Read Huli Aisaia 40 Bible Online

Aisaia 40 - Huli bible

Aisaia 40

¹Inanaga Ngode Datagaliwabehanda lalu, I̱naga wali agalirunaga bu miniha mo hongo habe. Ti gi holene mo embeda howa elahe helo helabe, laya.

²Yarusaleme wali agaliruhondo bi ogodagua lamilimu, Anduane Homogohanda lalu, Tígua ko bialu harimigonaga tandaga karulapeore nalu harimigoni. Tígua mana ko wiaru bialu harimigonaga mana lalu ai áyu ko birimiruni domo wahai hene kamigoni, laya.

³Mbiralime ga̱lalu, Dindi ko wali agali nahaga ngagoria Anduane Homogo ibilo hariga ba hole manda bialu halimu. Inanaga Ngode Datagaliwabe kago ibilo hariga tigabiore ba halimu.

⁴Dindi ulini hombene ngaru mo dondelai halu dindi hari emene timbunibi bibahende godogege biai halimu. Hariga pidipodabi ngago tigatiga wilo bo tiga bialu hariga ko ngago bayuwa mbaralalu mo tiga bilimu.

⁵Ani biragola ogoningi Anduane Homogonaga wá taraore holene hapani holebira. Wali agali dindi bibahendeha karume wá taraore holene ogoni de handai holebira. Bi ogoni Anduane Homogo ibunime aniore bulebero lalu lowini.

⁶Mbiralime ga̱lalu, Bi latagi ha, laya. I̱na ladai bialu lalu, I̱na bi ago latagi hoabe, laru. Bi biagome lalu, Bi ogodagua latagi habe, Wali agali bibahende karu datani minana anda hagadagua anda haga ka. Tinaga yári bulene ngaru palawaya lini ale nga.

⁷Anduane Homogohanda puyabu poboyogobi ibilarangi datani gaulalu palawayaru abaleore dogolopebe biaga ka. Ogonidagua dege wali agalibi heneneore tigi mbira hangu howa abaleore ereba haga.

⁸Datani gaulalu palawayaru abaleore dogolopebe biaga. Anigoyu inanaga Ngode Datagaliwabe ibunaga bi mana ngago dege wiaabo haga winigo nga, lalu latagi habe, lene.

⁹Yarusaleme-o í̱na hari nene ngarunaga irigi howa bi mana debene latagi habe. Saiono-o í̱na bi mana debene ogoni bi hongo howa ga̱ lalu latagi habe. Gi nahe howa latagi habe. Yuda dindiha tinaga tano maru ngaruhondo lamialu, Tínaga Ngode Datagaliwabe o ibiragonigo de handadaba labe.

¹⁰Anduane Homogo Bibahende Haru Haame Ho Haga kago ibugua ibuninaga hongo timbuni heba o ibiragonigo de handadaba. Agalime wai bialu ibunaga waitigiru bo podalu uruninaga dabudabu bayale ngaru mo yalu dai biagadagua ibugua ibunaga wali agaliru ibuni pele mialu haru dai biyaru heba ibiragoni.

¹¹Nogo sibi haru hagarume tinaga sibiru haru hagadagua ibuninaga wali agaliru baya hanguore haru holebira. Ibugua nogo sibi iginiru mo mogo buwa ibuninaga gime igini emene biaru minu yalu bialu angibuniru mandagi pelo baya hangu haru halu polebira.

¹²Agali mbiralime iba solowara bedago gi habeni hambu yai habehebe. Hari li ngago luni tubagila ogobiore nga lalu manda bibehebe. Mbiralime dindi bibahendenaga dindi abalu mo mogo bialu gabo beha mo gambirai habehebe. Mbiralime dindi haribi dindi hari hombene bare ngarubi uruninaga genda magi ogobi lalu manda bibehebe.

¹³Wali agali mbiralime Anduane Homogohondo ogo ale mbira bia lalu lamulene karulape kabe. Mbiralime ibuhondo ogodagua bibe lowa mbirale ibu biawai halubi bibehe ai kabe.

¹⁴Ibugua mana tigabi bayale ngaru bialu haabo helonaga pigane aiwa biawai henedabe. Ibunaga mini mandabi baya burugule ngaruni agohayagi howa minidabe. Uruni mbiralime biawai halu lawai henebi ndo ka.

¹⁵Anduane Homogo ibugua dindi tara tarani hameigini kamaruni hondowa ina emene koore kamane hendeda. Ina datani karunaga dadimba bedaru alebi kamane hendeda. Solowara hanuni dindi podene mbira wuape karunaga genda magi bame yabiabi be abalu ale dege mandabu ka.

