Read Huli Yaremaia 10 Bible Online

Yaremaia 10 - Huli bible

Yaremaia 10

¹Isaraele wali agaliru-o Anduane Homogohanda tíhondo bi larago hale hadaba.

²Ibugua lalu, Tígua wali agali tara tara bu karunaga mana ko ngago talialu nabilimu. Mbirale nahendene ale hari daligani birago hondowa wali agali marume gi haga ka. Tígua mbirale uruni birago hondowa gi nahalimu.

³Wali agali uruni tigua mana birago habane nabulene ngaru biaga ka. Tigua ayu mo yalu irabuha puwa ira mbira kago dibaga. Dibalu yu daibu ngagola mbirale irame wabiaga mandabi kagome ira ogonime agali ale wabu ngelaga ka.

⁴Ani wabu ngagola agali mandabime ngolo silibaru mo yalu ibuwa ogonime mbirale biago paraho dambi halu yári biaho ngelaga. Yári bia hai halu mbirale ogoni ibira holilono baya hangu dagia mbirani nilime bapara howa ngelaga.

⁵Dama mitangi bialu bi pupu wulenaga gime wabini ogonibi ngago nagalone bameore nga. Agalime tinaga mabuha egame tomo nolilono mbirali kabe toba halu ega ibida pelonaga agali ale mbira wabu helagagobi dege nga. Mbirale gime wabini urunime bi nalagabi tinime ge halu napiagabi ngagola agalime mo yalu piaga ndobe. Anigo dama mitangi bialu gime wabini ogoni alerume ko bayalebi mbira nabibehe dege nga. Ani ngago manda bialu tígua urunihondo gi holene nawi, lalu laya, lene.

⁶Anduane Homogo-o í̱ ale mende naheore. Í̱ni hangu hongo gibi daligaore ke. Í̱ mini timbuni lenebi hongohebi kegoni.

⁷Í̱ wali agali bibahende bu karunaga kini kego manda bialu wali agali bibahendeme í̱hondo gi hai halu í̱ andaneha hai holene nga. Dindi bibahendeha agali manda timbunibi mini gigabiwi karubi kini bu karubi ti bolangua hai howa í̱ daligaore ke. Mendeali í̱ kegobi nahe í̱niore kegoni.

⁸Agali uruni mini nawi ale lulu howa mana ko nagalone hangu bialu ka. Uruni tigua mbirale irame wabini ngagoha puwa agi manda bule piagayabe.

⁹Agalime Sebena dindiha howa siliba mo yu ibalu Ubasa dindiha howa ngolo mo yu ibalu ngolo siliba uruni mbirale wabiaga mandabi karuhondo mo miaga. Mo miragola tigua dama mitangi bialu bi pupu wulenaga mbirale irame wabuwa o biago ngolo siliba urunime daligani paraho dambi halu yári biaho ngelaga. Aga labolabo wabiaga kago tigua nde aga bayaleore daramabi tagalitaya alerume bu gombedagabi wabuwa mbirale wabu wini ngago mo karula haga biaga ka.

¹⁰Anigo Anduane Homogo í̱ Ngode Datagaliwabe heneneore kegoni. Í̱ Ngode Datagaliwabeore haluhe howa kini haabobo hole kegoni. Í̱na keba harengi dindi ngaru dumbirumbi bialu ema biaga nga. Í̱naga keba holene ogonime wali agali dindi tara tarani karunaga hongo mo pirilape haga ke.

¹¹Isaraeleali tígua wali agali Anduane Homogo manda nabi karu ogodagua lamilimu. Tínaga dama mitangi bialu mbirale bi pupu wulenaga gime wabini urunime dindibi haribi wabini ndoyago. Mbirale gime wabini dindini ngarubi hari li kago andaneha karubi uruni bibahende haealabagabu wahai howa mbira nawulebiraore lalu lamilimu, lene.

¹²Anduane Homogohanda ibunaga hongome dindi wabini. Ibunaga mini bayale gigabiwigome dindi bibahende wabialu hari daliga mo yangala halu daligaha karu bibahendebi wabini.

