Read Huli Esegiele 16 Bible Online

Esegiele 16 - Huli bible

Esegiele 16

¹Anduane Homogohanda i̱hondo laabo halu lalu,

²Dindiali-o í̱na puwa Yarusaleme ibu mana ko ngaru bialu hayarunaga lamialu bi hongo howa lamibe.

³Anduane Homogo Bibahende Haru Haame Ho Haga kogo i̱na Yarusalemehondo bi larogo ogodagua lamibe. Yarusaleme í̱ore wali ko aba ai̱yala mana ko biaga wane biragagobi í̱ ngegoni. Í̱ aba ibu Amoroali halu í̱ ai̱ya ibu Hidi wali berene. Í̱ni Kenana dindi howa taba henenego ngegoni.

⁴Í̱ ai̱yahanda taba hanayangi í̱naga lumbipu napode helene. Í̱ ibame wayawaya balu doma nabi wahalu tinginini marasiniru ibimebi ha̱i̱ nahe wahalu agame mo kabu nabi ngelo wahalu biniya.

⁵Mbiralime í̱ dara halu o larogoni damenego mbira nabiore winiya. Í̱ taba hanayangi howa tigua í̱ gubalini naheore howa bameore taniha hono wahalu piyaya.

⁶I̱ hariga ibalu handalu hewaria í̱ ona wiaria handa walia haru. Í̱ áyu dege ai̱yahanda hono wahalu pene darama bagabi ema bialu wiria handaru. I̱na í̱ homabelo hame nale howa i̱na lalu,

⁷Í̱ore homa nabi bayale anda halu mbirale eganeru bayale taraore anda hagadagua í̱ anda halu timbu luni halu wandari bayaore birabelo handayaho howa biamogo biru. Ani biwagola wandari mabuage halu andu ibalu mandari bayale anda ho birari. Ani bira biruwa dege aga mbira nabi í̱ ti babe biraabo harigoni.

⁸Ai i̱ dai buwa handalu hewaria í̱ agali pobehe berego handaru. Ani berego hondowa i̱naga aga tohe dagarenaga biaga mbirame í̱ ti babe berego bia dambi helaru. Ani buwa i̱na í̱la habo nalolene bi mbira lo wialu í̱ i̱ one birabelo dabu buliya lalu lo wiru, lalu Anduane Homogo Bibahende Haru Haame Ho Haga kago ibugua bi ogoni lene.

⁹Ibugua lalu, I̱na í̱ha darama heago ibame waya waya bo wahalu ira olibe lini ibane baya wiago yuwa í̱naga tingini ha̱i̱ haru.

¹⁰Ani buwa aga bayale tara gime yári bialu wabu wiagobi í̱naga ge su nogo dongone bayaleme wabini wiagobi mo karula haru. I̱na í̱ mo yári bia halu aga bayaleme í̱naga emboneni heda ale wialu í̱naga aga luni bayaleore wiwago mo ngialu biru.

¹¹Ani bialu yári bulene tara tara wiaru mo ngiaiore haru. Gi pagida gurubu geleme bene mo ngialu ma gagua wiarubi mo ngiru.

¹²Ani bialu nguira dolenebi hale ira dolenebi mo ngiai halu biru. Ani buwa kuini walinaga manda baya tara wiagobi í̱naga haguaneni mo karula halu biru.

¹³Ani birugola í̱ni yári bulene ngolobi silibabi dewaore wuwa í̱naga aga baya taraore pu bayale mbirame wabinigoria yári tara tararuhe wirigobi i̱na dege mo ngiru. Ani bialu tomo nabelo mberedi balawa bayalerume wabini wiarubi mone taranaga ibane dendebiorebi ira olibe lini ibanebi í̱ tomo uruni nalu birabelo ngiai harugome í̱ wandari baya taraore mbira biruwa kuini wali birarigoni.

¹⁴Ani bereria wali agali dindi bibahendeha hearume hale halu hearia í̱ wandari baya taraore mbira beda lene birari. I̱nime í̱ mo yári bia harugome ani birarigoni lalu Anduane Homogo Bibahende Haru Haame Ho Haga kago ibugua bi ogoni lene.

