Read Huli Aisaia 43 Bible Online

Aisaia 43 - Huli bible

Aisaia 43

¹Isaraeleali Yagaba aguanene kamiru-o Anduane Homogohanda tí wabu helowa ibugua tíhondo bi ogodagua laragoni. I̱na tí pele ngialu haru dai bini kamigo gi nahalimu. Tí i̱nagaore dabo helowa i̱na tíninaga mini lalu olarugoni.

²Iba timbuni poragoria domalu pole domarimiyaguabi i̱ni tí heba holebero. Pialu kamiria ibame tí namu lai naholebira. Ira hongohe timbuniore dedagoha anda pirimiyagua nde iramebi tí nadolebira. Ira hungu biragome tí ela naholebira.

³Irane i̱ Anduane Homogo tínaga Ngode Datagaliwabe kogonigo Isaraele wali agalirunaga Ngode Datagaliwabe mini tigabiore kogome tínaga pele ngiaga kogoni. Ai tínaga waitigi karunaga giha kamingi Iyibiru Sudanaru Sebarubi urunime tí golope helo i̱na yolo bia dai bialu yupe harogoni.

⁴I̱na wali agali hameigini tara tara dindi bibahendeha karuni tí haru dai bulenaga yolo ale yupe harogoni. Urunidagua buleberogo irane tí i̱naga gubaliniore kamigonaga tí hameore lowa i̱na tínaga mini mo yaraga halu ani bulebero.

⁵I̱ tí heba haabo kogonigo gi nahe halimu. Tí damene bibahende maru ni tagira ibiragohayagi halu maru ni paliragohayagi pu giligalalo haruaruni i̱na ti haru dai biai holeberogo tígua gi nahalimu.

⁶Wali agali uyurahayagi karuhondo, I̱naga wali agali yupe halimu, lalu lamulebero. Unurahayagi karuhondobi, Tinaga dindi dai bilo yupe hadaba, lolebero. I̱naga wali agali maru kaundiaore amura dindi gimbuni ngaruha pu heaguabi uruni bibahendeore haru dai biai helo hame ledo.

⁷I̱naga wali agaliore bu kamiruni tí i̱na wabirugoni. Tígua i̱ninaga wali agali heneneore hapani kamigola wali agali maru karume tí de hondowa i̱naga mini yaraga helonaga ani biru, lalu Anduane Homogohanda lene.

⁸Anduane Homogohanda lalu, I̱naga wali agaliru olowa íbu ngoai hadaba. Tínaga de kagome de nahandaga ka. Tínaga hale kagome hale nahaga ka.

⁹Wali agali hameigini tara tara dindi bibahendeha karu godi deni íbu ngoai helo oladaba. Tinaga mbirale gime wabini ngarume bi henene mani bulebirarunaga ogodagua bulebira lalu mbiwia habehe ka aibe. Áyu bialu kagonaga ogodagua bulebira lalu mbirale gime wabini ngaru agome mbiwia hayabe. Ainde gime wabiniru mbirame abale ibuwa bi ogodagua layago henene tagira piya lalu wali agali ai í̱na loleberebe.

¹⁰Anigo Isaraele wali agaliru tí i̱na berogobi larogobi mo henene halu tigatiga lara lagane tí kami. I̱naga biabe biahaga halimulonaga tí dabarugoni. Ani birugo irane tígua i̱hondo mini mbiraore wialu tínaga Ngode Datagaliwabe i̱ hangu kogoni manda bilimulo ani dabaru. I̱ kogoria mani ho aribia holene mendeali naholebira. Ala henebi mani holenebi mbira naheore.

¹¹Anduane Homogo i̱ hanguore kogoni. Tínaga pele ngiaga i̱ore kogoni.

¹²I̱na abale tí biamogo bialu haru dai bulebero larudagua tí haru dai birugoni. I̱na ogoni birugonidagua mbirale gime wabiniru ngagome ani nabi i̱ni hanguoreme birugoni. Ani birugonaga Anduane Homogohanda ogodagua biya lalu i̱na biruruni latagi haga tí kamigoni.

¹³Áyubi horo bibahendengibi i̱ Ngode Datagaliwabeore haabo henego kogoni manibi nde haho wiaabo holebero. I̱na wali agali hameigini mbirago i̱naga gime yidogo mbiralime i̱naga hongo bope halu gingilo mia nabibehe ka. I̱na mbirale bialu kogobi mendealime ogo bibeheda lowa mo aribia naholebira, lalu Anduane Homogohanda lene.

