Read Huli Yaremaia 43 Bible Online

Yaremaia 43 - Huli bible

Yaremaia 43

¹Anduane Homogohanda Yaremaiahondo bi wali agali lamibe layaru bibahende latagi hene. Ibugua bi lai heagola

²Hosaia igini Asariabi Karea igini Yohananabi mine haga agali maru hearubi tigua Yaremaiahondo lalu, Í̱na bi ogoni ke̱ howa lare. Ina Iyibi napobe lalu Anduane Homogo inanaga Ngode Datagaliwabehanda lama pobe lalu í̱hondo langiyago ndo langiri, lene.

³Bi ogoni Neria igini Baruguhanda ina hengedape holenaga í̱ mo mini wia hayagola lama ibirida. Babilono amime ibalu ina bo waha Babilono garabaya bu yalu pu bigi bilonaga í̱na madane birida, lene.

⁴Tigua bi ogonidagua layagola Yohananabi agali haguane maru hearubi Yuda wali agali bu hearubi tigua Anduane Homogohanda bi layago wahalu ti Yuda dindini ha nabini.

⁵Yohananabi agali haguane biarubi tigua Yuda wali agali bu hearu haru halu pole pene. Ibu Yuda wali agali waneiginirubi bamba waitigime bo garabayabu yalu dindi tara taraha pu howa lone Yuda dindini daibu hene hearu bibahende haru halu pole pene. Ani bialu wali agali marubi Yudanaga kini wane berearubi Babilono ami haru haga haguane Nebusaradana ibugua Gedaliahanda handayaho habe lalu piyarubi heba Yuda wali agali bibahendebi Yaremaiabi Neria igini Barugubi

⁷ti bibahendeore Yohananahanda Anduane Homogonaga bi layago wahalu Iyibi dindiha haru pene. Ani pialu tigua Iyibi dindiha Tabanese tano wiagoria anda pene.

⁸Ti Tabanese tanoni pu hemigola Anduane Homogohanda Yaremaiahondo lalu,

⁹Iyibi kini kagonaga anda mbira tano ogoniha kago Yuda wali agali marume de hendedaore í̱na ege to̱le̱ maru dugu yuwa kini anda haneni timeni ngagoriani hangama pobe.

¹⁰Ani bialu howa Yuda wali agali karuhondo ogodagua labe. Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, I̱ Anduane Homogo i̱na agali i̱naga biabe biahaga Babilononaga Kini Nebugadenesa dindi ogoha ibilolebero. Ani ibilalu ege to̱le̱ o hangayagoria i̱na kininaga dagia mo ngelalu ibunaga balai anda biragome dindi ege to̱le̱ uruni dangila dambi holebira.

¹¹Ibugua Iyibi dindi bo haealabagabu wahole ibirangi i̱na wali agali maru tinde warago ko tara ngarume ti balu homelole dabo helenego waragome homolebira. Maru ti dindi mendeha garabaya pelo dabo helenego waitigime ti garabayabu yalu polebira. Maru ti waiha bo wahelo dabo helenego waime ti bo waholebira.

¹²Ani bialu i̱na Iyibi wali agalinaga dama anda bu karu bo heda holebero. Anda uruniha dama mitangi bialu bi pupu wulenaga gime wabini ogoniha ngaru Kini Nebugadenesahanda maru ibu daluha mo yu pialu maru iraha do taulo pelolebira. Ani bialu nogo sibi haru haga agalime nogo e ibunaga agani irigi harago minu bo wahai hagadagua ibugua Iyibi dindiha ngaru bibahende bo hilo wahaiore holebira. Anidagua bialu ibugua Iyibi bope halu wayali howa Iyibi dindi wahalu polebira.

¹³Nebugadenesa ibu Iyibi dindiha harangi howa ibugua Iyibi wali agalinaga nihondo bi pupu wulenaga ege to̱le̱ timbuni luni hengedago bo gingirulobagabu wahai halu Iyibi wali agalinaga bi pupu wule gime wabini ngarunaga anda bu karubi bo heda hai holebira, lalu Anduane Homogohanda laya lalu Yaremaiahanda lene.