Read Huli Solomono 7 Bible Online

Solomono 7 - Huli bible

Solomono 7

¹I̱naga yamali í̱ wandari baya buruguleoreda. Í̱naga geni gesu bidegola paliaore biarua. Í̱naga ge bagu bayaleore agali bigiya wabiagame to̱le̱ podalu wabiade hene mbauleoreda.

²Iba be mbira amu ngago waini iba dendebi biraho wiagane ale nga. Palawaya bayale ngabiru do mabu bidagoria widi mberene amu do huba bu nga.

³Í̱naga andu kira keru labo nogo dia igini labo laboli hono wini ogobi labolabo daburabuho kagobida.

⁴Í̱naga ma kego anda lu mbira pele bima iraga kagobida. Í̱naga de Hesebono tano ogoninaga to̱le̱ panga haraba kawareni uliha iba bedagobida. Í̱naga ngui bayaore Lebanono agali mamage hagarunaga anda lu bima irigi hene Damasagasa tanohayagi heagonibida.

⁵Í̱naga haguane Hari Kamele kagobida. Í̱naga mandari baya taraore pingi pongo bideru didoleda. Mandari gogorali elepebe bidago hondowa kini kagome hame lowa odope habeheda.

⁶Hulu wandari baya taraore í̱ bedegoni. Í̱na i̱ mo turuore harigola i̱na í̱ gubaliniore ho haruli.

⁷Í̱ore hulu wandari ndo gurulu gibi bibi ayage aleda. Í̱naga andu kego labo geromi lini aleda.

⁸I̱na iraga howa geromi lini dedago dolebero. I̱na handalu hewaria í̱naga andu kego labo pu mbira miini gerebi lini dewa dowi kagobiya. Í̱na buhe̱ larigo ngabi dendebi ira lini mini abelo aleya.

⁹Í̱naga ne hambu ngabiore waini iba aleda. Í̱na i̱ nu̱nu̱ laregola waini iba dende biagadaguaore biarua. I̱naga yamali-o i̱na í̱hondo waini iba ngulebero. Waini iba ogoni alego nolene bayale holebira.

¹⁰I̱ ibunaga lawini bedogo ibugua i̱ gubalini haabo haga kagoni.

¹¹I̱naga yamali bubi-o iya dindi emene mbira anda bu karuha palu hama mbaliya i̱ porodagua mba íbu.

¹²Egerebagiore iya heyalu puwa gerebi ira bu karu de hondo mbaliya. Gerebi ira uruni mabialu pabua balu yigiyaga ledabe handabiya. Ira lini mini pomegaranade bayale daga bu karume lini dole pabua bayadabe hondo mbaliya. Iya mabu ogoniha pu howa i̱na í̱ gubaliniore kodagua walia holiya.

¹³I̱ lawini-o i̱na ira lini bayale bayaleru do yalu ibuwa í̱ nabelo panga haraba kawareni ngeledo. Maru ala do yinigo ngelalu maru áyu dege do yinigo ngelalu bido. Iyame pu kuabu ale iyanaga bu mo heya hagane karubi ngabia handaba.