¹⁶Lebanono dindi irabu timbuni ngagoha ema bialu piaga karu bibahendeore bai howa i̱nanaga Ngode Datagaliwabe ibuhondo lomabu delolene nakarulape ka. Irabu ogoni ira dewaore karubi bibahende dibai howa loma binirunaga dabuni delolene emene halu ndia holebira. Uruni bame nahabane dege ngagoni.

¹⁷Dindi bibahendeha hameigini tara tara bu karuni bibahendeore Anduane Homogo ibugua handalu karia uruni emeneore nahabane bu kane hendeda.

¹⁸Ngode Datagaliwabe ibuore ai ale manda bibehebe. Mbirale mbira ibu aleore agi ngabe.

¹⁹Ibu agali gime mbirale bi pupu wulenaga wabinigo ale ndo ka. Mbirale urunibi wabuwa bayale helo ngolo silibarume hira dambi henego ngago ogoni ale ndo ka.

²⁰Uruni bi pupu wulenaga wabule howa agali yagibano karume ngolo silibaru mibe nahe haga ka. Anigo ibugua ira hongohe giambe togo nabiaga kago dabalu dibaga. Ibugua dibalu bi pupu wulenaga ogoni ale wabiaga mandabi kago hai biaga. Uruni ale wabiaga kagome mbirale ibira howa gingirulobaga nabilonaga ibugua wabiaga kagohondo wabia ha laga ka.

²¹Ai tí manda nabiore kamibe. Mbiralime ti langiabi nabi halebi nahe dege kamibe. Piganengiore mbirale bibahende karubi ngarubi dindi ogo ogodagua bialu winida lowa bi te layanebi mbira hale naheore henedabe.

²²Uruni bibahende Anduane Homogo Kininaga biragane dagia hari daliga ngagoria biruwa ibunime uruni wabiai hene o bu ngaruni ndobe. Ibugua hari li kagoni mo yanga lowa ibunaga balai anda ale helaga ka. Ani biaga kagome ai wali agali dindini kamaru handa dali halu ina bame uburuli emene ale kamaria hendeda ndobe.

²³Anduane Homogo ibugua agali haguane karubi kini karubi bibahende hengedape howa ti mini lene ndo nagaloneore helaga ka.

²⁴Uruni ti tomo egene ale howa agalime áyu dege egene hengedagola dindiha pini nape wene ngaore dege Anduane Homogohanda puyabu poboyogobi ibilaragola egene abale gaulalu bame galone nabulene ngaligobi kagoni.

²⁵Anduane Homogohanda lalu, I̱ mini tigabiwi baya buruguleore kogonibi mendeali ai kabe. I̱ aleore mbira ai kabe, laragoni.

²⁶Tígua hariha handa daga halimu. Yakundi bu kane hendedamiruni aiwaore wabu helenedabe. Uruni Anduane Homogo ibunime wabini ndobe. Ti bibahendeore ibunaga wai biaga ami ale howa haru halu ibunime ti ogodagua ka lowa dagalai halu tinaga mini wiai halu manda biai ho kagoni. Ibunaga hongo timbuniore kagome ti mbirago mini nawi daga nalene yu wa naheore hai kagoni.

²⁷Yagaba waneigini Isaraele wali agaliru-o tí go̱mo̱go̱mo̱ lo kamigo agibe. Tígua lalu, Anduane Homogohanda inanaga genda yu kamaru nahendebi marume inahondo ko biragola ibugua ina biamogo nabi kagoni, lalu kami.

²⁸Ainde tí manda nabi kamibe. Halebi nahe dege kamibe. Anduane Homogo ibu tínaga Ngode Datagaliwabe haluhe kagoni. ibugua mbirale dindini ngarubi harini bu karubi bibahende wabiai henego ibuni hangu ka. Ibunaga hongo holene emene mbira ibira nahagaore ka. Mbiralime ibunaga mini ngaru handai habe naheore ka.

²⁹Anduane Homogohanda mbirali erekui halu hongo nahe ngo̱e̱le karu mo hongo howa helaga ka.

³⁰Igiri daliahe karuni tinaga tingini gedaore haga ka. Igiri hongohe karuninaga hongo biba halu ibira haga kagoni.

³¹Ai wali agali maru Anduane Homogohanda ti biamogo bilonaga mini mbiraore wuwa karu ti ibira nahe hongo haho wiaabo holebira. Ti ega hariawe ale babagane hongohe howa hari daligaore yagalagagobi ka. Tigua gerai layaguabi ha̱ nalolebira. Hariga luore piyaguabi pobe manga naholebira, lalu Aisaiahanda lene.