Read Huli Solomono 3 Bible Online

Solomono 3 - Huli bible

Solomono 3

¹I̱na mbi bibahendengi i̱ninaga dagiani paluwa paliahondo nahe yange yange bu wuwa i̱naga gubalini biago hangu emaga handaabo haruli. I̱na emagaha ibu hangu taya biaabo howa handa walia naheore haru.

²Ai emagaha dege i̱ heyalu puwa tano wiagoha ibagabume halu ibu taya bialu haruya. I̱na i̱naga yamali taya bialu tano biagoniha hariga peago bibahendeha taya bume harugoyu i̱na ibu mbiraha lola halu handa walia naheore harugoni.

³Tanoha mamage haga agali hearume i̱ de handaya. I̱na tihondo hale halu lalu, I̱naga yamali de handarimibe, laru.

⁴I̱na ti yu wahalu pialu hewaria nde aube tobane buwa i̱ lawini biago pialu hearia handa walia haru. Ibugua i̱ yu wahalu polilono i̱na ibu minu yani haabo howa i̱ ai̱ya andaga tamu i̱ni taba henenegoha haru piru.

⁵Yarusaleme waliru-o tígua nogo gabua mini dia karu mitangi bialu mbira nabuleore lalu i̱hondo bi lo widaba. Mbirale ogoni iyanagago tígua iya mo mogola howa gubalini holene mo dala hangu hangu nahalimu.

⁶Dindi ko iba dalu naibaga ngagoha howa ibiragoni agiledabe. Mbirale ira hagua ngabilo delagane mini inisenesibi muwebi delaragola ira hagua biale hara. Mbirale ogoni hagua biragonaga nga baya taraore agali biyinaya biagarume muni taguiaga ngaligobioredane hendedo.

⁷Dagia bayalego agalime áyu dege mo yalu ibirago de handa. Solomono ibu dagia ogoriani biralu ibiragoni. Ani ibalu ami agali hongohe karu pira waragariame (60) haru ibiragoni. Isaraele ami agali uruni ti hongoheoreda.

⁸Ami agali uruni ti abale howa wai biagane mugubeore ka. Tigua ayu tibu nene gadeleme wai biaganebi ka. Tinaga ayu tibu ta howa yagayaga bialu waitigime ibuligonaga tinime mbiraga mamage haabo haga ka.

⁹Solomono ibu kininaga biragane dagiani berelalu yalu ibira. Kininaga dagia ogoni ira baya tara tararu Lebanono dindiha taweme dibu yu ibuwa wabu wia.

¹⁰Dagia ogoninaga gene silibame wabu heleya. Labolabo aga pu ngolo aleme lebialu dungua ho heleya. Dagiani biragane gedaore labolabo tagalitaya aleme wia dambi hea. Yarusaleme wali berearume labolabo ogoni baya hanguore lebialu mo yári bia ho ngeleya. Tigua kininaga biabe ogoni bulene turuore howa biagaya.

¹¹Yarusaleme wali bedemiru-o tí Kini Solomono de hondole ibidaba. Ibugua kininaga manda mo karulo beda. Kini Solomono ibuni wali dabu biyangi ibu ai̱yahanda manda ogoni ibunaga haguaneni mo karula hayagoni. Horo ogoningi ibu turu timbuniore ho haya.