Read Huli Aisaia 60 Bible Online

Aisaia 60 - Huli bible

Aisaia 60

¹Anduane Homogohanda lalu, Yarusaleme-o í̱ heyalu ni daradagua bialu wá hagimbu bia naberego. Áyu i̱ninaga hongo holenebi wá taraore holenebi í̱ha wá timbuni hadali haragoni.

²Dindi tara tara wiaruha ginu hagua mindibi wiarumebi aruma hagabu mindibi wiarumebi wali agali bu dambi haiho ngagoni ndobe. Anigoyu Anduane Homogo i̱ninaga wá taraore holeneme í̱ha hadali holebero. I̱na í̱ha haabo kogome i̱ninaga wá taraore holene ogoni wiaabo helo heledogoni.

³Í̱ha wá timbuni holene ogonime wá harago handalu dindi bibahendeha howa hameigini tara tara í̱ keria ibai holebira. Kini bu karu tiguabi í̱ha wá holene hongohe ogonime wá hadali haragoni handalu tibi nde í̱ keria íbu dege bulebira.

⁴Í̱na handa amu nana bialu o biragoni de handabe. Í̱naga wali agali biaru mo mogo bialu amu ibiraruni handa. Í̱ iginiru ti dindi kaundiaha howa ibalu í̱ waneru walime dindi taraha howa gime taba yalu í̱ni keria ibiragoni.

⁵Ani ibirago hondowa í̱ha bu mini yangalo turu holene to̱lai holebere. Í̱ kulalu turu taraore holebere. Iba sibi timbuni ibirarume dabudabu bayale dewaore mo yalu ibulebira. Dindi tara tara bibahendeha howa dabudabu baya gibiore ngaru í̱ mo turu holenaga mo yalu íbugu bialu ngigi bulebira.

⁶Nogo kamele dewaore daga aulolebe tobahe uruni ti Midiana dindibi Eba dindibi howa ibulebira. Urunime tinaga erekunini dabudabu bayaleore wiaru mo paga howa yalu ibulebira. Ti Seba dindi ala pialu ogoniha howa ngolobi ira hagua ngabilo delaga mini inisenesirubi mo yu ibulebira. Ani ibirago hondowa wali agali bu karume Anduane Homogo i̱na birugonaga lamialu i̱naga mini yaraga halu holebira.

⁷Nogo sibi dewaore Keda dindi howabi Nebaiodo dindi howabi haru halu ibulebira. Nogo sibi uruni i̱naga loma biniru bo delaga dabu ngagoria bo delaragola Anduane Homogo i̱ni turu timbuni holebero. Turu howa i̱naga anda biago mo yáribia halu mini lene bayale taraore ngelolebero.

⁸Iba sibi ibiraru hari beraliba puyabume pulo yalu ibagadagua ibiraruni agiledabe. Egarume alendo haragola andaga bululo yalu dai biagadaguabi ibiraruni agiledabe.

⁹Iba sibi dindi tara kaundiaha howa ibiraruni urunime i̱ hondo yalu ibalu i̱naga wali agaliru Yarusaleme í̱ni keria haru dai biragoni. Tigua ngolo silibaru dewaore iba sibi uruniha yalu ibiragoni. Ogonidagua yalu ibirago irane i̱na í̱ mo bayale halu mini leneore helewago hondowa tigua Anduane Homogo Isaraele wali agalinaga Ngode Datagaliwabe i̱ mini tigabi kogonigo i̱naga mini mo yaraga holenaga ani ibiragoni. I̱na dindi tara tarani hameigini bibahendeoreme i̱naga wali agali karu mini lene kagonida lelo mo la harugoni, laya.

¹⁰Anduane Homogohanda lalu, Yarusaleme-o dindi tara tarani agali karume í̱naga pabe lone biadai bule ibulebira. Tinaga kini bu karumebi nde í̱naga biabe bia holebira. Bamba i̱na í̱hondo keba howa mana lalu pani nabelo ngirugo. Ai áyu nde i̱na í̱ dara halu gubalini howa biamogo bule kogoni.

¹¹Dindi tara tarani hameiginirume tínaga muni dabudabu bayale ngaru í̱ mo turu halu bame ngule yalu ibilo horombe mbiragabi í̱naga tano pangaru dugua ho wiaabo holebira. Tinaga kini karubi í̱naga garabaya biabe ale biahaga helonaga haru halu íbu dege bulebira.

¹²Ani bulebiragoyu dindi tara maruha hameigini í̱ andaneha nahe í̱naga biabe biahaga ndo karu ti bibahendeha ko timbuniore ibalu mo ko haragola ti ereba hai holebira.

