Read Huli Dugu 5 Bible Online

Dugu 5 - Huli bible

Dugu 5

¹Anduane Homogo-o genda tara ina kamaria tagira ibiyago mitangi bialu í̱na dara habe. Wali agali hameigini tara karunaga deni ina ko nakarulape habane nabulene kamagonigo de handa.

²Inanaga dindi andarubi agali tara karu tigua karulo aribia ho kagoni.

³Ina aba waitigirume bo wahai hayagola ina waneigini hono wahene ale halu ina ai̱yaru wali dalo bedagoni.

⁴Ala ira gabunibi iba nolenebi minana miagane winigo áyu iname ira bolenebi iba hambulebi yolo bulene hangu ngagonida.

⁵Waitigirume ina nogo dongi kamelerunaga biruyu ibaga biagadagua biyagola ina erekui taraore handalu kamagoni. Tigua ina ha̱lo biruluma̱yabi henge nangiagaore.

⁶Ina tomo nolene nawi buru paleoreyagola nahome holoma̱ya ina Iyibiali Asirialirumebi biamogo bilo lowa hale harima.

⁷Inanaga mamalirume ko bialu tini homeagola ai iname tigua ko biyagonaga genda yu kamagoni.

⁸Babilononaga garabaya biabe ale biahagane bu karume ina handayaho halu tinaga giha howa ina pele ngialu haru dai bulene agali mbira naheda.

⁹Agali homelo bo wahaga biaruni inanaga dindiha wai taya ibagabu haame howa ina tomo taya bu poramagola bo wahole yu biraga.

¹⁰Ina hina garibi timbuniore lalu tingini ngo̱e lowa warago baradagua biaga. Garibi dege lalu inanaga tingini poboyogo bu yolo mialu ege to̱le̱ kundibi ale haga.

¹¹Hari Saiono weagoria waitigime ina one berearuni ti kayu yai halu Yuda tanoruha ina wane biru wiarubi kayu ya dege biya.

¹²Tigua ko taraore bialu inanaga agali haguane hearuni bame gini minu daba howa gerelaho ngelaya. Inanaga agali wahe miniwi hearubi yo handalu mo taga haga biya.

¹³Inanaga igiri daliahe hearu garabaya biabe ale bialu widi lini dambiaga helalu igiri emene hearuni ira gendabiore timbuni wiaru mo ya haga bialu helaya.

¹⁴Agali haguaneru tanonaga pabe haraba ngagoriani nabiraga. Wandari igiri daliahe karumebi ngida balu iba gana lalu nahaga.

¹⁵Inanaga turu holene winigo ereba hai hayagola iname iba gana lalu mali leremaliru dara holene íbu aribia hayada.

¹⁶Mbirale ina mo turu haga winigo damene ereba hai hayada. Inane ko birimagome ina darabiore kamagoni.

¹⁷Hari Saiono bo gialabaga biyagola biango duduru hangu hagane bu hinayada. Ogonidagua bidago hondowa ina dugu biaabo haramagome inanaga gubalini mo ko halu de tandaga biarua.

¹⁹Anigoyu Anduane Homogo í̱ kini haabobo halu handame ho haabo holebere.

²⁰Ina aginaga erembira ngialu yu wahowa haabo kebe. Ina lone angi mitangi buleberebe.

²¹Anduane Homogo-o ina haru dai bia. Ina haru dai bialu mini yaraga holene ala wiagane biagobi wia dai bila.

²²Be ina yu wahalu handabe manga halu erembira ngiaabo holeberebe. Í̱naga keba holenego maro bulene nawialu nawioredabe.