Read Huli Dugu 3 Bible Online

Dugu 3 - Huli bible

Dugu 3

¹Anduane Homogohanda i̱hondo keba timbuni howa i̱ minu bayagola i̱na tandaga timbuniore nalu haru.

²Ibugua i̱ warape halu wá kagoha polilono ko arumaha puabo holiyanaga warape haya.

³Ibugua i̱ hanguore minu balu haabo kagoni. Horo bibahendengi anidagua biaabo halu kagoni.

⁴Ibugua i̱ baabo hayagome i̱naga kuni bibahende podabaga biai halu i̱naga tingini bibahende gedaore hai halu pirilabaga biai ka.

⁵Ibugua genda tandagabi tara tara mo ngidagome i̱ mo dariba henego kogoni.

⁶Ibugua i̱ abale halu homayarunibi dege bu hinu helalu arumaha i̱ ibagabu holiya heledagoni ndobe.

⁷Ibugua i̱ dariba ho heledagola golalu ibida pora bialu pobe naheore kogo. Ibugua i̱naga gi geru pu senime minu daribaho ngeledagola heyalu ibagabu holenebi nakarulapeore kogoni.

⁸I̱na Anduane Homogohondo i̱ biamogo bia lalu kogola ibugua i̱naga bi larogo hale nahaga kagoni ndobe.

⁹I̱ ibaga bialu porogohabi ibu hapai halu ibuni hai ka. Ibugua i̱ hariga poleberogoha ege to̱le̱ wia pai haradagua biragoni.

¹⁰Anduane Homogohanda biango handalehe timbuni mini beame nogo tara karu ibiragola bo nole ohowa harigani yu biragadagua budi gabua timbuni laionome mbirale bo nole nendebu hagadaguabi

¹¹i̱ harigani pialu hewaria ibugua i̱ minu balu hariga gibuniha gililo yalu pubagi howa i̱naga tingini budubaga buwa i̱ biamogo bulene mbira naheha ngelalu piya.

¹²Anduane Homogohanda i̱ timume bogole edaho haya.

¹³Ani edaho howa ibugua tegelape halu i̱naga gubalinini baya.

¹⁴Anidagua biyago hondowa i̱naga wali agali bu karume i̱ hondo oba halu mege bi lalu iba gana lalu ka.

¹⁵Ibugua i̱ genda dewaore mo ngidagome i̱ha wu to̱leda. I̱naga tomo nolenebi iba nolenebi kaubi ale dege ngiaga kagoni.

¹⁶Ibugua i̱naga dengui dindiha mo guya howa ma mo nigi biragola ege to̱le̱me i̱naga ne hondo biba haradagua bidagoni. Ani bidagome i̱ mo ko henego kogoni.

¹⁷Ainde i̱naga bu miniha mo palia howa turu ho holenego henge nawiore kogoni. Bayale holenenaga mana damene bibahende embeda hai harugoni.

¹⁸Anidagua bidogome manda bu handalu koria Anduane Homogohanda i̱hondo mbirale bayale ngulebiragonaga mini dunubia ho harugo ai mbira nangulebirada. Ani bialu i̱ dindi ogoria ho lu nabi abale homolobodane hendedo.

¹⁹Agalime dindi andabi ibuninagaore lenego mbira nahe bame hopebe dege biaga mbira kaligo ale i̱ harudane hendedo. I̱ha tandaga uruni damene mo ngirago nalu koria mbirale kaubi ngaligobi neha nalu kogoni ndobe.

²⁰Horo bibahendengi i̱na genda uruni mitangibu haabo kogome i̱naga bu miniha genda timbuniore ho kogoni.

²¹Anigo ai mende nde mitangi bu kogome mini dunu bia ho kogoni.

²²I̱na mende mitangi bidogo ogo. Anduane Homogohanda ina gubalini ho haabo haga kagoni. Ibugua ina dara howa biamogo biaabo holebira. Ibunaga mana ogoni ereba nahe wiaabo holebira.

