Read Huli Esegiele 19 Bible Online

Esegiele 19 - Huli bible

Esegiele 19

¹Anduane Homogo ibugua i̱hondo lalu, Isaraele kinibi Yuda kinibi libunaga dugu daraore bia halu iba gana ogobi labe, laya.

²Í̱ ai̱ya ibu gabua laiono timbuniore hene. Ibugua laiono wangabe dewa bu hearu ti dege dombeneha howa ibu iginiru bayuwa handayaho hayagola ti bayale anda hai haya.

³Ibu igini mbiraore wangabe timbuni anda hayagola ibugua igini ogoni nogo tara tara gabua taya helo biawai haya. Ibu laiono hongoheore howa agalibi bo nagane helo biawai haya.

⁴Hameigini tara tara dindi tarani bu hearume laiono ogonime mana biaga ngago hale hai haya. Tigua ibalu laiononaga gundu uli tombo wiyagola laiono uli ogoniha pilaya. Tigua ibu ne harigaha wena langame helowa Iyibi dindiha gililo yalu piya.

⁵Ai̱yahanda ibu igini dai bilo maliaho biraabo heagola igini biago dai nabiya. Dai nabiya handala ibu igini dege mende heago ibu laiono dalua bayale dege helo dabo helene.

⁶Laiono igini ogoni andaho heagola ibu laiono maru hearu baba mandagi ibaga bu haya. Ibugua nogo tara tararu bolene mana bu manda bialu howa nogo gabua tara tara taya bialu agalibi bo nagane dege hene.

⁷Ibugua tinaga wai pabe anda hongohe hearubi tano wiarubi bo gialo wahai haga bialu hene. Ibugua bi hongo howa layagola wali agali bibahende hearume gi hai haga hene.

⁸Hameigini tara tara dindi tara wiaruha howa laiono ogoni baba wai bule íbu ngoai hene. Tigua gono wiago mo tigabu ngelo howa gonoha dayagola hadene.

⁹Tigua ibu wena langame hende howa mbogoyi mbiraha minu berelowa Babilono kini hearia yalu pene. Ibu pora bialu tagira napelo ibu garabaya anda hongohe wiagoha helo helene. Wali agali Isaraele dindi hari ngaruha hearume ibunaga bi hongo howa laruane lone hale nahelo ani bini.

¹⁰Kini ogonilabo libu ai̱ya ibu pu mbira lini daga mini gerebi iba angeni hengene mbira haraligobi bereneya. Pu gerebi ogoni iba bayale bereagoria hengenego timbuni anda howa gene maganeni yuni dewahe gerebi linibi dewaore deneya.

¹¹Pu gerebi ogoninaga gene magane hongoheore halu kininaga halimbu hongohe ngaligobi haya. Irane ogoni luniore halu hari beraliba ela habehe haya. Ibu luniore halu magane yunibi timbuni dewaorebi heago bibahende hearume de handai hene.

¹²Pu gerebi ogonibi heagola agali bu hearume keba howa irane ogoni minu dugualu dindini bape haya. Tigua ani biyagola ni tagira ibiragohayagi howa puyabu poboyogobi ibiyagome gerebi lini deago bibahende yogo bialu gaulai haya. Agali urunime ira magane hearu dandape hai halu magane bibahende irani delai haya.

¹³Mani tigua pu gerebi ogoni dugu yalu puwa dindi ko yobini iba nabiraga wiagoha hangaya.

¹⁴Ogoninaga teneha howa ira datagi halu gene magane yuni linibi irame dai haya. Ibunaga magane bayale mbira hongohe ndo howa kininaga halimbu wabibehe mbira naheneya. Bi ogoni dugu daraore binigo tigua iba gana lalu haabo haga winigo nga.