Read Huli Aisaia 54 Bible Online

Aisaia 54 - Huli bible

Aisaia 54

¹Anduane Homogohanda lalu, Yarusaleme-o í̱ waneigini nahaga dalo wali ale birarigoni. Ai áyu one agalinila kirabali haabo howa waneigini hagadagua ndo í̱naga waneigini dewaore holebiragonaga í̱ turu howa ga̱ lalu iba gana ladaga halu holene nga.

²Í̱na dindi timbuni mbira tu wiape howa í̱naga balai anda ogoriani heledego mo yangalo helabe. Anda danginaga dariba haga pu nguni dariba haga bulene ibira helowa dindini pu nguni dariba haga bulene ira hongo howa wawa pu nguni biago hongo howaore dariba haga bulene nga.

³Ani buwa í̱naga dindi timbuni wu yangalalu ha amu nana bulene nga. Ani bulene irane í̱naga waneigini tigua dindi maru ngaru bibahendeha wali agali karu bope hai howa karulolebira. Ani bialu tigua tano áyu wali agali nahe o ngagoriani ti haame halu ho to̱lai holebira, laya.

⁴Yarusaleme-o í̱ha taga holene mbira nawulebirago gi nahabe. Agali bu karume í̱ lone mege nabulebira. Abale wandari hibaria biraringi taga harigo embeda halu agalini homene dalo wali biraradagua birarigobi embeda dege holebere.

⁵Í̱ Wabini i̱ kogome í̱ agalini haradagua holebero. I̱naga mini Anduane Homogo Hongo Haiheore kogoni. I̱ Isaraele wali agalirunaga Ngode Datagaliwabe mini tigabi baya burugule howa i̱na dindi bibahende ngaruni handayaho howa haru haame haga kogoni. I̱nioreme í̱ pele ngulebero.

⁶Isaraeleru-o í̱ wandari mabuage ayure dege agali penego agalinime yu wahalu piyagola mini burugulo biragadagua bedego. Ani bedegoyu Anduane Homogo i̱na í̱ olalu ogodagua laro.

⁷I̱na tigimandi hangu í̱ yu waharugoni howa áyu i̱ dara howa gubalini timbuniore kogome í̱ haru dai bulebero.

⁸Abale i̱na í̱hondo keba howa de handa tara ho haru. Anigoyu mani i̱na í̱ dara timbuni halu gubalini howa í̱hondo bayale dege biaabo holebero. Anduane Homogo í̱ pele ngiaga i̱niore kogome bi ogoni larogoni.

⁹Bamba Noa heangi i̱na habo nalolene bi mbira lo wialu lalu, I̱na dindi ogo ibame lone nanelolebero, larugo. Áyu nde í̱hondo lone keba naholebero lalu habo nalole lalu lo wero. I̱na í̱ mana lalu panibi lone nangulebero laro.

¹⁰Hari wedaru podo ibira hayaguabi hari barebare ngaru ereba hayaguabi i̱naga gubalini holene timbuni í̱ha ngogo embeda nahe wiaabo holebero. I̱na habo nalolene bi lalu í̱ha bayale hadapayabu habelonaga bi lo wirugoni habo nale wiaabo holebira. Anduane Homogo í̱ dara howa gubalini timbuniore haga i̱niore kogome bi ogoni larogoni.

¹¹Anduane Homogohanda bi ogodagua lalu, Yarusaleme-o í̱ darabiore halu tandagabi nalu burupale hengi wali agalime í̱ kegoria hapara howa biamogo bulene mbirali naheya. Aniyago ai i̱na ege to̱le̱ muni dewaoreme yolo biaga bayaleore ngarume í̱ lone biadai bulebero.

¹²Ege to̱le̱ bayale tara ngarume dindini howa bima iraga halu mamage haga anda daligaha bayale taraore bialu helolebero. I̱na ege to̱le̱ bayale ngiringarale ngaru muwa í̱naga tano pabe panga hongo timbuniorehe helalu pabebi ege to̱le̱ baya gibi tara tara ngarume bia holebero.

¹³Anduane Homogo i̱nioreme í̱naga waneiginiru lawai halu ti kagoha bayale holenebi mo palia holenebi wiaabo holebira.

¹⁴I̱naga mana bayale tigabiore ngagome í̱ mo hongo haabo holebero. Ani berogola mbiralime í̱ handape halu mo dindiha nahe howa í̱ha giho holene mbira nawulebira. Í̱ha gi holene ala winiru ereba hai holebira.

¹⁵Maru karume í̱ baba wai bule ibiyagua i̱na pu larugola ndo tini hameme ibini. Í̱ baba wai birarume ti bo ibira halu i̱na í̱naga giha mo ya holebero.

¹⁶I̱na agali maru ege to̱le̱ aeane ngarume mbirale tara tara ngaru wabilonaga wabu heledo. Tigua mbirale tara tara uruni wabialu howa ira hongohe poboyogobi dedagoha delowa do gedaore kagola duguwa dambu tiga bigi bialu wai biaga ayu tibu timu yandareru wabigi biaga ka. Ami agali wai biaga karu tibi i̱na dege wabini ka. Urunime tinaga waitigi bu karu baba wai bule howa mbirale wai biaga wabu wiyaruni mo yalu piaga ka.

¹⁷Anigo timu yandare uruni aria mbiraoremebi í̱ bila halu ba nabulebira. Í̱na heyalu hongo ho howa tigua í̱hondo, Í̱na ko ogoni biridago, lalu karuni ladai bigi bialu í̱naga bime ti mo dindiha helolebere. Mbirale urunidagua bigi biragola i̱naga biabe biahaga karu mo hongo howa i̱na ti mo wayaliore helaga bulebero, lalu Anduane Homogohanda bi ogoni laya, lalu Aisaiahanda lene.