Read Huli Solomono 6 Bible Online

Solomono 6 - Huli bible

Solomono 6

¹Í̱ wandari maru bedaru bolangua howa í̱ hulu wandari bayaore bedegoni. Í̱naga yamali ibu ani piyabe. Iname í̱ biamogo bialu tayabia holoma̱ya ibu hariga ogoha piya lalu langibe.

²I̱naga yamali ibuni mabuni ira nga biaga ale bu kagoha pu ka. Ibu mabuha ibunaga nogo memeru tani nelo halu palawaya bayale dedaru do mogo bialu ka.

³I̱naga yamali ibu i̱naga halu i̱bi nde ibunagaore bedogoni. Palawaya kago dombeneha howa ibugua ibunaga nogo meme tani nelo haru kagoni.

⁴I̱naga yamali í̱ baya burugule Yarusaleme tano alebi Tisa tano hameleore ngago alebi kegoni. Í̱ baya buruguleore ami agaliru wai bule lowa pelagi yalu tidiyu ibirago hondowa mitangi bu wiagadagua ngogoni.

⁵Í̱na i̱ de handaya haabo kegome i̱ minu yani haradagua bidego í̱ handa taraha. Í̱naga mandari kerume nogo meme wabuni tidu yalu Gileada hari bareni mali lima daliape hene mbauleda.

⁶Í̱naga neru nogo sibi karunaga irini áyu dege wayawaya bini peleore hagadagua í̱naga ne peweleda. Í̱naga ne mbira honda nabi bibahende bayaleore tigabi dege hai harua.

⁷Labolabome í̱naga dengui buyi kegoyu i̱na í̱naga wanakui honani ale hendedo.

⁸Kini ibu wali dewa dabu bila. Pira waragaria (60) dabu berolono bini biralu pira halira (80) one wabuni mende biralu wandari maru mini nalenebi bira dege biniru ani bila.

⁹I̱ nde one mbiraore hangu gubalini howa berelalu ibu i̱naga yamaliore ega malibu ale bayaleore bedagoni. Ibu ai̱yahanda ibu wane mbiraore ogoni dege gubalini haga berenego i̱na ibuhondo turuho ko. Wali bibahende biru ngarumebi ibu de hondowa ibunaga mini mo yaraga haga. Kini one biru ngarumebi ibu one wabuni mende bedarumebi tigua iba gana lalu ibu mini yaraga haga.

¹⁰Egerebagi ni tagira ibiraligobi dumbiyalu wálo yalu ibiragoni aibe. Ibunaga wanakui do mbarale ni tagira ibule howa dorone tagira ibagagobi ibalu ege do mbarale daganegobi halu bida. Ami agalirume wai bule lowa humbi demborerebi yalu tidiyu ibirago de hondowa mitangi bu wiagadagua i̱na ibu de hondowa mitangi biaho ngogoni.

¹¹I̱ mabuha dalipe howa ira lini bayale dagane bu karu dombeneha íbu ko. Dindi uliniha ira bayale do ngoria bialu anda harago hondole íbu ko. Gerebi yuni gahenge mabirago handalu ira marume palawaya tara tara nga biagane ale do ngarubi hondole íbu halu bido.

¹²I̱naga yamali-o í̱na i̱naga bu mo durula harigoni. I̱na manda bialu hewaria agali mbirame karisini howa nogo hosime gililo yalu pelo poa hagadagua kogoni.

¹³Sulama wandari-o mali lia mali lia ina de hondoloma̱ya í̱na mali lia. Irane aginaga wali agali bu karunaga deni i̱na mali luliya tí hondoa kamibe.