²³Ibugua ina dara holene irane nawinigoyu ibunaga dara holene horo bibahendengi gahenge ibaho wiaabo haga kagoni. Anduane Homogo-o egerebagi bibahendengi ni tagira ibaabo hagadagua í̱naga dara holene inahondo walia haabo haga í̱ mini bilinahe kegoni.

²⁴I̱na mbirale ngarunaga mini dege dindiho nahe Anduane Homogo ibu hangu karulape kagoni lo mitangi bialu holenego bayaledane hendedo. Ani mitangi bidogo ai ibugua i̱ biamogo bilonaga i̱na mini dunu bia ho kogoni.

²⁵Wali agali tinime Anduane Homogo taya bialu ibunihondo mini dunu bia ho haga karu tihondo ibugua bayale biaga kagoni.

²⁶Anigo Anduane Homogohanda wali agali ti mo wialu pele milonaga tigua ema nabi hondo holene nga.

²⁷Ti wandari igiri daliahe wene kangi howa genda tandaga uruni yu hayagua nde karulapeore holebira.

²⁸Anduane Homogohanda mbiralihondo genda mo miyagua nde bi nale wahalu ibu pubagi howa ema nabi ibuni hangu holene nga.

²⁹Ani biragola Anduane Homogo ibugua ibu biamogo bulebira badago lowa ibuni mo dindiha howa ema nabi hondo holene nga.

³⁰Maru karume ibuhondo bi ko lalu minu bayaguabi nde harugo ani bilo ibu ema nabi holene nga.

³¹Anduane Homogohanda wali agali dara howa biamogo biaga kago ibugua ti erembira mu haabo naholebira.

³²Anigo Anduane Homogohanda wali agalihondo genda yilo mo muwa dege mani ibugua ti dara ho dai biaga. Ibugua wali agali gubalini timbuniore haabo haga kagome ani biaga ka.

³³Ibugua wali agali mbirago bame genda yuwa tandaga nalu helo mo ya holenego ibu hame nalaga ka.

³⁴Maru karume garabaya biabe biahaga bu karu bo hengedayaguabi Anduane Homogo ibu manda bu ka.

³⁵Mbiralime Anduane Homogo Daligaorene Daliga kagonaga deni bulene ngago mbira bialu karia ogoni nabilonaga mendealime hongo howa bope hayaguabi ibuni manda bu kagoni.

³⁶Mbiralime ibunaga nenege kagohondo ke̱ howa bameoreni godi laba layaguabi mbirale mana uruniale damenego hondowa Anduane Homogo ibu manda biai howa turu nahaga ka.

³⁷Mbirale bibahende ngaru íbu ha lalu ái ibugua bi laragola hale halu íbu hai habehebe. Anduane Homogo ibugua hangu ogoni lolene karulapeore kagoni.

³⁸Anduane Homogo Daligaorene Daliga kago ibugua bi laragola mbirale ko holene bayale holenebi bibahende tagira ibaga.

³⁹Wali agalime ko biyagonaga pani nayagua nde bi gomogomo lolene henge nawigo aginaga lolebe.

⁴⁰Iname mana bialu harimaru manda bialu dabolene nga. Dabalu mana ko bialu harimaru yu wahalu Anduane Homogo ibuni karia dai bulene nga.

⁴¹Iname gi dogola daga halu bu miniha mbira do nahe howa Ngode Datagaliwabe dahuliya andaga kagohondo bi lalu,

⁴²Anduane Homogo-o iname í̱hondo mine halu mana ko dewa bialu harimago í̱na ko ogoni domo wa nahe kegoni.

⁴³Í̱na inaore talima ibaga bialu bo homa hai harigoni. Í̱na inahondo keba timbuniore harigome í̱naga dara holene mo yi harigoni.

