Read Huli Aisaia 2 Bible Online

Aisaia 2 - Huli bible

Aisaia 2

¹Anduane Homogohanda de gandeba mbira Emoso igini Aisaia ibugua Yuda wali agali Yarusaleme tanoha hearuhondo lamilo mo walia hene. Bi laminidagoni ogodagua lamini.

²Horo mbirungi haragola Anduane Homogonaga harini ibunaga anda hene biago bibahendenaga daliga ibu bolanguahe hari bare ngaru waradai buwa ibu lina daligaore holebira. Dindi bibahendeni hameigini tara tara dewa palima pedaru ibalu ogoniha iba yo̱laradagua bialu yo̱lalu anda ibalu

³wali agali uruniha howa ibirarume lalu, Anduane Homogonaga Hari Saiono iraga hama maibidaba. Isaraele wali agalinaga Ngode Datagaliwabe kago ibunaga anda kagoria ubanda hama. Ibugua hame ledaru ale iname buluma̱ya lawai halu ina pialu holene hariga ibugua ba kagoria pialu holeberema. Irane Anduane Homogonaga lawai holene mana ngaru Yarusalemeni howa ibalu Saiononaga hari neneni howa ibugua wali agalihondo bi lamiaga, lalu ka.

⁴Hameigini tara tara tini dege dege wai bulene te lalu bi anda halu hongo ha a̱i̱ na̱i̱ bialu karu Anduane Homogo ibugua bi uruni dabalu mo palia holebira. Tinaga wai biagane ayu tibu yidaruni tomo hongole dindi godagane wabulebira. Aeane yandare widi lini dedagola gandu lolene ale helo nguni mo garayabia helolebira. Hameigini tara tara uruni lone wai bule tidu yu haga haga buwa manda manda nabuleorebira.

⁵Ai Yagabanaga aguanealiru-o Anduane Homogohanda wá holene hariga ina ngiyagoria pialu hami̱ya ibidaba, lalu Aisaiahanda lene.

⁶Anduane Homogo-o í̱naga wali agali Yagaba aguane o bu karu erembira miridagoni. Ani mirigo irane ti tomia tara tara bulene manabi gamugamu tara tarabi Pilidia dindiha wiagobi tinaga dindini dege wiai kagonaga ani birida. Tinime ni tagira ibiragohayagi howabi mana ko uruni mo yu anda ibinigo nga. Ani bialu áyu í̱naga wali agali uruni ti dindi mana tara wiaru bialu ka.

⁷Muni siliba ngolobi nogo hosibi hosime gili laga garo ale karisibi dewaore daga labe nahe Isaraele dindiha to̱leda.

⁸Ani bialu mbirale dama mitangi bialu gime wabini dewaore ti daluha wu to̱lo tagi ho ngelowa mbirale tininaga gime wabini urunihondo bi pupu wialu ka.

⁹Anduane Homogo-o í̱na wali agali ti bibahende mo dindiha haregola ti taga timbuni ho holebira. Ai Anduane Homogo-o í̱na tigua ko biyaru domo wanahabe.

¹⁰Wali agali bu kamiruni tí ibida pialu egeanda karuha bira do hadaba. Dindi uli guabuwa gonene tombolo ngelo do howa uruniha bira do hadaba. Anduane Homogo ibuni wá tara holenehebi hongo timbuni holenebi heba ibirago hondowa tí mogo lalu mo ko holigo bira do hadaba.

¹¹Anduane Homogo ibuni ibirangi mana ko mine howa bialu tininaga mini hangu mo yaraga haga karu bope haragola ti taga timbuni ho holebira. Ani helowa horo ogoningi Anduane Homogo ibuni hangu mini lene timbuni holebira.

¹²Anduane Homogo Hongo Haiheore kago ibugua wali agali tininaga mini yaraga haga karuni horo ogongiore bope hole lowa horo pongo bo winigo ngelo ka. Ani bialu wali agali tinaga mbirale tini turu holenaga mo wigi bini ngarubi horo ogoningi dege mo ko halu bo haealabagabu wahai holebira.

¹³Ibugua ira tamia baya bebenabi luni Lebanono dindi howa anda hene karubi dindi hobane mbira Basana ngagoha howa ira mbira bai ale mini oga hongohe giambe anda hene karubi bibahende dugu wahai holebira.

¹⁴Ibugua hari nene daligaore wedaru bo haealabaga biai halu

¹⁵anda lu bu gimbu bu migi bima irigi hene karu bo haealabaga bialu tano ngarunaga ege pabe hongohe bu heledaru bo gialobaga biai holebira.

¹⁶Iba sibi baya timbuni ngarubi bibahende bo gialobaga biai holebira.

¹⁷Anduane Homogo ibuni ibirangi wali agali mana ko bialu mine hagabi tininaga mini mo yaraga halu haga karu bibahende mo ko halu bo haealabaga biai haragola uruni biagaru tini taga timbuni ho holebira. Ani bialu mbirale dama mitangi bialu gime wabini ngaru mo ereba hai haragola Anduane Homogo ibuni hangunaga mini mo yaraga halu mini lene timbuni holebira.

¹⁹Horo ogoningi Anduane Homogo ibugua mbirale bibahende dindini karubi ngarubi mo gi hai helolebira. Ibugua dindi bibahende mo emabia hole ibirangi wali agali tigua Anduane Homogo ibuni wá holene timbuni hebabi hongo tara ho yalubi ibirago handalu ti ibida piai holebira. Ani puwa egeanda karuhabi dindi guabu wini ngaruhabi bira do hole ibida piai holebira.

²⁰Horo ogoningi wali agali tigua dama mitangi bialu bi pupu wule gime ngolo silibarume wabu wini biaruni bibahende uli ngaruhabi egeanda dalagamia paliaga karuhabi ba a̱i̱ na̱i̱ bialu tini ibida piai holebira.

²¹Horo ogoningi Anduane Homogo ibugua mbirale dindini ngaru mo ema biai hole ibiragola wali agali ti gi timbuni holebira. Ani biragola Anduane Homogo ibuni wá tara holene heba hongo timbunihe ibirago de handalu ibida pole hari tene ngaruha pialu egeanda karuha bira do holebira.

²²Ainde wali agali mbiralime ibalu ti biamogo bulubada lo manda nabilimu. Ani bulene nawi larogo irane ina wali agali bu kamaruniha galone mbira naheore dindini tigimandi hangu halu homoleberema.