¹⁵Ani birugola í̱na mitangi bialu heria i̱ bayaleore ani berene bedolo mitangi bu bedegoni. Ani mitangi bu bedegola agali bu karume í̱ore hame laiho kagoni. Ani kagola í̱ nde baya tingi howa mine halu agali í̱ bederia ibiraru baba tanabi kayu yu paliai hariya.

¹⁶Ani bialu howa í̱naga aga bayale wiriruni mo yalu puwa mbirale dama mitangi bialu bi pupu wiaga gime wabini ngaru mo yári bia hari. Anidagua birigome agali maru ta nabi hearu ti í̱ni baba kayu yu palue dindi ogoniha ibilonaga ndole bialu harigo mana ogoni ko ngubiore bialu bayanda wali harigoni.

¹⁷Ani bialu muni ngolo silibaru í̱ni yári bibelo ngirugo mo yalu puwa ogonime mbirale dama agali ka mitangi bialu wabu helowa ogonila mana ko wiaru bialu birari.

¹⁸Ani buwa i̱na í̱ aga yári tarahe mo karula harugo mo yalu puwa mbirale dama agali ka mitangi bialu bi pupu wule wabu helene biago aga uruni mo karula hari. Ira olibe lini ibanebi ira hagua nga bilo delaga inisenesiru i̱na ngirugobi mo yalu puwa mbirale gime wabini urunihondo bi pupu wialu lomabu delole piri.

¹⁹I̱na í̱ tomo bayaleru nalu birabelonaga balawa bayalerubi olibe lini ibanerubi mone taranaga ibanebi ngirugoni. Ai tomo uruni mo yalu puwa í̱ni mo turu helonaga mbirale dama mitangi bialu gime wabini wiarunaga lomabu mule mo yalu piriya, lalu Anduane Homogo Bibahende Haru Haame Ho Haga kagome bi ogoni lene.

²⁰Anidagua bialu iyanaga waneigini hono wiribaru haru halu puwa mbirale dama mitangi bialu gime wabini wiaruhondo bi pupu wialu bo lomabu mule pugu birigoni. Wali agali kayu yulenego mana ko ngubiore ngago í̱ni manda birigo buwa í̱naga bu miniha ogonime nakarulape degedagola í̱ni mo ko timbuniore holenego garibilo bedegoni.

²¹Ai mana ko ngubiore ogoni bialu birulene hamelo biruwa i̱naga waneiginiru bu hearubi mbirale dama mitangi bialu gime wabini wiaruhondo bi pupu wialu bo lomabu delai harigoni.

²²Í̱ galiore hono wahene burupaleore ona wiria i̱na ogodagua mo mondo bialu hene lalu í̱ni langirugo hale howa nahalehe tingi halu puwa agali kayu yama ibaga bialu mana ko ngubiore ngarubi bialu biraabo haga bedegoni. Horo i̱na í̱ handa walia harudangi í̱ daramame dohego ona ema bialu wiria handa walia haru lalu langirugo mitangi nabi dege bedebe, lene.

²³Anduane Homogo Bibahende Haru Haame Ho Haga kagome laabo halu lalu, Í̱ keria mo ko holene ibulebira laro. Í̱na mana koorene ko uruni biai halu

²⁴hariga tene wiaruha pialu mbirale dama mitangi bialu gime wabiniruhondo bi pupu wulenaga anda bu helowa anda uruniha wali agali kayu yu paliaga bule bu helarigoni.

²⁵Í̱nime i̱ wali bayaore bedogonida lowa í̱na agali í̱ bedegoria pu bolangua hole poraru olalu íbu laga bialu í̱nila kayu yu paliaga biruwa í̱ha mana ko ogoni bulene bolanguaheore bedegoni.

²⁶Iyibiali tiha mana ko bulene miniha didi halu bolanguahe kaware hearu tigua ibalu í̱nila kayu yu palelo hadape ho bedegoni ndobe. Í̱na i̱ mo keba holenaga agali kayu yama ibaga bialu biraabo kegoni.

²⁷Abale í̱na ani dege bialu berenego ai i̱na í̱naga mbirale bayale damene i̱nime ngini yu bereru bibahendeore mo wahai haru. Ani bialu Pilidialirume í̱ hame nale halu í̱naga mana ko bialu biraga wirunibi handabe manga timbuni haga karu tigua í̱ mo ko helo i̱na ti ibilarugoni.

