Read Huli Solomono 8 Bible Online

Solomono 8 - Huli bible

Solomono 8

¹I̱ ai̱yahanda í̱ i̱ mbalini taba honowa andu nabelo nginidale i̱na ogoni bayaleda lalu kole. Ogonigo i̱na í̱ harigani lola haruyagua í̱ nu̱nu̱ larogola wali agali karume hondowa í̱ ko bere lolene nawulebira.

²Í̱na i̱ gubalini holenenaga mana lawai habelo i̱ ai̱ya andaga í̱ haru polebero. I̱na í̱ waini iba bayalego mbirale mo dende bia hagane ale heba bimaga maga binigo í̱ nabelo mo yalu ibuwa ngulebero.

³I̱ lawini ibunaga gi lehagome i̱naga mahayagi yani halu ibunaga gi tigagome i̱naga tinginini yani haya.

⁴Yarusaleme waliru-o tígua mbira nabuleore lalu i̱hondo bi lo widaba. Mbirale ogoni iyanagago tígua iya mo mogola howa gubalini holene mo dala hangu hangu nahalimu.

⁵Dindi ko dalu naibaga ngagoha howa ibunaga yamalila gi pingipongo bialu ibiragoni wali aibe. Í̱ ai̱yahanda ira mini abelo teha í̱ taba heneneyago i̱na í̱ ogoniha paleria mo barila harugoni.

⁶Í̱na wali mende gubalini nahe i̱ hangu gubalini haabo habe. Wali mende í̱naga gime yani nahe i̱ hangu yani habe. Homame hongo howa agali bope hagadagua i̱na í̱ gubalini holene hongohe ngo. I̱na í̱ hame lolenego ira hungu bialu daradagua bida.

⁷Ira ogonibi dedago iba odo hundia hole biyaguabi iba li ibalu hundia hayaguabi nahundulebiraore. Agali mbira ibugua walime ibu gubalini halu hame lelo lowa ibunaga muni bibahende wali biago miai hayaguabi ibu bo yagibano halu wali biagome ibu mege bu dai bulebira.

⁸Inanaga mbalini ibu wandari emene ogoni ibu andu naibi beda. Ibu wandari mabuage bedaria igiri mbirame ibu dabu bule ibiragola iname wandari biagohondo agi bia holeberemabe.

⁹Ibu tanonaga ege pabe bedayagua ogoriani iname silibame anda luni wa hondo biragane ale mbira ibunaga bia holeberema. Ibu tano to̱le̱ pabe panga hayagua iname ibu pele mialu ira tamia hongoheme panga hongohe wabu heloleberema.

¹⁰I̱ tanonaga to̱le̱ pabe halu i̱naga andu tano pabe ogoninaga anda lu wa hondo birule kira bu helene haradagua bida. I̱ yamalila iya haru mandagi haribayagua i̱ mini dungulo haruligo ibu bayuwa manda bu kagoni.

¹¹Kini Solomono ibunaga gerebi mabu mbira dindi Bala Hamono lagagoha winigo nga. Agali maru ti mabu ogoniha gerebi lini dole hame layagua ibu muni siliba daosini (1,000) mbira mbira migi biaga.

¹²Solomono ibu muni siliba daosini mbira (1,000) ogoni mo yilo. Agali maru mabu ogoni yolo mule hongo hayaru ti tininaga muni siliba handari kira (200) ogoni mo yilo. I̱ aginaga mogo lolebe. I̱ i̱ninaga gerebi mabu mbira bayale ngogodago.

¹³I̱naga gubalini-o í̱na mabuha howa bi labelo hame ledo. Í̱na bi labelo i̱naga nenegeru ti hale hole hondo kagoni.

¹⁴I̱naga gubaliniore-o í̱na nogo mini dia aleme dai lagadagua lalu nogo dia wangabe hongoheme dai lagadaguabi lalu hari bare hombene mbirale ngabi buwi ngaruniha howa pogolama ibagadagua abale dai bibelo hame ledo.