Read Huli Solomono 5 Bible Online

Solomono 5 - Huli bible

Solomono 5

¹I̱ one i̱naga yamali-o i̱ni mabuha íbu kogoni. I̱na mbirale bayale ngabiru mo mogo bu ngelowa mone ibane bayale dendebigobi nalu bedo. I̱na nogo memenaga andu ibabi waini ibabi na dege bialu bedogoni. Libu yamali bayalego labo-o libugua ibabi hinabi nalu no karula poragola haru lole nalibu.

²Mbiraga i̱ paluwa miniha paliahondo nahe yange yange bu wiru. I̱ yange yange bu wuwa dege emene paluwa emaga handalu hewaria i̱ lawini biagome anda i̱ palewago haneni panga dugua lalu hearia handaru. I̱ lawini i̱naga yamali-o i̱ anda ibuliya panga duguabe. Mbiraga pibiya ibiyagome i̱naga dengui damialu mandani dimba beda, laya.

³I̱na i̱ninaga aga golo waharugodago lone aginaga buliyabe. I̱naga ge wayawaya bu waharugodago lone aginaga mo dodo heloliyabe.

⁴I̱ lawini biagome anda pangani gime yani hayuago hale howa i̱naga miniha dungu lalu turuore biya.

⁵I̱na heyuwa panga dugua hole manda biru. I̱naga gime anda panga duguagane heagoria yani harugola sanda i̱naga gini heago para haya.

⁶I̱na i̱ lawini anda ibilo panga duguarugoyu ibu abale piyiyagola i̱na de handa nabi haru. I̱na ibunaga bi hale hoa howa i̱naga miniha genda biya. I̱na ibu hai biaabo howa handa walia nahe dege haru. I̱na ibu olarugoyu ibugua ladai binigo i̱ hale nahe dege haru.

⁷Tano pabe mamage haga agalirume i̱ handa walia howa tigua i̱ bo mberaho wahalu i̱ dagarenaga biagane aga biwago ti golo yalu piya.

⁸Yarusaleme waliru-o tígua i̱ yamali handa walia harimiyagua i̱ hame lowa gubalini dugupe ho kogo lamilimu. Tígua bi ogoni lamuleberema lalu i̱hondo bi lo widaba. Bi uruni emaga andaha howa ani lalu haruya.

⁹Í̱ wandari maru bedaru bolangua howa í̱ hulu wandari bayaore bedegoni. Í̱ yamali ogoni ibu agali abibe. Ibu ina wali maru bedemaru agalini karu bolanguahe kagola iname bi lo wuluma̱yabe.

¹⁰I̱naga yamali ibu tingini hongoheore baya dombarale ka. Agali daosini pira (10,000) dewaore bu karunaga dengui baba bitago naheore kagoni.

¹¹Ibunaga dengui ngolo ale ngiringarale. Ibunaga mandari mindibi bayaleore ega mindi mbiranaga iri mbauleya.

¹²Ibunaga de baya pewele ega gabiago iba angeni wayawaya bini bedaligobiya.

¹³Mabuha mbirale bayale ngabiru bu hagadagua ibunaga peiri heago bayaleoreya. Ibunaga ne hamburu palawaya bayaleore dedagobi howa bi larago bayale ngabi sanda ale laga.

¹⁴Ibunaga giru bayaleore hongohe howa ibunaga gi hondoneru mo yári bia halu gi magi muni timbunime miagaru ibu gini nga. Ibunaga tingini wála honeore howa ngiringara lalu heore. Nogo dongone ege to̱le̱ mindibi muni timbunirume miagago aleme yáribi hea.

¹⁵Ibunaga ge biagolabo to̱le̱ pele bayale kirame gene wawa helene mbaulebi ngolome wabu helene peleorego aleda. Ibu timbuniore Lebanono hariha ira tamia bayaleore lu timbuni hearubi kagoni.

¹⁶Ibugua i̱ nu̱nu̱ laragola i̱naga bu bamialu turu bialu dungu laga. Ibunaga tingini bibahendego baya gibiore ka. Yarusaleme waliru-o i̱naga yamali larugoni ibu ogonibiore ka.