²⁸Agali í̱ baba kayu yu paliaga biaruni bibahendeme í̱naga hame wigo nakarulape degeyagola ainde Asiriali hearu baba kayu biri. Ani bialu bereria Asirialiru tiguabi í̱naga hame biba nahe dege.

²⁹Ani dege wigola ai Babilonoali agali biyinaya biaga hearu baba kayu biaga wali í̱ore birarigoni. Ani bialu heriabi í̱naga hame wigo biba nahe dege wiaabo ho nga.

³⁰Anigo Anduane Homogo Bibahende Haru Haame Ho Haga kogo i̱na í̱hondo bi mbira langero. Í̱na mana ko uruni dege bialu biraabo kegome ai mana ko ogoni bulenego í̱ bayanda wali taga nahaga elaheore bedegoni.

³¹Hariga tene wiaru bibahendeha mbirale dama mitangi bialu bi pupu wiaga wiaruhondo bi pupu wulebi wali agali kayu yu paluenebi anda dewaore bu helama pede. Ani bialu í̱ bayanda wali maru bedarubi ndo bede. Marume agali kayu biragome muni mbiraleru migi birago mo yagago í̱na ogonidagua agali kayu yalu howa tihondo muni mbiraleru ngi lalu mo yulene hame nale bede.

³²Í̱ walime ibu agalini gubalini nahe yu wahalu puwa agali tara bu karu baba kayu yama ibaga bialu biragagobiore bede.

³³Bayanda wali bibahende bedarume tinaga yolo mirago mo yaga beda. Anigo í̱ ogonidagua nabiaga biruwa agali dindi bibahendeha bu karume í̱ baba kayu yu palue ibilonaga í̱na ti mo turu halu mbirale bayaleru bame mo miriliya.

³⁴Í̱ agali mbirame mo bayanda wali berelayagola berene ndo í̱ taraore bede. I̱nimeore biraro lalu mbira ani bedane nahendene ale tara mbira í̱ biruwa agali kayu yaregonaga yolo mo ya nabiaga biruwabi agalime í̱ kayu bilonaga í̱nime agali yolo biaga bedegoni. Heneneore bayanda wali nahendene ale taraore mbira í̱ bedegoni, lalu Anduane Homogohanda lene.

³⁵Anduane Homogohanda laabo halu lalu, Bayanda wali Yarusaleme-o i̱na bi larogo baya hangu hale habe.

³⁶Anduane Homogo Bibahende Haru Haame Ho Haga kogo i̱na bi ogodagua laro. Í̱ninaga aga golo wahalu í̱ni tingini agali í̱ dimagoli haga bu hearuha ya edede bima ibaga bialu birariya. Í̱na mana ko ngubi uruni bialu biruwa mbirale dama mitangi bialu gime wabini wiaruhondo bi pupu wialu í̱ni ti mirigoni. Ani buwa í̱naga waneiginirubi balu dama mitangi bialu gime wabini urunihondo bo lomabu mirigoni.

³⁷Ai í̱naga agali nenege uruni bibahende í̱na gubalini ho henebi maru hame nale hearubi bibahende mo mogo bialu í̱ni bedegoria ho mabu bule ibilolebero. Ani ibilalu ti í̱ bederia ho mabu bu helalu tinaga deni howa í̱naga aga bibahende golo wahai harogola aga nabiore bame ti babe holebere.

³⁸Í̱na dabu binigo mana pugualubi wali agali dewaliore homelo bo wahai harigonibi uruni bialu harigonaga i̱na í̱hondo keba timbuniore halu í̱ manani íbu helowa dabaki halu ko bialu haridagonaga í̱ homabelo bo waholebero.

³⁹Í̱naga agali nenege uruni tigua í̱ mo ko holebira. Tigua í̱na dama mitangi bialu mbirale gime wabiniruhondo bi pupu wulenaga anda í̱ agali kayu yu paliaga bu helariruni bibahendeoreme bo gialo wahai holebira. Ani bialu tigua í̱naga aga bayale bu bederubi ma gagua wu bederubi gi pagidarubi í̱na yári bu bederuni bibahende minu golo wahaiore haragola í̱na lone mo karulolene mbira nawi ti babe ona birulebere.

