Read Huli Esegiele 21 Bible Online

Esegiele 21 - Huli bible

Esegiele 21

¹Anduane Homogohanda i̱hondo langialu lalu, Dindiali-o í̱na Yarusalemeha de handa dai bu howa tigua ko biyagonaga godini dabaki halu tihondo, Tí mana ko biagaore kami, lalu lamibe. Tigua dama mitangi bialu mbirale gime wabini ngaruhondo bi pupu wule íbu ngoai haga dindi ngaru hondowa i̱na turu naharuligo í̱na tihondo, Mana koorene ko ogoni, lalu lamibe.

³Í̱na Isaraelealihondo bi hongo howa lalu Anduane Homogo i̱na bi o larogo lamibe. I̱ Isaraele wali agali tí baba waitigi howa tí wali agali bayale biaga hemiyaguabi ko biaga hemiyaguabi tanabi i̱na i̱naga wai biaga ayu tibu ngagome tí bo wahai holebero.

⁴I̱na ayu tibume tí dindi abene unurahayagi howa bo wahama pialu uyurahayagi tagira polebero.

⁵Anidagua berogola wali agali bibahendeme i̱ Anduane Homogo i̱naga wai biaga ayu tibu yupe nahe yaragaho haabo koria hondolebira. I̱na tí pani ngialu bo wahai holebero, laya.

⁶Ani lowa Anduane Homogo ibugua laabo halu lalu, Dindiali-o wali agali bibahendenaga deni howa í̱naga gubalinini tandaga timbuni howa dugu biradagua bibe.

⁷Wali agali tigua í̱hondo irane aginaga dugu bialu kebe layagua nde í̱na tihondo ogodagua lamibe. Genda timbuniore ibulubadagonaga dugu bialu ko. Genda ogoni tagira ibirangi tínaga bu miniha gi timbuni halu tínaga gi hongo nahe halu tí mini burugu lalu gebi duru lalu holeberemi. Ogonidagua bulene horodagoni abale tagira ibiragoni ndobe. Bi ogoni Anduane Homogo Bibahende Haru Haame Ho Haga kago ibugua bi o ledagoni laro, lene.

⁸Ani lowa Anduane Homogohanda i̱hondo laabo halu lalu,

⁹Dindiali-o bi manane mbira áyu langerogo ti hale helo latagi habe. I̱ Anduane Homogo i̱na bi larogo tihondo lamibe. Ayu tibu mbira wiago ne gadelelo tigua nage wuwa mbiraleme baya hangu ha̱i̱ heneya.

¹⁰Ayu tibu ogonime bo wahelonaga baya hangu nage wiagola ne gadeleore wialu ngiringarale hari daba ale helo tigua ha̱i̱ heneya. I̱naga wali agali ti turu haga bialu bayale holeberemabe toba ho kabe. Ani ndoyago. I̱na tihondo bi hongohe lamialu gewa tibume barugoyu tigua doga halu haabo kagoni.

¹¹Wai biagane ayu tibu ne gadele ogoni mbiraleme ha̱i̱ howa agali dibule manda manda bu nga. Tigua ayu tibu nage wialu ha̱i̱ ho ngelowa bo wahaga kagonaga giha mo ya holebira.

¹²Dindiali-o ayu tibu ne gadele ogonime Isaraeleali haguane bu karubi i̱naga wali agali bu karu bibahendebi bo wahai holebirago í̱na dara halu dugu daraore bibe. Wali agalime dara ho hagadagua howa dugu bialu habe.

¹³I̱na i̱naga wali agaliru ba handalu kogola ai tigua mana ko bialu kago wahalu mini beregeda nabiyagua nde mbirale o larogoni bibahende tiha tagira ibulebira, laya lene.

¹⁴Dindiali-o i̱naga bi ogo tihondo latagi halu í̱na gi habe babe. Ani baregola ayu tibu ogonime wali agali mo gi halu tini bagabaga bialu dewaore bo wahai holebira.

¹⁵Ayu tibu ogonime wali agali mo gi hagabi dewa bo wahagabi nga. Anigo i̱na tanonaga pabe panga haraba ngaru bibahende ngagoria ayu tibu ogoni hari daba ale ngiringaralegome wali agali bo wahai hole manda manda bu ngo.

¹⁶Ayu tibu ne gadele ngego í̱na dindi bibahendeha pialu gi tigahayagibi gi lehayagibi bama pialu wali agali bo wahai habe.

¹⁷Anidagua beregola i̱na gi habe balu i̱naga miniha keba harugo biba holebero. I̱ Anduane Homogo i̱na bi o ledogoniore, laya lene.

¹⁸Anduane Homogohanda i̱hondo laabo halu lalu,

¹⁹Dindiali-o í̱ hariga dindi mbirahayagi howa ibalu hariga pu gebage bidago manda bibe. Hariga gebagane mbirago ibu Amono dindiha tano timbuni Laba ngagoha polene nga. Hariga mendego Yuda dindiha tano timbuni wai pabe hongohe bu mabubi tano hongohe biagoha polene nga. Ani purogo lolene ha gebage ngagoria mo walia hagane manane kira helabe. Mo walia hagane manane mbirago Laba polene hariga pedagohayagi mo walia howa helalu mende Yarusaleme polene hariga pedagohayagi mo walia ho helabe. Ai Babilono kini kago ibugua ibunaga ami agaliru heba ayu tiburu yalu hariga ibidadagua ibalu ha gebage ngagoria tagira ibulebira.

