Read Huli Esegiele 2 Bible Online

Esegiele 2 - Huli bible

Esegiele 2

¹I̱na uruni hondowa i̱ ge duli hanga howa ma podalu dindini bulu paliru. Ani wiwaria mbiralinaga bime i̱ olowa lalu, Dindiali-o í̱la bi lole kogo heya, layuago hale haru.

²Ai bi layuagome leaore dege Ngode Datagaliwabenaga Dinini ibugua i̱ha karula howa i̱ abale mo heya haya. Ani heyu howa ibugua bi lone layuago hale halu hewaria ogodagua layua.

³Dindiali-o í̱na áyu i̱naga Isaraele wali agali karia pobelo i̱na dabo helaro. Tigua i̱nihondo manga howa mine halu erembira ngialu tinaga mamalirume binidagua dege bialu kagoni.

⁴Tinaga embone giambe mini ndibulo wahene howa tigua i̱ mo yo handalu heagome i̱na bi larugo nahale hayago ai í̱na ti karia i̱naga bi yalu pobelo hameledo. Í̱na tihondo i̱ Anduane Homogo Bibahende Haru Haame Ho Haga kogome bi larogoni, labe.

⁵Anigo i̱naga bi ogo hale hayaguabi nahale hayaguabi wali agali uruni tigua i̱naga bi latagi haga agali mbira ibilayago ti heba íbu henego manda bulebira, lene.

⁶Anigo dindiali-o tigua í̱hondo bi laragolabi gi nahabe. Tigua í̱naga bi larego mo hengedalu í̱ni tinaga bime mo ko holebira. Ani biragola í̱ ti dombeneha howa tinaga bime í̱ mo tandaga holene alipiago dibidabulo ngagoha yupeho haradagua bulebere. Ani howa ti de hondowabi tinaga bi lararu hale howabi gi nahe habe.

⁷Tigua i̱naga bi hale habe manga halu i̱ erembira ngiaga kago í̱ manda bibe. Í̱na i̱naga bi larego tigua hale hayaguabi nahale hayaguabi harugo lowa i̱na bi ogo la larudagua bibahende lamiai habe.

⁸Dindiali-o i̱na bi larogo baya hangu hale ha. Í̱na Isaraele wali agali karume i̱ erembira ngialu hagadagua nahabe. Ai í̱na ne ha̱lalu mbirale o ngerogo na, lalu bi lai hene.

⁹Bi ogoni lai heagola handalu hewaria gi mbirame beba ale mbira i̱ hewagoha kaware yaede hayago handaru.

¹⁰Beba ale ogoni handalu hewaria lunioreyago tigua mo bo bigi buwa kabu biniya. Ai gi biagome beba ale biago anga layagola handalu hewaria bi halu kirani gilibu wiaria handaru. Bi gilibu wiyadagoni handalu hewaria agalime bu miniha genda yu howa dugu taraore biniru dara howa iba gana dara holenenaga laga biniru gilibu wia. Beba ale biagoni bi hangume to̱latagi hearia handaru.