Read Huli Aisaia 22 Bible Online

Aisaia 22 - Huli bible

Aisaia 22

¹Anduane Homogohanda dindi ulini yu dindi mini De Gandeba Dindi laga winigoria Aisaiaha howa bi lenego ogo. Yarusaleme wali agali bu kamiru tígua irane aginaga turuho howa bi dewa ladagadaga bialu kamibe. Tígua anda dangini irigi ho howa hoaro laramigo tano bibahendeha hale haame harago agibe. Tínaga ami agali homayaruni ami agalime hongo howa wai bialu kaore homagadagua ndo homaya.[11]

³Ani biyagola tínaga ami agali haguane bu hearu kaundiaha ibida piai hene. Agali haguane ibida piyadaruni ti danda timu mbira nayi pialu hearia waitigi bu hearume talima pialu minu yania hai hene.

⁴Anidagua binigonaga i̱ dara ho kogo hondowa tígua i̱naga miniha mo palia hole manda bu nahalimu. I̱ni hanguore holiya helalimu. Irane i̱naga miniha genda yu howa dugu bialu kogoni ndobe. I̱naga wali agali burupale darabi bu karubi homolobadane dara howa dugu bialu kogoni.

⁵Anduane Homogo Hongo Haiheore Howa Bibahende Haru Haame Ho Haga kago ibugua dindi ulini yu dindi mini De Gandeba Dindi laga ngagoria horo mbiru manda bu winigo tagira ibirangi genda yu holeberemi. Tínaga waitigi dewaore ibalu tigua hongo howa ga̱ ladagadaga bialu gerailo yu puíbu bialu kagola tígua mogo lalu gi timbuni halu durulowa luluyu ibagabu holeberemi. Waitigi uruni tigua wai pabe bidaru bo gialopaya biragola tígua gi timbuni halu ga̱ laramigola dindi kaundia hari nene ngaruha karume hale habehe loleberemi.

⁶Ami agali Elama dindiha bu karume danda timuru yalu nogo hosini biralu wai biaga garo ale karisiru heba ibiragoni. Ani bialu Kiri tanoha howa ami agali bu karu tigua wai humbi yalu ibiragoni.

⁷Tínaga dindi ulini bayaleore ngamigoha wai biaga karisi hongohe dewa wu to̱lowa ami agali maru nogo hosini biralu tanonaga pabe haraba ngagoria manda manda buwa wai bule íbu kagoni.

⁸Anduane Homogo ibugua Yuda dindinaga de handayaho naheore ngagome waitigi tigua anidagua biragoni. Tínaga waitigime wai anda ibiyangi tígua lo manda bialu wai biagane ale dewaru tínaga anda mini Lebanono Irabunaga Anda laga hemigoha wirimigome tini mo wialu bayale holeberemabe tobaho harimigoni.

⁹Ani howa Yarusaleme tanoha wai pabe heago maruha gialo payabu wiago de hondowa dege ho harimigoni. Ani bu wiagola tígua Yarusaleme Debidinaga tanoha anda heago damene bibahende daga lai harimi. Ani daga lowa tígua anda maru hearu gialai howa tanonaga pabe uruni biatiga birimi. Ani bialu iba tagiraha bereago tanoha dadabu yu anda ibirimigoni.

¹¹Ani buwa iba hariga timbuni mbira tanonaga pabelabo gimbuni heagoha bo wialu iba biraga uli ala wini wiagoha howa iba tamuha berelonaga dadabu yu anda ibirimigoni. Tígua urunidagua birimigoyu Ngode Datagaliwabe kago ibuni mitangi nabiore harimigoni ndobe. Ibuguaore mbirale tíha ani bilo lalu bamba howa manda manda bu winigo ai uruni tíha tagira ibiyagoni ndobe.

¹²Horo ogoni tagira ibiyangi Anduane Homogo Hongo Haiheore howa Bibahende Haru Haame Ho Haga kago ibugua tíni dara haga bu dugu timbuni bialu tínaga mandari dogo wahai halu daraho howa karulaga aga wiago mo karulo halimulo hamelo hayagoni.

