Read Huli Aisaia 51 Bible Online

Aisaia 51 - Huli bible

Aisaia 51

¹Anduane Homogohanda bi ogodagua lalu, Wali agali maru tígua i̱naga mana tigabi talialu howa i̱na biamogo buliya hame lowa i̱ koria ibaga kamiru tí i̱na bi larogo hale halimu. Ani hale halu tínaga mamali aba ai̱ya Abarahama Sarala mandabu dai bilimu. Libu ege to̱le̱ ale hebigoha bo tombe laradagua bialu i̱na tí yaminigo. I̱na Abarahama olenedangi libu waneigini mbira nahe hearia olene. I̱na libu mo bayale halu libuhondo waneigini mirugoni. Libunaga waneigini aguaneneru dewaore halu ho dame bia hene.

³I̱ Anduane Homogo i̱na Yarusaleme tanoha ko hene ngaruni hondowa i̱na dara timbuniore howa biamogo bulebero. Áyu ibu dindi ko dalu naibaga yobi ngaligobi ngago mani i̱na ibu lone mo bayale halu dindi bayale benebere mo ngelalu mbirale bayaleru anda hai helolebero. I̱na Idene mabu bayale hangarugobi ngelolebero. Ani ngeledogola dindi ogoniha turuho holene wialu wali agali karume i̱ mini yaraga halu i̱nihondo ka̱i̱ lolene iba gana lalu holebira.

⁴I̱naga wali agali kamiru tí i̱na bi larogo hale halimu. I̱na hameigini tara tara dindi bibahendeni karu tini bayale helonaga bi mana lawai haruli. I̱naga bi mana bayale ngogome dindi uruni bibahendeha wá holene hale ale wá holebira.

⁵I̱naga pele ngulene abale hapara haragoni ndobe. I̱naga mana tigabi bulene kaware ibiragoni. Dindi tara tara ngaruha hameigini bibahende i̱ninaga hongome haru hai holebero. Wali agali dindi kaundiaha palima pedarume i̱na ti biamogo bule ibuliya tigua i̱hondo mini dunubiaho holebira.

⁶Tígua hari daligaha de handadaga halu dindihabi handape hadaba. Hari li ngagoni ginu hagua poradagua piai halu dindi ogo aga labolabo budabaga biradagua budabaga biai holebira. Ani biragola wali agali bame bunguna homaradagua homa paya bulebira. Ani bulebiragoyu i̱na pele ngulene i̱naga gini yalu eberogo ereba naholebira. I̱naga mana tigabi bulenego mo ko nahe bayale wiaaboore holebira.

⁷Wali agali mana tigabi ngago manda biaihe howa i̱naga bi mana lowini ngago hongo howa yu kamiru tígua i̱na bi larogo hale halimu. Wali agali maru karume tíhondo bi ko laragolabi mege biragolabi tí gi nahalimu.

⁸Uruni ti bomborume labolabo no budabaga bialu wahagadagua ereba holebira. Ani bulebiragoyu i̱na pele ngulene i̱naga gini yalu eberogo ereba naholebira. I̱naga mana tigabi bulenego mo ko nahe bayale wiaaboore holebira, lalu Anduane Homogohanda lene.

⁹Anduane Homogo-o í̱ heyalu ina biamogo bibe. Í̱na bamba í̱naga hongome mbirale gibi biridagua hongo ogoni degeme ina pele ngibe. Í̱nime dama puya timbuni iba solowaraha biraga mini Lahaba biago balu bo galibaga biri.

¹⁰Ani bialu wali agali í̱nime mo wialu biamogo biriru haru polenaga iba solowara timbuni bereago mo hundia halu dindi yobini pialu helo hariga pana helari.

¹¹Wali agali í̱nime gini mialu haru dai bini biaruni tini dalu Yarusaleme turu howa dai bulebiraore manda bido. Tigua dai bialu howa iba ganaru lalu bi hongo howa ladagadaga bialu dai bulebira. Dai buwa tinaga bu miniha genda tandagabi ereba hai halu tinaga turu holene wirago ereba nahe turuho haabo holebira.

¹²Anduane Homogohanda ogodagua lalu, I̱na tínaga bu miniha mo hongo halu genda yu kamiru mo waholene i̱niore kogonigo irane aginaga tígua agali maru bu karuhondo gi haramilibe. Uruni ti hongo naheore kagoni. Wali agali bibahende dataniru gaulalu abale ereba hai hagadagua ereba hai holebira ndobe.

