Read Huli Dugu 2 Bible Online

Dugu 2 - Huli bible

Dugu 2

¹Anduane Homogohanda ibunaga keba holeneme Saiono tano ginu haguame bu dambi haradagua biyagola mo aruma hai helayago daraba. Bamba Yarusaleme tano Isaraele dindiha bayaleore mbira winigo áyu Anduane Homogohanda bope hayagola ai ko ngubiore ngagoni. Anduane Homogohanda ibunaga keba holene walia hayangi ibunaga andabi Yarusaleme tanoha heago mitangi nahe tano heba bo haealabaga bini.

²Anduane Homogohanda Isaraele dara nahe howa tinaga anda bu hearu bibahende bo gialo wahai helene. Ibugua Yuda tanoha wai pabe hongohe hearu bo gialabagabu wahene. Tanobi agali haguane ogoniha hearubi bibahende bope hai howa ibugua ti mo taga timbuni hene.

³Anduane Homogohanda lembo timbuniore howa Isaraelenaga hongo bo pirilapeore helene. Ti waitigi bu hearume wai bule ibiyagola ibugua ti biamogo nabi wahalu irame bo daradagua bilalu Isaraele wali agali bo wahaiore hene.

⁴Ibugua waitigime biradagua Yarusaleme bole timu edaho hene. Ibunaga hongome Yarusaleme wali agali turu haga hearu bo wahai hene. Ibunaga keba holene ira hungu ale bialu heagome Yarusaleme tano daiore helaya.

⁵Anduane Homogohanda ibu waitigi ale howa Isaraele wali agali bibahende bo homelai hene. Ibugua tinaga wai pabe bo haealabaga bialu anda hongohe bu helearubi bo gialabaga biya. Wali agali Yuda dindi bibahendeha bu hearu ibugua ti genda timbuni mo miyagola ti dugu timbuniore bialu hene.

⁶Agalime anda andira mbira bu helenego gialo wahagadagua Anduane Homogohanda ibunaga anda heago gialabagabu wahaya. Isaraele wali agalime ibu mitangi bialu lotu lole íbu ngoai haga anda heago gialo wahaya. Anidagua bialu Anduane Homogohanda horo timbuni tinaga mo ngoai haga wiarubi Sabada horongi bialu haga winigobi bibahende mo wahai howa ibunaga wali agali hearunaga horo timbuni uruni mo embeda hene. Anduane Homogohanda ibunaga keba holene ogonime kini hearubi loma binigo mo miaga bu hearubi tinaga biabe biaga wiarubi mo wahalu bo duguai hene.

⁷Anduane Homogohanda ibunaga lomabu delaga dabu biagobi ibunaga anda loma bia hene heagobi erembira mialu wahaya. Waitigime Yarusaleme tanonaga anda pabe hongohe wiarubi bo gialo wahelo ibilene. Ibilayagola Anduane Homogonaga anda biagoha anda puwa ala horo timbuningi wali agali íbu ngoai howa turu howa iba gana lagalaga bialu haga biagoha waitigime wayali howa bi hongo howa la dagaraga mambolo bagadagua balu hayua.

⁸Anduane Homogo ibugua Saiono tano bayale ngagonaga wai pabe bo gialo wahole manda bu hene. Ibugua wai pabe ogoni ogodagua bialuore gialo waholebero lo manda bu howa pabe gialo waholenego mogo nale howa gialo wahene. Ibugua mamage hagane anda lu bu heagobi tanonaga pabe bibahendeorebi mandagi bo gialo wahai heagola mo ko hene ngagoni.

⁹Tanoha wai pabenaga panga timbuni hearu bo gialapaya bialu panga bengena haga aeane timbuni helearuni gialo wahai haya. Uruni dindini gialapayabu wiagola ege to̱le̱ gingirulopaya bini wiarume wiadambi hayiya. Agali haguane bu hearubi kini ibunibi dindi tara wiagoha minu garabaya bu yalu piyiya. Anidagua biyagola loma binigo mo miaga hearu tigua Anduane Homogonaga bi mana lowini ngago lawai nahe wahalu Anduane Homogonaga bi mana latagi haga hearumebi de gandeba nahende heagola mbiwia halu latagi nahe hayiya.

¹⁰Saiononaga agali ala hene miniwi heneru tigua bi mbira nale bame dindini biru wima pedagoni. Tinaga haguaneni be abalu dugu wialu dara howa walia halu aga karulo bedagoni. Wandari Yarusaleme tanoha biraga berearume genda timbuni howa de handa dindi halu ma podope ho bedagoni.

¹¹Yarusaleme tanoha mbirale ko uruni biyago mitangi bialu i̱naga bu miniha genda howa dugu bia dege bialu hewaria de tandagame tongo ledogoni. I̱naga wali agali bu hearu darabi mo ko hai hene heago hondowa i̱naga bu miniha genda ho kogoni. Wandari igiribi waneigini galibi bu hearume tanonaga hariga teneni homo paya payabu wima peago hondowa i̱ mini burugu lo kogoni.