⁴⁰Í̱naga agali nenege uruni tigua wali agali bu karuhondo ndelo miragola tigua í̱ ege to̱le̱me balu wai biaga ayu tibume dibalu í̱naga tingini poda bagabu waholebira.

⁴¹Ani buwa tigua í̱naga anda bu helederu bibahende bo heda hai haragola wali dewaore biru ngarume í̱ha mbirale o bulubadaruni hondolebira. Í̱na mana urunidagua bialu agali bu karu í̱ andagaha í̱la yu paliaga bilo ndole bialu mbirale mbirale tihondo mialu ala birilidagua lone nabibelo i̱na yupe naholebero.

⁴²Anidagua berogome i̱na keba ala harugo mo ereba halu i̱naga bu miniha mo palia halu i̱naga keba holenebi henge lolenebi lone nawulebira.

⁴³I̱na í̱ wandari mabuage berengi howa biamogo bialu handayaho hama ibirugo í̱na uruni birugo mo embeda halu mana ko dewaore bialu biraabo harigoni. Anidagua birigome í̱na i̱ mo keba hari. Anigo í̱na mana ko timbuniore bialu harirunaga pani nabelo ngirugoni. Í̱na mana ko dewaore uruni dege ndo í̱na agali bu hearu baba kayu yu palima ibaga bialu harigome biatago harigo aginaga biribe, lalu Anduane Homogo Bibahende Haru Haame Ho Haga kagome lene.

⁴⁴Anduane Homogohanda laabo halu lalu, Yarusaleme-o wali agali mani holebiraru tigua í̱ mo ko hene ngago de hondowa, Wandari ibu ai̱yanaga mana hangu talialu biraga o bedagoni, lolebira.

⁴⁵Heneneore í̱naga mana berego handalu karia í̱ ai̱ya hagirume bialu biraga ngagobi dege bialu bederia hendedogoni. Í̱ ai̱ya ibu agalini waneiginirubi hame nalaga berene. Í̱ hagibunirume ti agalini waneiginirubi handabe manga ho biragadagua í̱ bedegoni. Í̱ ai̱ya ibu Hidi wali biralu í̱ aba ibu Amoroali halu binigo libu wane í̱ bedegoni.

⁴⁶Dindi abene uyurayagi Samaria tano ngagoni ibu í̱ hagibuni wahene nga. Tano emene maru wu mabu bidaru ti ibu waneru ale nga. Ani bialu dindi abene unurayagi Sodomo tano ibu í̱ hagibuni heyogone ale wialu tano emeneru ti ibu waneru ale nga.

⁴⁷Abale í̱ hagibuni kira ogonilabo libugua mana ko ngaru hangu bialu biraabo hagadagua í̱nabi nde ogoni talialu birida. Anigo ai í̱naga mana ko biaga ngegome í̱naga hame wigo biba nahayagola í̱na mana ko timbuniore ngaru abaleore lone biatago halu í̱ hagibuni ogoni labome bialu berene ngarubi nira dege lowa bu bolangua harida.

⁴⁸I̱ Anduane Homogo Bibahende Haru Haame Ho Haga kogo i̱na Ngode Datagaliwabe haluhe heneneore kogobi í̱hondo bi heneneore ogodagua laro. Í̱ hagibuni Sodomo halu ibu waneiginirume mana ko áyu í̱ni heba í̱ waneiginirume bialu bedamigonidagua ndo bialu berene.

⁴⁹Ibunibi ibu waneiginirubi ti tomo dewa karulape nalu howabi ti wai nabi bayale biragabi henegoyu tigua mine halu maru hearu mbirale nawi tubagiho hearia handayaho nahagabi mbirale mia nabiagabi hene.

⁵⁰Tinaga miniha giambe howa mine tara haga hene. Tigua mbirale i̱na hame nalaga wiaru bialu haga hene. Tigua mana ko uruni bialu heago hondowa i̱na ti bo wahai harugo í̱ manda bu ke.

⁵¹Samaria ibuguabi nde mana ko dewaore áyu í̱na bialu bedarunidagua nabiaga hene. Ai mana ko í̱na bialu bederuni ko ngubiore í̱ hagibuniru tigua bialu hayago bolangua howa bialu bedegoni ndobe. Mana ko í̱na bini í̱ hagibuniru tigua binirubi mo mandabu handalu keria í̱na binigo ko timbuni ngubiore bialu tigua biniru bame degedane hondolebere.

