Read Huli Aisaia 63 Bible Online

Aisaia 63 - Huli bible

Aisaia 63

¹Agali mbira yári kinirume biagadagua bialu Idomo dindinaga dindi emene Bosara ngagoha howa ibiragoni aidabe. Mbirali aga daramabiore karule hongo timbuni walia halu amu ibiragoni aidabe. Ogoni ibu Anduane Homogo ibiragoni ndodabe. Ibugua wali agali karu pele mialu haru dai bulene hongo karulape yu howa ibiragoni.

²Ibunaga aga daramabihe waini iba wabiaga be timbuni ngagoha anda pu howa waini iba wabulenaga pu mbira mini gerebi lini geme hengedaga bialu hene mbauleda, laya.

³Ani layagola Anduane Homogohanda ladai bialu lalu, Dindi tara tara bibahende wiaruni i̱na geme bame gerebi lini hengedo tagadabaga biagadagua birugola marume i̱ biamogo bule mbira naibiya. I̱na keba timbuniore ho howa dindi uruniha hameigini hearuni geme hengedo tagadabagabu waharugola uruninaga darama i̱naga agani wai haya, laya.

⁴Ibugua lalu, I̱naga wali agaliru pele mialu haru dai bulene horo biago abale hapara hayadagonaga áyu ogoni howa tinaga waitigi bu karuni pani nelo mialu baru.

⁵Ani balu hewagola agali mbirame i̱ biamogo bialu wai biba lama mbirali íbu nabiyagola mogolo handaru. Ani howa i̱ninaga keba timbuni harugome i̱ mo hongo hayagola i̱nime waitigi uruni bo wahai halu i̱naga wali agaliru haru dai biai haru.

⁶I̱na keba ho hewagobiore dindi tara tarani hameigini bu hearu bibahendeore bo hengedo tagadabagabu wahai harugoni. I̱naga keba holene gabo be yu hewagoha howa nelo mirugo nowa ti luluyu heagola i̱na tinaga holene daramaru dindini odo payabu ngeledo, laya.

⁷Anduane Homogohanda ibunaga dara holene timbuni wu howa mana bayale hangu biaga kago i̱na latagi holebero. Ibugua ina pele ngialu bayale dewaore biyagonaga i̱na ibunaga mini yaraga halu holebero. Ibunaga gubalini timbuniore holenemebi dara holenemebi ibugua Isaraele wali agaliruha paga ho howa mana bayaleore biyagoni.

⁸Anduane Homogo ibugua lalu, Wali agali uruni ti i̱naga wali agaliore kago tigua mine halu i̱hondo bi lalu ke̱ naholebira, laya. Ani lowa ibugua ti pele mialu haru dai biya.

⁹Wali agali ti genda tandagaru yu heangi Anduane Homogo ibunibi nde ti heba howa genda tandagaru yamaga ho haya. Anduane Homogo ibugua ibunaga wali agaliru dara howa bu miniha genda timbuniore howa ibunaga gubalini holeneme ti dara halu haru dai bini. Anduane Homogonaga dahuliyalime ndo ibunime ti hearia ibuwa pele mini. Bambaore howa ibunime ti taba yalu baya hangu handayaho hama ibini.

¹⁰Ibugua ani bialu heago helowa wali agali tigua ibu erembira miyagome ibunaga Dinini mo tandaga halu hene. Ani biyagola ibugua ti baba mo waitigi ho hene.

¹¹Ani biyagola nde tigua bamba bialu heneru mitangi bu dai bini. Ala bamba Anduane Homogonaga biabe biahaga Mosese henengi howa bialu heneyaru mitangi bu dai buwa tigua hale halu lalu, Anduane Homogo ibu áyu agoha haruabe. Bamba nde ibugua ibunaga wali agalirunaga agali haguane haru halu iba solowara mini Daramabi bereagoha domalu bayuwa haru pialu heneyago nde áyu ogoni ibu agoha kadabe. Ala nde Anduane Homogo ibugua ibunaga Dinini ti baba mandagi helo helenego agoha haruabe.

¹²Ibugua hongo timbuniore Mosesehondo mialu ibu bamba howa iba solowara timbuni bereago haluki bira li ni bilowa ibunaga wali agali iba ange mendehayagi ubaede halu piai helene. Ani binigome ibunaga mini yaraga halu ibu mini lene wiaabo hene.

¹³Iba ala berene hariga wiagoriani ibuni ala bamba halu pialu wali agali ti mama penego ibuni agoha kabe. Wali agalirume hongo howa nogo hosi gabuame gerai pururu lalu piagadagua ti abale pialu pi mbira nale bayale pene.

¹⁴Mbiralime nogo bulumagaru datani bayale dewa bu kagoha haru piagadagua Anduane Homogonaga Dinini ibugua wali agali uruni ti gi nahe bayale palelo mo wialu helene. Anduane Homogo-o í̱na biabe hongohe tara ogonidagua birigomebi í̱naga wali agali baya hangu haru halu pirigomebi wali agali maru karume í̱naga hongo holene ngegobi mini leneore kegobi manda biaiore holebira.

¹⁵Anduane Homogo-o í̱ í̱ninaga wá taraore holenebi hongo holenebi to̱laihe dahuliya andagani wu kegonigo í̱na ina kamaru de handa dali ho habe. Í̱na irane aginaga ina mitangi nabi í̱naga hongo holene timbuni wirigo mo heya halu ina nahende kebe. Í̱naga dara halu biamogo bulene wirigo inahondo mo walia nahe ina waore harigonida. Í̱na ina handa tara howa gubalini naheore kegonibe.

¹⁶Inanaga aba í̱ kegoni ndobe. Ina mamali Abarahama Yagaba imarume ina ai ima kamabe manda nabi henego ai í̱ ina abaore howa inanaga Anduane Homogoore í̱ kegoni. Bambaore howa ina heba haabo howa pele ngialu haru dai biagaore í̱ kegoni.

¹⁷Anduane Homogo-o irane aginaga ina lulu yu ibagabu holoma̱ya yu waho kebe. Iname í̱ erembira ngialu í̱naga andaneha haabo nahe holoma̱ya irane aginaga i̱nanaga bu miniha mo giambe ho ngeledebe. Ai í̱naga biabe biahaga kamaru mitangi halu ina í̱ninaga wali agaliore holoma̱ya dabariruni mitangi bialu ina kamagoha lone hole dai bibe.

¹⁸Emene tigimandi hanguni í̱naga wali agali kamarume anda í̱ninagaore lalu dabene biagoni inanaga giha yu harimagoni. Ai mani howa inanaga waitigi bu hearume ibalu í̱naga anda ogoni bo gialobaga bialu hengedo mbaraho wahayagoni.

¹⁹Bambaore howa ina í̱ninaga wali agaliore henego kamagoyu ai áyu í̱na handayaho nahe ina wali agali tara mbaule kamagoni mitangi bu kebe. Wali agali tara karu ti í̱naga mini lalu hene ndo kagoni.