¹²Wandari igiri urunime hina garibilo howa ibabi noa halu ti ai̱ya olalu dugu dege bialu hearia handaru. Wai hamani wai bialu howa bo waharagola abale homabehe harigani wima piagadagua pialu waneigini biaru ti ai̱yahanda taba yamiyagola hendore ti ai̱ya giha homo ya haga biya.

¹³Yarusaleme-o i̱ dara timbuniore ho kogoni. Tano mendeha í̱na genda áyu yu kegonidagua mbira yu hearia handa nabi kogoni. Ainde í̱naga bu miniha dungulo habelonaga i̱na bi mbira ago loabe. Í̱na tandaga harego timbuniore iba solowara bira amu nana bidagobi ngagoni. Anigo nde mani í̱ aiwa mo bayale holobadabe.

¹⁴Í̱naga bi mana latagi haga agali hearume de gandeba handarima layago tigua ke̱ howa í̱ mo hondo hayada. Í̱ bayale habelonaga tigua í̱naga ko ngelo kego yu wahabelonaga mo walia nahayada. Ani nabi howa tigua Anduane Homogonaga bi larama lowa tininaga bi hangu layagome í̱ mo hondo hayagoni.

¹⁵Yarusaleme-o wali agali hariga ogoriani bolangua halu pugu birarume í̱ de handaragoni. Tigua í̱hondo ke̱ halu mogole tingi howa í̱ mege bialu lalu, Wali agalime tano dunini bayaleore mbira nga layago ogonidabe. Wali agali dindi bibahendeha bu karume tano ogo dege hamelai hagadabe, laga bialu kagoni ndobe.

¹⁶Í̱ waitigi bu karume í̱ hondo oba halu mege bialu howa lalu, Agaliore ina kamagoniyago ai iname Yarusalemeore bope harimagoni ndobe. Abale iname horo ogoni tagira ibilo maliaho harimago ai horo ogoni tagira ibiyadagoni de hendedama, laga kagoni.

¹⁷Anduane Homogohanda buleore lo mitangi bu henego áyu tagira ibiyagoni. Bamba Anduane Homogohanda lo wialu lalu, Isaraele wali agalirume i̱naga bi mo wahayagua i̱na ti dara nahe bo wahai holebero, lalu lowini. Anidagua lowinigo mitangi bialu áyu Anduane Homogohanda Yarusaleme í̱hondo ani biyadagoni. Ibugua í̱ waitigirume í̱ baba wai bule ibilo mo hongo halu ibilaya. Ibilayagola tigua wai bialu wayaliore howa í̱ hondo oba halu ti turu ho haya.

¹⁸Í̱naga wali agali bu karume ti biamogo bia lowa Anduane Homogo olalu ka. Yarusaleme-o mbiraga horombebi í̱na dugu hongo howa bialu í̱naga deha howa de iba pigipugu lalu iba hongohe poradagua pialu helo ha̱lo ha nabi dugu bialu haabo holene nga.

¹⁹Mbiraga í̱ paliahondo nahe howa heyigi bialu Anduane Homogo olalu ibuhondo bi laabo haga bibe. Bi lalu í̱naga genda ngelo keruni ibuhondo lamiai holene nga. Bi loleberedagoni irane í̱ waneiginiru hina garime hariga teneni homa a̱i̱na̱i̱ bidagonaga í̱naga gi yaraga halu dara howa biamogoore bia lalu bi lolene nga.

²⁰Yarusaleme tanome lalu, Anduane Homogo-o mbirale í̱ninaga waneiginiruhondo biridaruni áyu í̱ni handa. Waneigini ai̱yarume ti waneigini gubalini hagaore wiyaru ai tinaga tingini tini nalu kagoni de handa. Waitigi bu karume í̱naga andaha anda pialu í̱naga loma binigo mo miaga karubi bi mana latagi haga karubi bibahendeore bo wahai haragoni.

²¹I̱naga waneigini bu hearubi wali agali wahe bu hearubi uruninaga tingini i̱ninaga hariga teneni homo payapayabu wima pedagoni ndobe. Waitigime wandari igiri daliahe uruni bibahende bo wahai hayagola ani wima pedagoni. Anduane Homogo-o í̱na i̱naga wali agali uruni dara holene irane nawigo nde harugo lalu dara nahe howa í̱naga keba timbuni holene tagira ibiyangi ti bo wahai harigoni.

²²Í̱na keba timbuniore ho howa i̱ waitigi dindi bibahendeha bu hearu olomogo bialu i̱ bo gialabaga bialu mo labu helo ibilarigoni. Galoneore bulene horo timbuni tagira ibiragola wali agali dewaore íbu ngoai hagadagua í̱na waitigi dewaore íbu ngoai helarigoni. Í̱naga keba holene timbuni ogoni tagira ibiyangi waitigi ibiyarume wali agali bu hearu aria mbiraore hangubi mbira yu wanahe bibahendeore bo wahai hayagoni ndobe. I̱naga waneiginiru i̱nime ti gubalini timbuniore ho howa haru haruligo ainde waitigime ibalu bo wahai haya, lene.