⁴⁴Í̱na inahondo lembo timbuni ho howa inanaga bi hale naholenaga hale hangaiho kegoni. Í̱ hari beralibame kabu bupe haradagua bu kegola inanaga bi laramago í̱ keria anda naibagabe tobaheda.

⁴⁵Í̱na ina bopeore ho heledegome wali agali dindi tara tarani bu karume handalu karia ina wali agali ko habane nabulene dodohe kamaria hondo kagoni ndobe.

⁴⁶Ina waitigi bu karuni bibahendeme ina yo handalu mo nagaloneore halu ka.

⁴⁷Mbirale tara tara tagira ibirarume ina mo gi timbuni halu ina mo pila haga bialu kagome mo ko heneore kamagoni.

⁴⁸I̱naga wali agali burupale darabi bu karuni hondowa ina dugu bialu i̱naga de iba pugu lalu iba pora biradagua pigipugu lalu kogoni.

⁴⁹I̱na dugu berogoni haru biru lalu wa naholebero. I̱naga de iba pugu lalu pialu haabo holebira.

⁵⁰Anduane Homogo ibunime dahuliya andagaha howa handa dali halu i̱ dugu bialu haabo koria dege de handaragola dugu nabi waholebero.

⁵¹I̱naga tanoha wali bedaru tiha mo ko holene bu ngaru dege ngola halu biraabo kagonaga de hondowa i̱naga bu miniha tandaga timbuniore nalu kogoni.

⁵²Agali maru karume i̱la mo waitigi halu i̱ bameore bo wahole hene. Agalime ega bole taliagadagua i̱ bo wahole talima ibaga bini.

⁵³Tigua i̱ gundu uliha minu bape howa i̱ homelo bole lowa ege to̱le̱ dugualu uli biagoha ba pebe biya.

⁵⁴Ibame i̱ namu lai hole biyagola ai i̱ homalu ereba harogonida mitangi biru.

⁵⁵Ani biyagola i̱na gundu uliha howa Anduane Homogo í̱ olarugoni. I̱na humbirini andagaha haradagua buwa í̱naga mini lalu i̱ gini mialu biamogo bia laru.

⁵⁶I̱na í̱hondo ogodagua bia lalu olarugola Anduane Homogo-o í̱naore nde hale hariya.

⁵⁷Hale howa í̱na i̱ hewaria kaware ibuwa i̱hondo lalu, Gi nahe habe, lalu langirigoni.

⁵⁸Anduane Homogo-o í̱na i̱ pele ngialu i̱ waitigi bu hearume i̱ nabelo hapai harigoni. Í̱na i̱ pele ngirigola áyu i̱ bayale kogoni.

⁵⁹Anduane Homogo-o agali i̱ mo ko hole bialu hayaruni í̱ manda bidegoni. Anigo i̱ waitigi uruni bope halu i̱ wayali holiya biamogo bibe.

⁶⁰I̱ baba waitigiore ho karunime i̱hondo keba haga kago í̱ manda bu kegoni. Tigua i̱hondo mana ko ngaru bule manda manda bialu kagoni ndobe.

⁶¹Urunime i̱ hondo oba halu mege biyago í̱ hale harigoni. Anduane Homogo-o tigua i̱hondo bule manda birago í̱ manda biai ho kegoni.

⁶²Horo bibahendengi tigua i̱ mini lalu bo waholenaga bi lala bialu hariga taya bialu kagoni.

⁶³Tigua heyu howabi ha̱lo biruwabi iba gana i̱ bo waholenenaga mege bi hangu lalu laabo halu ka.

⁶⁴Anduane Homogo-o tigua mana ko o biyaruni handalu í̱na ti pani nelo mibe.

⁶⁵Tinaga mini mo luluya halu ti koorene ko helo ha habe.

⁶⁶Ti mbiraoreli hangubi mbira dindini yu wa nahelo í̱na keba timbuniore howa talima ibaga bialu bo wahai habe, laro.