¹³Anigo tínaga Anduane Homogo i̱niore tí wabini kogonigo tígua embeda ho kamibe. I̱nime hari daliga wabuwa yangalo helalu dindi ogonaga gene dindiha kagobi mo hongo howa heledogoni ndobe. I̱ ani kogodago irane aginaga tígua agali ko biaga karume tí mo ko halu bope holobada lowa gi ho kamibe. Agali urunime tíhondo mbirale mbira nabibehe kagoni. Ti keba bameore ho waharagoni.

¹⁴Wali agali garabaya pu karu ti abaleore golope holebira. Ti garabaya pu kagola homa nabulebira. Ti golope haragola tomo karulapeore nalu bayale holebira.

¹⁵I̱ Anduane Homogo tínaga Ngode Datagaliwabeore kogoni. I̱na iba solowara mo heya halu iba yaribu timbuni mo bia halu kulundugu timbuniore lelaga biaga kogoni. I̱naga mini Anduane Homogo Hongo Haiheore kogoni.

¹⁶I̱na tínaga ne harigaha howa i̱naga bi uruni latagi halu halimulo tíhondo langirugoni. Ani bialu i̱na tí i̱naga gihaore minu yado harugoni. I̱nime hari daliga wabuwa yangalo helalu dindi ogonaga gene dindiha kagobi mo hongo howa heledogoni. I̱na Yarusaleme wali agali bu karuhondo bi ogodagua laro. Tíore i̱ninaga wali agali kamigoni laro, lalu Anduane Homogohanda lene.

¹⁷Yarusaleme-o í̱ heya. Í̱ lone heyalu hongo hodai bia. Anduane Homogohanda ibunaga lembo holene waini iba gabo be mbira alego í̱ nabelo ngiyago no biba harigoni ndobe. Ani nowa í̱ luluyu ibagabu harigoni.

¹⁸Ani hegola í̱ gini yalu hariga tigabini haru ibagabu holenaga í̱ igini mbira naheya.

¹⁹Genda timbuniore í̱ heria ibira hayago í̱ dara howa bu miniha mo palia halu biamogo bulene mbira ai kabe. Waitigirume ibalu í̱naga dindi bo gialahole bialu haealabaga biyagoni. Wai biaga ayu tibume í̱naga wali agali bo wahaya. Ani bialu í̱naga wali agali bu hearu tiha hina gari timbuni tagira piya. Í̱ha genda ogoni wiyago mo wahalu biamogo bulene ai kabe.

²⁰Í̱naga wali agali ti bibahende hongo nahe howa ti de mborere biyagola ti dindini odo ibira halu hariga gibuni ngaruha palu wima peda. Ti nogo gabua gonoha daradagua bidagoni ndobe. Tigua mbirale mbira bibe nahe. Anduane Homogonaga lembo timbuni holenebi tínaga Ngode Datagaliwabenaga bi hongohe lolenebi gabo be wiagoha howa nelo hambu miyago tiha to̱lo ngagoni.

²¹Yarusaleme-o í̱ore genda dewaore yu howa walime lulu iba dewa nowa luluyu wiagagobiore ngegoni. Anigo í̱ waini iba nowa ndo luluyu nge. Anduane Homogonaga keba holeneme í̱ mo luluya henego ngegoni.

²²Anduane Homogo Bibahende Haru Haame Ho Haga kago í̱naga Ngode Datagaliwabe ibugua waitigiru baba wai bialu wayali habelo biamogo biaga kagoni. Ibunime í̱hondo bi ogodagua lara. Í̱ de handa. I̱naga keba holene gabo be í̱ giha yu howa nalu no luluyu harigo ogoni i̱nime yamirugoni. Maniorebi í̱na gabo be ogoniha howa nabelo lone nangulebero.

²³I̱na gabo be ogoni agali maru í̱ mo ko hole bialu karunaga giha mo ya holebero. Agali uruni tigua í̱ dindini mo pale lowa í̱ bo hengedalu tigua dindini ge halu poradagua bialu í̱naga erekunini ge halu ibaga bu hayaru tihondo mo ya helolebero, lalu Anduane Homogohanda lene.