¹³Ibunime bi laragola hari kulukulu hongoheore lalu iba hariha bedagome u̱ timbuni laga. Dindi bibahendeha howa beraliba pobo tara tara iraga howa mo mogo bilaga. Ibugua iba dalu dindini ibilalu hari daba bilaga. Puyabu tara tara ibu andaha wia do ho winiru mo heya halu pulame helo pelaga.

¹⁴Ibugua ani birago hondowa wali agali karu ti lulu ale halu mini nawiore ho haga. Dama mitangi bialu mbirale ngolome wabiaga agali bu karu tibi nde mbirale tinime bialu kagonaga taga pani nolebira. Mbirale bi pupu wulenaga gime wabini uruniha galone mbira naheore. Uruniha buhe̱ lolenebi nawiore.

¹⁵Ti nagaloneore ngago hondowa wali agalime uruni mebia holene karulape nga. Anduane Homogo ibugua horo mbirungi ko bayalebi dabaki bule ibiragola dama mitangi bialu mbirale gime wabini uruni ti ko halu ereba hai holebira.

¹⁶Yagabanaga Ngode Datagaliwabe kago ibu urunibi ndo tara mende ale mbira kagoni. Mbirale ngaru karubi bibahende ibugua wabiai hene ka. Ibugua Isaraele wali agaliore ibunaga helo lowa daba bagiho helene ka. Ibunaga mini Anduane Homogo Hongo Haiheore kagoni.

¹⁷Yuda wali agaliru-o tínaga waitigirume Yarusaleme ho hagira bu yaanda hai hayada. Ani biyadago tígua tínaga dabudabu wirimidaru kabu biai halu yalu ibida pudaba.

¹⁸Anduane Homogohanda lalu, Horo ogoningi i̱na wali agali Yuda dindiha bu kamiru bibahende bo taliatagi hai holebero. I̱na tíha genda timbuniore anda ibilarogola tí mbirali yu wa nahe bibahende tandaga nai holeberemi. I̱ Anduane Homogo i̱na bi o ledogoniore, laragoni.

¹⁹Ani laragola Yuda tígua ogodagua loleberemi. Ainde ina darabi mo ko haragonida. Inanaga genda timbuniore dere ale bidago dabi habe nahe bidaligobi wu kamagonida. Genda uruni inahaore ibini ngago nde iname harugo lowa yu habehe kamagoni, loleberami.

²⁰Yarusalemeore bo gialahole bialu balai anda ko budubaga bini ngaligobiore ngagoni. Balai anda ogoni mo heya halu bulene mbirali naheore. Inanaga waneiginirume ina helalu piaiore halu erebaho wahene. Wali agali bibahende Yarusaleme wahalu piai haya, lalu loleberemi.

²¹I̱na ladai ogodagua. Agali haguane wali agali haru haga dindi ogoniha hagaru ti mini nawi ka. Tigua Anduane Homogohondo tinaga mini haru habe lalu bi nalamiaga ka. Ani bialu tigua biabe bayale mbira nabi hearia waitigirume wali agali dindi tara taraha bo purogo lai heleneya. Nogo sibi haru hagame baya hangu haru nahe karia biango dudume ibalu bo taliatogo laradagua biniya.

²²Hale hadaba. Agali mbirame bi abale yalu ibiya. Dindi abene uyurahayagi howa kilikulu timbuni laruagoni. Waitigiru tini dindi wahalu Yuda dindi tano bu ngaruniha wai bule ibarua. Tano uruni bo gialobaga biai haragola biango dudu bu karu ti dege haga wulebira.

²³Anduane Homogo-o ina wali agali bu kamarume inanenaga holene bayuwa haru habe naheore kama. Ina hariga polene ngagoria inaneme haru pobe nahe kamago manda bido.

²⁴Anduane Homogo-o í̱naga wali agali kamaru í̱nime mo tiga bibe. Í̱na keba howa mo tiga buleni nabibe. Keba howa ani biriyagua nde ina habe nahe holeberema.

²⁵Dindi tara taraha wali agali maru í̱ mitangi nabiaga karubi í̱ mini olalu í̱hondo bi nalaga karubi urunihondo í̱naga keba walia halu í̱na ti bo wahai holene karulape. Waitigi uruni tigua í̱naga wali agali Yagaba aguanene biaru bo wahai hayagoni ndobe. Tigua ina bo biba hai halu inanaga dindi andarubi mo ko halu bo labu hai haya.