²⁰

²¹Ani ibalu ogoriani howa kini ibu hariga agoha poledabe manda nabi howa halaga bulebira. Pigane ibunaga timu yidaru mo gigia lolebira. Ibugua halaga uruni bialu howa ibunaga dama mitangi bialu mbirale gime wabini ngaru bi pupu wialu hale halubi nogo lomabu mule bo ngagonaga buni ngago begelo hondolebira.

²²Ani bialu howa timu gi tigame yamiyagome Yarusalemehayagi polene walia holebira. Ani manda bialu tigua Yarusaleme puwa wai pabe panga kago bo gialalu tanoha anda puwa wali agali tanoha karu bo wahai holenaga mbirale mbira guruyagu̱ ale wabulebira. Wabiai howa ami agali bu karume hongo howaore hoaro lalu mbirale mbira guruyagu̱ ale biagome wai pabenaga panga kago bo gialole hongo howa yupe haragola panga biago bo haealabaga bulebira. Ani bialu tigua Yarusaleme tano bo gialopaya bule gana walu tini heyu howa wai bulenaga dindi dugu wima irigi holebira.

²³Í̱na Isaraele wali agaliruhondo bi ogoni latagi haregola tigua bi ogoni hale nahe bame degeda lo manda bialu, Babilono kini kago andaneha hole lalu habo nalolene bi lo wirimago ai ibugua ina baba wai nabulubadalo, manda bulebira. Anigo tigua mana ko dewaore bialu hayagonaga Babilono kini kagome ti garabaya bilo ibilolebero. Ani ibirago de hondowa tigua mitangi bu handalu karia tinime mana ko bialu harimagonaga mbirale uruni anda ibiyadalo manda bulebira.

²⁴Ai Isaraele wali agaliru-o Anduane Homogo Bibahende Haru Haame Ho Haga kogo i̱na tíhondo bi mbira ogodagua laro. Tígua mana ko dewa biaabo halu kamigo i̱na embeda naholebero. Tígua mana ko panigi bibahende handai hene bialu kamigome tíha ko ngelo kamigo wali agali bibahendeme manda biaiho ka. Tígua ko birimirunaga pani nolene ngelo kamigo i̱na tí waitigi bu karunaga giha ya holebero.

²⁵Isaraelealinaga kini kego í̱na i̱naga mana pugualu mana ko ngaru bialu haga kegoni. Í̱ mana ko bialu harigonaga pani nabelo ngulene horo biago kaware íbu ngagoni ndobe.

²⁶I̱ Anduane Homogo Bibahende Haru Haame Ho Haga kogo i̱na bi o ledogoniore. Ai í̱na kininaga manda karulo kegoni golo wahalu labolabo í̱naga emboneni bo bidegonibi golo ngelalu bibe. Ala wiyadagua mani nawulebira. Áyu ina bibahende mo iriari bialu agali haguane bu karu mo dindiha halu agali mini nalene bu karume agali haguane ha aribia halu mo yaraga helolebira.

²⁷Mbirale tara bamba nahendeneru ale bialu i̱na Yarusaleme bo gialo wahai halu mo ko hole manda bu ko. Ani bialu dindi mo ko hene wiaabo kane dege agali mbira ibilolebero. I̱na agali ogoni dabenego ibugua Yarusaleme tano handayaho howa haru helo ibuhondo mulebero, laya lene.

²⁸Anduane Homogohanda i̱hondo laabo halu lalu, Dindiali-o Amono wali agali karume Isaraele wali agalihondo bi ko laragonaga í̱na mbiwia halu tihondo bi ogo latagi habe. I̱ Anduane Homogo Bibahende Haru Haame Ho Haga kogome tihondo bi ogodagua laro. Wai biagane ayu tibu ne gadele ngagome mbirali bo waholenaga nga. Ayu tibu ogoni baya hangu nage wialu mbiraleme ha̱i̱ hayago ngiringaralalu hari daba ale migimege laradaguabi ngagome agali dibule manda manda bu nga.

²⁹Amonoali tígua mbirale de gandebaha hondo bolangua howa lalu, Ayu tibu ogoni iname yuwa wali agali i̱naga bi mo wahalu mana ko biaga karu homelo bo wahai holeberema, lalu kami. Anigo tígua de gandeba handarimigobi mbiwia halu kamigobi bibahende ke̱ dege halu kami. Heneneore wali agali uruni pani nelo mulene kaware íbu ngagonigoyu pani nelo bo waholenedagoni tígua naboleberemi.

³⁰Ayu tibu ibuni andaneha yadai bidaba. Tíni dindiniore kamigola i̱na tígua bialu harimidadagua tí manani helolebero.

³¹Irame dangi bo daralidagua i̱na tí baba keba halu miniha tandaga ho kogome tí dolebira. Agali ko mendeali kago mo ko dege haga karume tí mo ko helo ibilolebero.

³²Ira dedagoria ira gabuni karu balu delaragola irame dalu do mundu lagadagua bialu tí bo wahai helolebero. Tínaga darama tíni dalu ngamigoria polebira. Ani homaramigola wali agali mani holobadarume tínaga mini abogo dindi ogoria hene lalu mbira nalolebira. I̱ Anduane Homogo i̱na bi o ledogoniore, laya lene.