Read Huli Yaremaia 38 Bible Online

Yaremaia 38 - Huli bible

Yaremaia 38

¹Yaremaiahanda wali agali bu hearuhondo bi ogodagua lalu hene. Anduane Homogohanda lalu, Wali agali tano ogoha kamiru bibahende homai holeberemi, laya. Tínaga waitigirume balu home layaguabi hina garime homarimiyaguabi warago ko tara tara ngarume homarimiyaguabi uruni mbira mbiragome homolene wulebirago ai tí bayale nahome hole hame larimiyagua nde Babilonoali amiru karia tagira pialu polene nga. Tagira pialu poramigola Babilono amirume tí abale minalu ba nabulebira. Anduane Homogohanda lalu, Tano ogo Babilono kini kagonaga amirume karulelo yupe holebero laya, lene. Ani layagola hale hene agali haguane uru. Madana igini Sebadaia Pasua igini Gedalaia Selemaia igini Yahugala Malagaia igini Pasua imaru agali mariali uruni ti hale hene.

⁴Agali haguane uruni tigua hale halu puwa kinihondo lalu, Yaremaia ibugua bi laragome ami agali tano mamage haga karunaga hongo bo podalu wali agali bibahende karunaga hongobi bo poda dege birago ibuni homolene nga. Agali ogoni ibugua wali agali bayale helo biamogo bulene hame nale howa bibahende homai helo hamelo kagoni, lalu kini lamini.

⁵Tigua anidagua layagola Kini Sedegaia ibugua ladai bialu lalu, Ogoni tíni hame ledamidagua bilimu. I̱na nabidababe lalu hapai naholebero, lene.

⁶Ani laya handala agali haguane biaru tigua Yaremaia iba biraga uli mbira wiagoha haru puwa pu luni mbirame Yaremaia minu hende howa iba uli biagoha yupe hene. Uli ogoniha iba nabere dindi waru dege wini. Yaremaia ibu iba biraga gundu uli ogoniha hearia ibunaga ge waru timbuni wiagoha namu lai hene. Uli ogoni kini igini Malagaia mbira henego ibunaga winigo ai ogoni kini ibunaga anda pabe tamuhayagi ami haguaneru haga wiagoha wini.

⁷Agali mbira Sudanali kininaga agali haguane dege mini Ebedemelege henego ibu hale halu hearia tigua Yaremaia iba uli ogoniha minupe ka layago hale hene. Horo ogoningi kini ibuni tanonaga pabe panga mini Beniyamininaga Panga laga winigoria wali agalinaga godi hale halu berene.

⁸Ani bereagola Ebedemelege ibugua kini andagaha howa tagira pialu kini berearia puwa lalu,

⁹Agali timbuni-o agali urunime Yaremaiahondo mana ko liaheore bialu iba uli ko wiagoha minupe harimiya. Ai ibu ogoniha ngelo waharimayagua ibu tomo naneore wialu homolobada. Ai tano ogoha tomo nawi biba hayadago í̱ manda bidegoni, lene.

¹⁰Kini ibugua bi ani layago hale howa Ebedemelegehondo lalu, Ai Yaremaia homoligo í̱na agali i̱ heba kamaruni aria pira tebira (30) haru halu puwa Yaremaia iba uli ogoniha howa dugu yamule pudaba, lene.

¹¹Ani laya handala Ebedemelege ibugua agali uruni haru halu kini andagaha hobane mbira dindiha henego ogoniha anda puwa labolabo haragaya wiaru mo yalu iba uli wiagoha Yaremaia berearia yalu pene. Mo yalu puwa pu mbirani dariba howa Yaremaia bereagoha bape hene.

¹²Bape halu howa Yaremaiahondo lamialu lalu, Labolabo uruni í̱naga adogeha ala mo yuwa pu luni bape harogo í̱naga gi adogeha magui habe. Iname í̱ pume hendeho yameramagola pume í̱ noligonaga ani bia, lene. Ani layagola Yaremaia ibugua Ebedemelegehanda bia layadagua biai hene.

¹³Ani biai heagola tigua Yaremaia iba uli wiagoha howa dugu yamialu kininaga anda pabe tamuhayagi ami agaliru ti haga wiagoha garabaya helo helaabo hene.

¹⁴Mani howa Sedegaiahanda, Yaremaia i̱ koria ibilo damu pudaba, lene. Damu puwa haru dai biyagola Anduane Homogonaga anda panga haraba tebone wiagoria Yaremaia ibu kini lola hene. Libuni hanguore biruwa kini ibugua Yaremaiahondo lalu, I̱na í̱hondo bi mbira hale hoa kogo í̱nabi nde yu donge nahe tigatigaore latagi habelo hameledo, lene.

¹⁵Ani layagola Yaremaiahanda ladai bialu lalu, Ai i̱na í̱hondo bi heneneorego langiruyagua í̱na i̱ homoliya bo waholebere. Ai í̱hondo mini maru bayale talebu ngialu bi langiruyagua nde i̱naga bi ogoni í̱na hale naholebere, lene.