⁵²Ai í̱na mana ko damene bini ngeru baba í̱ hagibuniru tigua bini ngaru baba mo manda bu handalu koria í̱ha ko timbuniore í̱ hagibuniru tiha ko mbira nawi beda labehedane hendedogoni. Anigo í̱na birirunaga taga timbuniho birulene nga. Í̱nime mana ko tagabi wiaru bialu birarirunaga pani áyu noleberego í̱ni miniha genda yuwa tagaho birabe, lene.

⁵³Anduane Homogohanda laabo halu lalu, Yarusaleme-o áyu í̱ hagibuni kirali Sodomo Samariala libu waneiginiru heba bibahende mo ko hai hene ngagoni. Anigo mani i̱na libu lone mo bayale holebero. I̱na í̱bi mo bayale dege helarogola tí haru mandagi bayale holeberemi.

⁵⁴Ani howa í̱nime mana ko bialu birarirunaga taga halu birulebere. Ani bedego hondowa í̱ hagibuni kirali biagolabo libunaga ko genda wiyaru bame degedane hondolebira.

⁵⁵I̱na libubi libunaga waneiginirubi biamogo berogola ti bayale abale haraligobi lone hadai bulebira. Í̱nibi í̱ waneiginirubi tínde abale bayale haramiligobi dege lone hadai buleberemi.

⁵⁶Abale í̱ wali bayale bedobe toba howa mine ho biralu í̱na Sodomo ibu wali ko bedago mitangi bialu oba ho birarigoni.

⁵⁷Í̱ ani mine ho berengi mana ko í̱na bialu wiriru mo pani nahe birari. Ai mana ko bialu birarigo uruni pani ho ngagola í̱na Sodomohondo oba haridagua wali agali maru bu karume í̱ de hondowa oba halu ka. Idomo wali bedarubi Pilidia wali bedarubi wali maru kaware bedarubi tigua í̱ wali ko ngubi mbira o bedagoni lowa hondo mege bialu beda.

⁵⁸Ani biragola í̱na mana ko bialu agali kayu yama ibaga bialu birarigonagabi mana ko maru bialu birarigonagabi taga pani nalu genda yu birabelo mo ngulebero, lalu Anduane Homogohanda bi ogoni lene.

⁵⁹Anduane Homogo Bibahende Haru Haame Ho Haga kagome laabo halu lalu, Yarusaleme-o i̱na í̱hondo bi mende langule yidogo. Abale í̱ wandari mabuage berengi i̱naga habo nalolene bi mbira í̱la lo wirugoni. Anigo bi ogoni lo wirugo í̱na mo nagalone halu puguarigoni. Anidagua birigonaga i̱na í̱hondo mana ko í̱ni birigonaga pani nabelo karulapeore ngulebero.

⁶⁰Ani bialu ala í̱ boga nabi wandari hibaria berengi i̱na í̱la habo nalolene bi lo wirugoni embeda nahe bulebero larudagua biaiore holebero. I̱na habo nalolene bi gahenge í̱la lo werogola bi ogoni wiaaboboore wulebira.

⁶¹Ani bialu í̱ hagibuni wahene heyogonebi kirabali ogoni labo í̱ni bedegoha haru daibu berelarogola í̱ni wane aleore bu hinu birulebere. Bi áyu larogoni habo nalolene bi lo wirugoha nale winigo ai i̱ninaga hameme ani bulebero. I̱na ani berongi í̱na mana ko bialu birariruni mitangi bu dai buwa í̱ni taga timbuni halu birulebere.

⁶²I̱na habo nalolenenaga bi gahenge lo wia aribia harogola í̱na i̱ Anduane Homogoore henedane hondolebere.

⁶³Ani hondo bedegola i̱na í̱naga mana ko bialu birariruni bibahende mo embeda halu wahai holebero. Ani berongi í̱na í̱nime mana ko biaga wirigo mitangi bu dai bialu taga timbuni howa bi lolene mbira labe nahe bi biba hene birulebere. Anduane Homogo Bibahende Haru Haame Ho Haga kogo i̱na bi ogoni larugoni, lene.