaga nga baya taraoreda. I̱naga lawini gubalini-o tagira íbu. Baya-o iya mbaliya tagira mbaibu.

¹⁴Í̱ andaga tamuha ega emenerume ibuni andaga ege kaba ngagoha bira do hagadagua bira do haridago. Ainde í̱naga dengui baya hondoabago hondoliya tagira ibalu í̱naga bi baya tara laruegobi hale holiya tagira íbu.

¹⁵Biango dudu emene bu karuni minu yani hadaba. Iyanaga gerebi mabu gamaha anda ibuwa palawaya bayale dedaru mo ko holigo abale minadaba.

¹⁶I̱naga yamali ogoni ibu i̱ agalini kagola i̱ nde ibu one bedogoni. Ibugua ibunaga nogo memeru palawaya bayale bu karu dombeneha tani nelo haru pu haga.

¹⁷Ibugua nogo meme biaru handayaho kane dege ni anda pialu dagare bulebira. Hari bare hombene bu ngaruha nogo gabua mini diame gerai lalu ibagadagua i̱ lawini-o í̱ abaleore ibabelo hameledo.