Read Huli Aisaia 26 Bible Online

Aisaia 26 - Huli bible

Aisaia 26

¹Horo mbira tagira ibulebirago ogoningi wali agali Yuda dindiha holebirarume iba gana ogo lolebira. Inanaga tano hongoheore ngama. Ngode Datagaliwabe ibunime tano ogoninaga wai pabe mo hongo haga kagoni.

²Wali agali mana bayale tigabi biaga karu anda ibilo tanonaga pabe panga timbuni payatagi hene karu dugua hadaba. Wali agali uruni ti mini bilinahe howa Anduane Homogo andaneha haabo hayaru anda ibilo.

³Anduane Homogo-o í̱ andaneha haabo haga karu tinaga mini í̱ha hongohe pagaho haga ka. Ani kagola í̱na tinaga miniha mo palia holene miaga ke.

⁴Anduane Homogo ibu inanaga ha do hagane anda kagoni. Ibu ani haabobo holebira. Ani kagonaga iname ibuhondo mini mbiraore wu haabo holene nga.

⁵Anduane Homogohanda wali agali mine haga heneru ti mo dindiho heledagoni. Tinaga tano hongohe ngago ibugua gialo hole bialu dindini haealabaga bu ngelai haga ka.

⁶Wali agali maru bu hearume yagibano hearu mo ko hayagola darabi uruni ti mbirale mbira nawiore hene. Yagibano uruni tigua tano bo gialapaya bini bu wiaru áyu hengedalu pialu ka.

⁷Wali agali bayale karume hariga pialu helo Anduane Homogo-o í̱nioreme hariga ogoni mo tigabu wiaga ke.

⁸Anduane Homogo-o ina bibahende í̱naga mana lo ngedagua talialu ibule eberemagoni. Iname í̱ handaya howa dunubia ho kamagoni. Í̱ni mini lene timbuniore kego hame lalu kama.

⁹Mbiragabi i̱naga gubalinioreme í̱ hangu mitangi biaabo haruli. Í̱na wali agali dindini karu ti godini dabaki beregola tigua í̱naga mana tigabi ngegome dabaganego ogo aleda lalu manda bulebira.

¹⁰Í̱na wali agali ko biaga karu ti dara hariligoyu tigua í̱naga mana tigabi bulene ngaru moya nabi holebira. Ti wali agali tigabiwi karu baba mandagi howa dege tigua mana ko ngaru bialu haabo haga ka. Tigua í̱naga mana bayale tigabi ngegobi hongo timbunihe kegobi mitangi nabi howa í̱ni andaneha holenegobi mangaore haga ka.

¹¹Anduane Homogo í̱na wali agali ko bu karu pani mule í̱naga gi dogola amu ho kegoni. Í̱ ani bu kegoni tigua de handa nabi ka. Anduane Homogo-o í̱naga wali agali bu karuni í̱nime biamogo biaga kegoni ti hendelo mo walia habe. Anidagua beregola mana ko biaga karu ti taga timbuni holebira. Í̱naga waitigiru bo delole ira timbuni dela manda manda bu wirigome í̱na wali agali ko biaga uruni dai helo.

¹²Anduane Homogo-o í̱naga wali agali bayale hangu holoma̱ya bayale holene í̱na ibilaga kegoni. Iname mbirale bibahende bayale bigi birimaru í̱na biamogo birigola birimagoni.

¹³Anduane Homogo inanaga Ngode Datagaliwabe-o agali haguane tara henerume ina handaya ho henegoyu í̱ni hangu inanaga Anduane Homogo timbuniore kegoni.

¹⁴Áyu agali haguane uruni tini mbira ha nabi homai hayagoni manibi ti lone heya nabulebira. Í̱na tinaga hongo heago bope halu ti mo ko howa bo ereba hai helarigoni. Wali agalime abogo hene lalu mani tinaga mini manda nabulebira.

¹⁵Anduane Homogo-o í̱nime inanaga dindi tubari mo yanga lalu mo timbu harigoni. Anidagua birigome í̱ninaga mini timbuni mini leneore helarigoni.

¹⁶Anduane Homogo-o í̱naga wali agali bu hearu pani mialu barigola tigua í̱ni heria dara holene heba ibalu í̱nihondo bi layagoni.

¹⁷Walime gali taba honole tandaga nalu pedere biagadagua iname genda tandagala timbuniore nalu howa pedere bialu harimagoni.

¹⁸Tandaga ogoni narimagoyu iname mbirale bayale mbira tagira naibiya. Waitigi hearu tinaga hongome ina bope hayago inanaga dindi ogo iname mo bayale habe nahe harima.

¹⁹Inanaga damene homayaru ti mani lone heyu holebira. Tinaga tingini heba heyu holebira. Áyu homaliha padaruni tigua dengalalu heyuwa mani turu halu kulo holenenaga iba gana lalu holebira. Dindi ko yobi ngagoni mbiraga dadimba ibiragome datani mo gomba haragola anda hagadagua Anduane Homogohanda homene uruni tinaga holene lone miadai bialu mo heya hai holebira, lalu iba gana ogoni lolebira, lene.

²⁰I̱naga wali agali bu kamiru tí tíni andaga anda puwa panga payatagi ho biralimu. Anduane Homogonaga lembo holene ngago ereba helotagi tí ani bira do halimu.

²¹Anduane Homogohanda wali agalime ko biyarunaga pani mule ibuni dalu dahuliya andaga wahalu dindini dalialu ibiragoni. Ani ibiragola wali agali bo wahenerunaga darama dindime mo do habe naheore wulebira. Wali agali ohowa homelo bo wahaga biyaru mo pana hai holebira.