Read Huli Solomono 4 Bible Online

Solomono 4 - Huli bible

Solomono 4

¹I̱naga yamali-o í̱ hulu wandari bayaore bedegoni. Í̱naga dengui labolabome buyi howa bo bidegonigoyu í̱naga de gili bidagome í̱na i̱ gubalini kego walia hara. Í̱naga mandari libilabu lama nogo memeru tidi yalu turu howa mali lima Gileada hari bare emene ngarunaga daliradagua biarua.

²Í̱naga neru nogo sibi karunaga irini áyu dege podowa wayawaya bini peleore hagadagua í̱naga ne peweleda. Í̱naga ne mbira honda nabi bibahende bayaleore tigabi dege hai harua.

³Í̱naga ne hambu daramabiore aga daramabi ngaligobida. Í̱na bi laregola ne hambu moheoreda. Labolabome í̱naga dengui buyi kegoyu i̱na í̱naga wanakui honani ale hendedo.

⁴Wai pabeni Debidinaga mamage haga anda lu kagobi í̱naga ma lu bayaleoreda. Í̱naga mani gurubu gele bayaore ngeru ami agalinaga humbi dewaore anda lu biago háini girigerelo wiradagua biarua.

⁵Í̱naga andu kira keru nogo dia wangabe labo laboli hono winigo baya taraore palawaya karu dombeneha tani nalu haradagua biarua.

⁶I̱na hari hombeneni mbirale inisenesi ngabi maru buwi ngagoria pu holebero. I̱na hari hombene ogoriani pu koore dege ni anda pialu dagare bilo holebero.

⁷I̱naga yamali-o í̱ baya taraoreda. Í̱naga tinginini motudu mbira nawi baya taraore bedegoni.

⁸I̱ one-o iyame Lebanono hari ngaruni yu wahalu mbaliyago iya haru mbaibu. I̱na Hari Amanabi Seniribi Hemonobi uruninaga nenegoria howa daliape habe. Hari uruniha budi gabua timbuni mini laionorubi lebadirubi haga ka.

⁹I̱ one i̱naga yamaliore bedegoni. Í̱na i̱ emene hangu handaya harigome i̱naga yamali mo ko harua. I̱na í̱naga mani gurubu gele ngeru de hondowa i̱ homalu dai bidogoni.

¹⁰I̱naga yamali i̱ one-o í̱na i̱ gubalini hariligonaga i̱ turuore ho kogoni. Waini iba dende biaganego bagi hene lowa í̱naga gubalini holene ogoni baya taraoreya. Pauda nga biagane tara tara ngaru bagi hene lowa í̱naga tinginini sanda ha̱i̱ harigoni nga taraore bida.

¹¹I̱ one bayale-o í̱na bi laregoni mone ibane dende biagadagua i̱na hale harogola dendebioreda. Í̱na bi laregonibi dendebi nogo memenaga andu iba aleda. Í̱naga aga bideru baya ngabi Lebanononaga iraru ngabi ale bida.

¹²I̱ yamali-o í̱ mabu gama mbira wia do henego ale bedego agali mbirame ge haanda habe nahe pabe bu yaanda hene wiaganegobi bede. Mabuha iba duguaragola mbirali ibu hangu iba hambiaganego ale í̱ bede.

¹³Mabu ogoniha ira bayale bayaleru andaho haganegobi í̱ bedegoni. Ira marume lini baya dendebi noleneru daga. Marume sanda bayale wabulene dalu marume tomo mo dendebia holenebi daga. Ira marume yári tara tarabi dalu marume hagua ngabilo delolenebi daga.

¹⁵Iba duguaraga halu poragome mabu mo bayale hagagobi í̱ bede. Iba emeneru Lebanono hari ngagoha howa mabu ogoniha dugu dalidali biagagobi bede.

¹⁶Puyabu uyu ibirago leneha howa eberego í̱ heyabe. Puyabu unu leneha howa eberego í̱na i̱naga mabuha pulo yalu ibuwa nga biaganeme to̱lotagi hela. I̱naga yamali ibu ibuninaga mabuha ibalu ira lini bayale dedaru do nela.