¹³Ani hayagoyu tígua ani nabi waho howa mbirale uruni biyangi turu howa oba halu harimi. Tígua nogo bulumaga sibiru bo dawalu dawe timbuni halu waini ibaru nalu harimi. Anidagua bialu howa lalu, Ainde yawi homami̱yadago áyu tomo ibaru nalu turu hami̱ya ibidaba, larimi.

¹⁴Anduane Homogo Hongo Haiheore howa Bibahende Haru Haame Ho Haga kago ibunimeore i̱hondo ogodagua layuane hale haru. Ibugua lalu, Tínaga ko urunidagua birimigo i̱na embeda nahe mandabu haabo halu tíni homarami. I̱ Anduane Homogo Hongo Haiheore howa Bibahende Haru Haame Ho Haga kogome bi o ledogoniore, lalu langiya.

¹⁵Anduane Homogo Hongo Haiheore howa Bibahende Haru Haame Ho Haga kago ibugua i̱hondo lalu, Í̱na kini andagaha bibahende ngaru handayaho hai haga kago agali mbira mini Sebena kago hondo puwa ibuhondo bi ogodagua labe, lene.

¹⁶Í̱ dindi ogoriani agi bialu kebe. Í̱naga dindi mbira nawi í̱ nabaile kegoni. Í̱ ariago mbira nahedago í̱ aigo damene howa í̱na agali maruhondo ege to̱le̱ hari bo tombe ladaba lowa í̱ninaga homali bayale bu manda manda bialu kebe.

¹⁷Í̱na mandabu handalu keria í̱ agali hongohe kobe tobaho kebe. Ani ndoyago. Anduane Homogohanda í̱ mo emeneore halu minu mbera buwa mbalo ale helowa dindi kaundiaore mbira ngagoha bape holebira. Ani biragola í̱naga karisi bayale í̱ni gubalini hariliruni wahalu dindi kaundiaha pu homolebere. Í̱ kininaga biabe biahaga ho kegoni howa í̱na kini damene bu karuha taga holene mo yu anda ibaga kegoni ndobe.

¹⁹Anduane Homogohanda í̱naga biabe bialu kegoni dugu waharagola í̱ ko yagibano howa mini lene dege mbirago kegoni lone naholebere, labe laya.

²⁰Sebena-o Anduane Homogohanda í̱hondo ogodagua laya. I̱na mbirale uruni berongi i̱naga biabe biahaga agali Hiligaia igini Eliagimi olalu íbu lolebero.

²¹Ibiragola aga lunibi mandibubi agali haguaneme karulagane ale í̱ karulo haga biago ibu mo karula holebero. Ani bialu í̱na biabe bialu kegoni ibugua bia aribia helolebero. Ani helarogola ibugua Yarusaleme wali agalibi Yuda dindi bibahendeha haru halu baya hangu handayaho howa ibuni ti aba haradagua holebira.

²²Ani bialu Kini Debidi aguanene holebirarunaga panga gi i̱na ibunaga giha mo ya holebero. Ani berogola ibugua panga dugua harago mendealime payabe nahe halu panga payarago mendealimebi duguabe nahe wulebira.

²³Pu nguni hongo howa dariba hene ngaligobi i̱na agali ogoni ibunaga biabe buleneore ngago bialu helo mo hongo howa helolebero. Ibugua biabe ogoni bialu holebiragome ibu damene bibahende mini lene dege hai holebira.

²⁴Ani kagola ibu damene maru karu ti ibuni hana ho hene howa ibugua ti biamogo bia helonaga ibuhondo hale halu holebira. Nu todobene beru mbira ira gemboge hongoheni gerela hagadagua ti ibuni hana ho hene mbira holebira.

²⁵I̱ Anduane Homogo Hongo Haiheore kogome bi ogodagua larogoni. Mbirale uruni birangi gerela hagane gemboge ale hongohe hayago genda halu podo ibira holebira. Ibira haragola wali agali ogoriani hanaho howa genda mo mialu haga hayaruni bibahende ibira hai halu mo ko holebira. I̱ Anduane Homogo i̱na bi o ledogoniore, laya lalu Aisaiahanda lene.