Read Huli Loma Binigo 18 Bible Online

Loma Binigo 18 - Huli bible

Loma Binigo 18

¹Anduane Homogohanda Mosesehondo

²ibunaga bi Isaraele wali agali bu karuni lamibe lowa lalu, I̱ Anduane Homogo tínaga Ngode Datagaliwabe kogoni.

³Tí Iyibi dindiha hene ha kamigonigo Iyibialime mana biaga ngadagua tígua talialu bulene nawiore. Ani bialu áyu tí Kenana dindi haru poleberogo ogoniha howabi mana ti biaga ngagobi nabule dege laro.

⁴Tígua mana i̱naga ngerogo dege taluwa bialu halu ogoale bilimu lalu i̱nime langerogo dege bialu halimu. I̱ Anduane Homogo tínaga Ngode Datagaliwabe kogo i̱naga bi tíhondo langerogoni.

⁵Tígua mana i̱na hameledogo bialu haabo halu bi mana ogoale bilimu lalu lo ngogo talialu halimu. Tígua ogonidagua bialu harimiyagua nde bayale holeberemi. Anduane Homogo i̱niore kogo i̱na tí ogonidaguaore bilimu larogoni, lene.

⁶Anduane Homogo ibugua mana ogodagua bilimu lalu langiya. Wali agali tí damene darama mbiraore bedago kayu bulene nawi. Deme handaya howa dimagoli ha kayu biabi bulene nawiore.

⁷Í̱ ai̱yala mandagi kayu bu holene nawi. Anidagua biriyagua í̱na í̱ aba mo taga holebere. Ani buleberego í̱ ai̱ya bedago í̱na ibu í̱ ai̱yaore beda manda buwa ko ogoni nabilimu.

⁸Í̱ aba one mende bedago bababi nde kayu bulene nawi dege. Í̱na ogonidagua beregome í̱ aba mo tagaore timbuni holebere.

⁹Í̱ mbalini bedago í̱ aba ibu waneyaguabi ai̱ya ibu waneyaguabi uruni alego baba kayu bulene nawiore. Ai̱yahanda í̱ aba andagani taba heneneyaguabi anda mendeha taba heneneyaguabi ta nabi í̱ mbalini degego ti baba kayu nabilimu.

¹⁰Í̱ igini ibu wanebi í̱ wane ibu wanebi í̱ aguane ogoni bedagola kayu nabibe. Mana ogonibi beregome í̱ni mo taga holene wulebira.

¹¹Í̱ aba ibu yagini bedago baba kayu nabibe. Ogoni ibu í̱ aba waneore biralu í̱ mbalini bedago manda bibe.

¹²Í̱ aba ibu mbalini bedago baba kayu nabibe. Ogoni ibu í̱ abala darama yabulene beda.

¹³Í̱ ai̱ya hagibuni bedago baba kayu nabibe. Ogoni ibu í̱ ai̱yala darama yabulene beda.

¹⁴Í̱ aba hamene onela kayu nabibe. Ogoni ibu í̱ ai̱ya ale beda. Wali ogoni alego haru paliriyagua nde í̱ aba hamene kago ibuni taga timbuni holebira.

¹⁵Í̱ igini ibu one bedagola kayu nabibe. Ibu í̱ one ndo bedago ani nabibe.

¹⁶Í̱ hamene one í̱ kiane bedagola kayu nabibe. Wali ogonila mandagi paliribiyagua í̱ hamene kago ibu taga timbuni holebirago ani bulene nawiore.

¹⁷Wali mbira í̱ dabu berego wane ogoni í̱ yagini mbira bereagua í̱na ogoni í̱ kayu bulene nawi. Ani bialu í̱ one ibu igini kago wane bereagua ogonibi í̱ kayu bulene nawi. Ogoni irane wali uruni í̱ one ibu baba darama mbiraore ibu waneigini hangu ka. Í̱na uruni baba page biriyagua nde í̱na mana ko tagabiore wali tagini holene ngago mo pe holebere.

¹⁸Í̱ one berelowa ibu hagibuni bedago kayu bulene nawi. Í̱na libu mo keba holeberego mana ogoni bayale ndogo nabibe.

¹⁹Wali ege habolo bedagola kayu nabibe. Ogoningi ibu dodohe bedago nabibe.

²⁰Agali í̱naga nenege kago onela kayu nabibe. Anidagua biriyagua Anduane Homogonaga deni í̱ni mo ko hene dodoheore holebere.

²¹Baya hanguore hale hadaba. Tígua mbirale dama mitangi bialu bi pupu wule gime wabini mini Molegehondo tínaga waneigini lomabu mialu irani bo delolene nawi. Ani birimiyagua Anduane Homogo tínaga Ngode Datagaliwabe kagonaga mini mo dindiha halu holigo ani bulene nawi.

²²Tí wali baba mandagi paliagadagua agali dege dege mana ko ngubi ngago bulene nawiore. Mana ogoni ko ngubiore ngago i̱na tí ogonidagua bilimulo hame naleore kogoni.

²³Wali agalimebi nogo biango baba mana ko ngubi ngago bulene nawiore. Mana ogonibi bialu kamirume tíni mo ko holeberemi. Mana ogoni ko ngubiore ngago birimiyagua Anduane Homogonaga deni tí dodoheore holeberemi.

²⁴Mana ko urunialego mbira tígua bulene nawiore. Anidagua bialu harimiyagua tí Anduane Homogonaga deni tíni mo ko hene dodoheore holeberemi. Wali agali Anduane Homogo mitangi nabiaga Kenana dindiha hene karu tigua mana ko ngubi urunidagua bialu hayagome tini mo ko halu Anduane Homogonaga deni dodohe ka. Ani kago áyu dindi ogoni tígua karulo halimulonaga Anduane Homogo ibugua wene taliatagi halu ka.

²⁵Tigua mana ko binigome dindi ogoni mo ko hene dodohe ngeleda. Ani ngeledago Anduane Homogo ibugua dindi ogoni pani nelo miragola wali agali mana ko biaga uruni dindi ogonime ti magu taguiatagi halu balu purogo lelolebira.

²⁶Anigo tígua mana bayale Anduane Homogohanda langiyaruni baya hangu taluwa bialu halimu. Isaraeleali tíguabi wali agali tara tí baba hene kamirubi tí bibahendeme mana ko ngubi urunibi nabilimuore.

²⁷Dindi ogoriani wali agali ala heneyaru tigua mana ko ngubi uruni dege bialu haga heneyago tí manda bilimu. Ani bialu henegome dindi ogo mo ko henego ngagoni.

²⁸Tígua ogonidagua mbira bialu holigonaga laro. Tígua mana ko uruniale bialu harimiyagua nde wali agali Anduane Homogo mitangi nahaga ogoriani heneru dindi ogonime ti magu taguiatagi henedagua tíbi nde anidagua dege bulebira.

²⁹Isaraele wali agali bu kamiru aria mbirame mana ko uruniale bialu harimiyagua Anduane Homogonaga wali agali bu karu baba nahelo bo batagi holebira, lalu Mosesehanda lene.

³⁰Anduane Homogohanda ogodagua laya. Tígua i̱naga bi o langerogoni baya hanguore taluwa bialu haabo halimu. Tígua wali agali dindi ogoniha ala henerunaga mana ko ngubiore bini ngadagua bialu holemini de hondowa halimu. Ani bialu harimiyagua nde tínime i̱naga deni mo ko hene dodohe holigonaga nabilimu laro. Hale haramine. I̱ Anduane Homogo tínaga Ngode Datagaliwabe kogome laya, lalu Mosesehanda lene.