¹⁴Isaraele wali agaliru tínaga Ngode Datagaliwabe ibu Anduane Homogoore howa tí pele ngiaga kagome ogodagua lalu, I̱naga wali agaliru tí pele ngulenaga ami agali tara hongohe karu Babilonoaliru baba wai bule pudaba lolebero. Wai biragola Babilono wali agali uruni ti tinaga iba sibini turu halu biraga biagoriani gi howa biralu tinaga dindi andaru yu wahalu ibida polebira.

¹⁵I̱niore Anduane Homogo kogoni. I̱ tínaga Ngode Datagaliwabe howa mana bayale tigabi ngaru biaga kogoni. I̱na Isaraele wali agaliru tí wabu helowa i̱ni tínaga Kini kogoni.

¹⁶Bambaore Anduane Homogo i̱ni kogome iba solowara timbuni bereago dombeneha hariga bope harugoni. Iba yaribu timbuni bialu bereagoha hariga ba harugoni.

¹⁷I̱na i̱naga waitigi hearunaga ami haru pialu nogo hosiru gili laga garo ale mini karisi wiaru yalu pialu hariga ogonidagua dege haruru talima ibalu hemiria kuni mibe nahe ibame naiore helarugoni. Agalime arumaha ira hungu pula hundia haragola abale tegelo mina hagadagua abaleore homai haya.

¹⁸Anigo áyu i̱na abale bima ibiruruni mitangi nabi embeda halimu. I̱na bamba bialu harugoni mitangi budai nabilimu.

¹⁹Mani i̱na gahenge mbira buleberogo tagira ibulebirago handalimu laro. Mbirale uruni áyu dege bia pani harago helowa tígua de handa nabiore kamigonibe. Dindi ko yobi mbirale anda nahaga ngaruha i̱na hariga ba halu iba dadabu anda halu pelolebero.

²⁰Ani berogola nogo gabua tara tara karume i̱ni mini lene ka lolebira. Biango dudu ale karubi ega yari ale karubi tigua i̱naga mini yaraga halu holebira. Ani bulebirago irane wali agali i̱ninaga dabo helene karume iba ogoni hambu nalu helonaga dindi ko iba naibaga ngagoha iba pelarogola anidagua bulebira.

²¹I̱naga wali agali helo lowa i̱nime dabarurume tigua turu timbuniore howa i̱ni mini leneore kagoni lalu ladagadaga bialu holebira, laya, lalu Aisaiahanda lene.

²²Anduane Homogohanda bi ogodagua laya. Yagabanaga aguanaliru-o tígua i̱ mitangi bialu lotu naleore harimigoni. Isaraele wali agaliru-o tígua i̱ handabe manga howa yu waore ho kamigo agileme mo bia hayabe.

²³Tígua mbirale lomabu delalu howa tínaga bu minime i̱naga mini yaraga nahe bameore bupebe bialu harimi. Tígua nogo sibiru i̱hondo bo loma bialu irani dai helonaga delalu howabi mbirale ira hagua ngabilo delaga mini inisenesi yolo buwa lomabu delalu howabi nogo barimirunaga habane abene dewaore i̱naga loma delalu howabi i̱ hewago manda buwa ogo ale bero lalu ndo bame bupebe bialu harimi. Irane i̱ tí mo erekui bia howa i̱naga widi liniru ira hagua ngabilo delaga aleru yalu loma bule ibalimu larugo ogonime tí mo manga haruyabe. Ani ndoyago. Tígua mana ko dewa bialu i̱hondo erembira ngeramigonaga i̱na genda yu howa manga timbuniore halu kogoni ndobe.

²⁵Ani birimi tiraga i̱ Anduane Homogo mini leneore tínaga Ngode Datagaliwabe kogo manda buwa tígua ko birimiru bibahende domo wahai harugo ai lone mitangi budai nabulebero.

²⁶Anigo tígua ko mbira nabi kamalo manda birimiyagua nde tígua i̱naga mini mo tiga bilimulo bi lami̱ya.

²⁷Tínaga mamali ala pigane henego ibugua ko binigo áyubi tínaga agali haguane karu tiguabi i̱naga bi mo wahalu kagoni.

²⁸Ani biyago i̱naga deni loma binigo mo miaga agali hearuni ti bibahende mo dodohe helaru. Yagaba aguanali Isaraele wali agali kamiruni bibahende i̱na tíha mo ko holene ngeledo. I̱na wali agali tara karume i̱naga wali agaliruhondo mege bialu oba helo heledo, laya, lalu Aisaiahanda lene.