¹⁶Ani layagola Kini Sedegaiahanda Yaremaiahondo lalu, Heneneore larogo Anduane Homogo haluhe kago ibuni wali agali bibahende bu kamarunaga holene tene howa ibuni daligaore kagonaga minini howa heneneore larogoni. I̱na í̱ bo wanaholebero. Agali ko í̱ mo ko holene karunaga gihabi mo ya nahole larogoni, lene.

¹⁷Ani layagola Yaremaiahanda Sedegaia lamialu lalu, Anduane Homogo Hongo Haiheore howa ina Isaraele wali agalinaga Ngode Datagaliwabe kago ibugua ogodagua laya. Í̱na wai biadai nabi wahalu í̱ni Babilononaga ami ibirarunaga giha ya hariyagua nde tigua í̱ ba nabi wahalu tanobi bo heda naholebira laya. Ani biragola í̱nibi í̱ one waneigini damenerubi bibahende homa nabi bayale holeberemi.

¹⁸Ai í̱ni Babilono amirume minilo wa nahariyagua i̱na tano ogo ti milo wahalu bo heda helo yupe holebero. Í̱nibi nde ti helalu yopialu napolebereore lalu, Anduane Homogohanda ani laya, lalu lamini.

¹⁹Ani layagola Sedegaiahanda Yaremaiahondo lalu, Ainde Babilono amirume Yudali maru ti bamba ibida puwa Babilonoha hene karunaga giha minu ya hayagua tigua i̱ mo ko holigonaga giho kogoni, lene.

²⁰Ani layagola Yaremaiahanda ladai bialu lalu, Babilono amiru tigua í̱ Yudaliruhondo minu mia nabulebira. Anduane Homogohanda i̱ha howa bi í̱hondo langirago bibahende í̱na hale halu buleneore nga. Ani biriyagua tigua í̱ homabelo bo wanahe bayale helolebira.

²¹Í̱ni Babilono amirume minilo wa nahariyagua ko uruni í̱ha ibulebiragonaga Anduane Homogohanda i̱hondo de gandebaha mo walia haya.

²²I̱na de gandeba ogoniha handalu hewaria wali kini andaga berene biaru bibahende Babilono dindiha haru puwa tigua ami haru haga agali haguane hearu migi biya. I̱na hale halu hewaria wali biarume agua layua, Kini Sedegaia-o í̱naga nenege biarume í̱ mo guya halu mo hondo hayago nahende tigua í̱hondo henene larabe toba harigoni. Áyu mo ko holeneme í̱la lola kagola í̱naga ge waru tabuha anda pialu namu lai hene ale kegoni. Ani hegola í̱naga nenege biarume í̱ yu wahalu ibida piai haya, layuago hale haru.

²³De gandeba handarudagoni hondowa manda bialu hewaria heneneore Babilono amirume ibalu í̱naga one waneigini bibahende ogonidagua bialu minu yalu piai holebira. Í̱ni yo pialu ibida polene henge nawulebira. Babilononaga kini kagome í̱ minu yania holebira. Anduane Homogonaga bi larago mo wahariyagua Babilono amirume tano ogo bo heda halu delolebiraore laro, lene.

²⁴Ani layagola Sedegaiahanda Yaremaiahondo ladai bialu lalu, Iya bi laribagoni mendeali nalamibe. Mbirali hale helo lamiriyagua í̱ni homolene wulebira.

²⁵Agali haguane bu karume iya bi lalu biraribago hondowa libu agi dege laribibe lalu í̱hondo hale halu lalu, Í̱na kinihondo agi laribe. Ina hale holoma̱ya bi ogoni yu donge nahe langi. Bi bibahende langiai hariyagua nde iname í̱ homabelo bo wa naholeberema, lalu lolebira. Tigua anidagua layagua nde

²⁶í̱na tihondo lamialu lalu, Mbira nalego bi mbira hangu kinihondo i̱ Yonadana andaga biagoha garabaya lone nahole lalu hale haru. Ogoniha lone garabaya dai bu haruyagua nde i̱ homoloboda lalu kini lamiru, labe lalu kini biagome Yaremaiahondo lamini.

²⁷Mani howa agali haguane biarume Yaremaia berearia ibuwa agi laribe lalu hale hene. Ani hale hayagola ibugua kinihanda labe layadagua ladai bini. Agali mbirame kini ibu Yaremaiala bi laribigo hale naheore. Ani biyagola agali haguane biarume Yaremaia homelo bolene hariga mbira nawiyagola tigua Yaremaia helo wahalu pene.

²⁸Ani biyagola Yaremaia ibu kini anda pabe tamuhayagi amiru haga wiagoha garabaya haabo heane dege tinaga waitigirume ibalu Yarusaleme karulene.