¹³Agalirume Yarusaleme í̱naga tanoha anda dewa lone biadai bulebulenaga uyu Lebanono irabu timbuni ngagoha puwa ira guraya alerubi ira mende mini saibarasarubi ira bayale luni kilikulu lo karunibi í̱naga dibu yalu ibulebira. I̱naga anda mo duniniore ho helarogo baya gibiore howa mini lene timbuni wulebira. I̱ninaga biragane dagia ngagoriani bedoria wali agalirume i̱naga mini yaraga hole ibulebira.

¹⁴Agali maru abale í̱ mo ko haga henerume í̱ keria ibalu bulu paluwa í̱ mini lene timbuniore lolebira. Ala agali í̱ mo yo hendene henerumebi í̱ keria dai buwa tinaga ge duli hanga ho biruwa í̱naga mini yaraga halu holebira. Tigua í̱ hondowa lalu, Tano ogoni Anduane Homogonaga ngagoni. Isaraele wali agalirunaga Ngode Datagaliwabe mini tigabi baya burugule kago ibunaga tano Saiono o ngagoni, lolebira.

¹⁵Yarusaleme í̱ore ala bame wialu yu wahene wirigo wali agali ogoriani pu íbubi nabiaga wahene wini. Ai áyu i̱na í̱ mo bayaleore howa mo yári bia halu í̱ duniniho ngeledogoni. Wali agali dindi tara tarani áyu karumebi mani holebirarumebi ti bibahendeme í̱ hondowa turu timbuni hai holebira. Í̱ni ani haho wiaabobo holebere.

¹⁶Dindi tara tarani hameigini karumebi kini karumebi waneigini ai̱yahanda ibunaga waneigini andu mialu handayaho hagadagua tigua í̱ burupale mbira nawilo handayaho haabo holebira. Anigo í̱na Anduane Homogo i̱ore kogome í̱naga pele ngiaga kogoni manda bulebere. Isaraele wali agali Yagabanaga aguanalirunaga Ngode Datagaliwabe hongo timbunihe kogome í̱ golope halu haru dai binigo kogoni manda bulebere.

¹⁷I̱na í̱naga ege to̱le̱ mini boronosi yu keruni ngolo aribia halu aeane yu keruni siliba aribia halu ngulebero. Í̱naga ira tome podene yu keruni i̱na ege to̱le̱ mini boronosi aribia halu ege to̱le̱ henene yu keruni aeane aribia helaga bulebero. Mo palia holene mo yu anda ibalu ogonime í̱ haru helowa mana bayale tigabi hangu bialu holeneme í̱naga hariga ibaga bialu poleneruha haru holebira. Agalime ala haru haga howa í̱ mo ko hayaru mani naholebira.

¹⁸Dindi bibahende í̱na haru kegoha agalime ga̱ lalu bo wahagahaga bialu bi laganego mani hale naholebere. Wai buwa mbirale ngaru bo gialahole bialu kariabi nahondolebere. Í̱naga wai pabe timbuni kagonaga mini Anduane Homogohanda Pele Ngiagane lolebere. Wai pabenaga panga timbuni kagonaga mini Anduane Homogonaga Mini Yaraga Hagane lolebere.

¹⁹Í̱ kegoha horombe nime wá holene henge nawulebira. Mbiragabi egeme wá holene henge nawulebira. Anduane Homogo i̱nime í̱naga wá haabo holene haluhe kogonigo i̱naga wá timbuni holene í̱ha wá haabobo holebero.

²⁰Ni lone napale egemebi dama dalidali biagadagua nabi Anduane Homogo i̱nime í̱naga wá haabo holene haluhe kogonigo nde ani haabo holebero. Í̱naga genda ngelo keruni bibahende ereba hai holebira.

²¹Í̱naga wali agali bu karume mana tigabi ngaru hangu biaabo halu tinaga dindi i̱na tu wa wia harugo karulowa ti ogoriani haabo holebira. I̱ninaga gioreme wali agali uruni mbiraore wabirugo ti ira mbiraore hangarugonaga gene magane dewaore haradagua ka. Ani helarudagoni irane wali agali tara tara karume ti hondowa i̱ninaga mini yaraga helo ani wabu helarugoni.

²²Yarusaleme-o í̱ha wali agali emene hangu heagua mani ti wali agali mini leneore holebira. Hameigini maru hongo nahe mini dindiha heaguabi mani ti waneigini aguaneru dewalinaga aba holebira. I̱na bi o larogoni abaleore horo i̱nime pongobo wirugo tagira ibirangi lola holebira. Anduane Homogo i̱niore kogonigo ani bulebira larogoni, Anduane Homogohanda laya, lalu Aisaiahanda lene.