Read Huli Esegiele 28 Bible Online

Esegiele 28 - Huli bible

Esegiele 28

¹Anduane Homogohanda i̱hondo bi lalu,

²Dindiali-o Anduane Homogo Bibahende Haru Haame Ho Haga kogome i̱na bi o langerogo Taianaga kini kagohondo í̱na lamibelo hameledo. I̱naga bi ogodagua laro. Taianaga kini-o í̱na í̱ninaga mini mo yaraga halu lalu, I̱ni daliga timbuniore wali agalime i̱ mitangi bialu bi pupu wiaga mbira kogoni, laga ke. Í̱naga dindibi nde mbirale mitangi bialu bi pupu wiagaru dindi mbaule iba solowara dege dombeneha wu kegoni. Í̱na bi henene anidagua la larigonigo henene í̱ mbirale bi pupu wiaga uruni ale ndo í̱ bame agali dege kegoni.

³Í̱nime manda bu handalu keria í̱naga mini gigabi ngego Danielenaga wu henego bolangua halu timbuniore wu howa mbirale wia do hene ngaru manda biaihe kobe tobaho kegoni.

⁴Í̱naga mini gigabi ngegome muni ngolo silibaru hangu dewa mo wu howa ai homogo kegoni.

⁵Ani mo ngelo howa muni urunime biyinaya bialu muni igini wiyagola dewaore wu kegoni. Ani howa í̱naga muni dewa wu kegonaga balagala howa mine timbuniore halu kegoni.

⁶Anigo i̱ Anduane Homogo Bibahende Haru Haame Ho Haga kogome í̱hondo bi langerogo. Í̱na mine howa mitangibu handalu keria í̱naga mini gigabiwi mbirale gime wabini mitangi bialu bi pupu wiaga karu aria mbira i̱ kobe toba ho kegoni.

⁷Ani mitangi bialu kegonaga i̱na í̱naga waitigi koore bu karume í̱ni baba wai bilo ibilolebero. Ani ibilarogola tigua í̱naga manda timbuni ngegome mo wini ngeruni bibahende bo gialabaga bialu mo yu piai holebira.

⁸Ani bialu í̱ni mo ko howa í̱ninaga dindi iba solowara dege dombeneha ngegoria homolebere. Ani homalu í̱ni homenerunaga dindi humbirini andaha pu holebere.

⁹Anigo tigua í̱ bole ibirangi í̱na tihondo lamialu, Wali agalime i̱hondo bi pupu wiaga mbirale mbira i̱ kogoni, loleberebe. Anigo ogonidagua nalolebere. Í̱na í̱ bo wahaga biaru de handade halu í̱ bame agali damene bu karuni ale dege harudane hondolebere.

¹⁰Í̱naga waitigirume ibalu í̱ bo waharagola í̱ agali uruninaga giha howa biango homaradagua bulebere. Anduane Homogo Bibahende Haru Ho Haame Haga kogome i̱na tí ani bidaba lalu lamirugoni laro, laya lalu Esegielehanda lene.

¹¹Anduane Homogo ibugua i̱hondo laabo halu lalu,

¹²Dindiali-o í̱na Taianaga kini kagonaga dugu bialu ibuhondo bi ogodagua lamibe. Taianaga kini-o Anduane Homogo Bibahende Haru Haame Ho Haga kagome bi ogo í̱hondo larago hale habe. Ala í̱ agali tigabi bayaleore wali agali maru bolangua hene mbira harigoni. Í̱naga mandabi timbuniore bu howa í̱ agali bayaleore mbira harigoni.

¹³Í̱ Ngode Datagaliwabenaga Idene mabu ale bayale biagoha harigoni. Ani bialu í̱naga yári bayale ege to̱le̱ tara yolo timbunime miaga mini ngoloru ngibingabu lo helaga bini wiaru mo karulo hari. Ege to̱le̱ uruni mini lubiru tobasaru daimonoru beriliru kanelianaru yasabaru sabaearu emeralaru ganederu ege to̱le̱ uruni bibahende í̱ dindini nahengi i̱na í̱naga mo manda manda bu wiru.

¹⁴Kini-o i̱na í̱ dahuliyali mamage haga haradagua helowa í̱na i̱naga hari loma bia hene wiagoria pu howa ege to̱le̱ ngiringarale tara tara wiagoria ibagabu harigoni.

¹⁵I̱na í̱ dindi ogoria pigane helarungi í̱ bayale ko mbira í̱ha nawiore helaru. Ani helewagola mani i̱naga deni howa mana ko dewaore bialu hari.

¹⁶Í̱na dindi dewaoreha biyinaya biame halu howa wali agali bu hearu baba biyinaya uruni timbuni helonaga bia hami̱ya ibidaba lowa mana ko bialu wali agali bo wahaga kegoni. Í̱ dahuliyali mamage haga ale harigoni hegola i̱naga deni í̱ ko dodoheore hayagola i̱na i̱naga hari loma bia hene biagoria howa í̱ bo taliatagi harugola í̱ taga halu pirigoni. Ani birugola í̱ ege to̱le̱ baya ngiringarale biaru ngagoria lone naholebere.

¹⁷Í̱ni manda bu handalu heria í̱naga dengui bayaleyagola í̱nime balagala halu í̱ni mini mo yaraga halu harigoni. Ani bialu í̱naga manda timbuni wu howa ainde manda timbuni ogonime í̱ninaga mini mo yaraga holene ngabe tobaho harida. Irane ogoninagaore i̱na í̱ bope harugola dindini wiria kini maru karume í̱ hondo oba halu helonaga biru.

¹⁸Taianaga kini-o í̱na biyinaya biabe bialu howa mana ko dewa bialu harigome lotu anda bu hearu i̱naga deni mo dodoheore helari. Ani birigola i̱na tano uruniha ira hedope halu bo heda hewagola tano uruni dai halu be abalu hangu ibira hene ngaria wali agalime hendedagoni.

¹⁹Í̱ mo ko hai hene kegonigo ai dindini naholebereore. Dindi tara taraha wali agali í̱ mandabi bu karume í̱ha ogonidagua biya larago hale howa tihabi buligo lowa ti mogo timbuniore lo kagoni, Anduane Homogohanda laya, lalu Esegielehanda lene.

²⁰Anduane Homogohanda i̱hondo lone lalu,

²¹Dindiali-o í̱na handa amu ho howa Saidono tanohondo í̱ha mo ko holene wulebira lalu lamibe.

²²Anduane Homogo Bibahende Haru Haame Ho Haga kogome i̱na Saidono wali agali bu karuhondo mbirale buleberorunaga bi lamibe. Saidono-o i̱nime tí baba waitigi halu mo ko hai halu tíha i̱naga mana tigabi bayale biaga ngoru mo walia halu berogola tígua i̱naga mini yaraga halu holeberami. Wali agali tara tara bu karume i̱na Saidono wali agalihondo ogonidagua berogo hondowa tigua i̱ni Anduane Homogoore henedalo manda biai holebira.

²³I̱nime warago ko timbuniore tara tararu tí kamiruha ibilolebero. Ani bialu tínaga waitigi bibahende ibai helarogo tigua Saidono baba wai bialu wali agali dewaore bo wahai holebira. Ani biragola bo wahenerunaga darama tanoha harigani iba poradagua pialu holebira. Ani berogo hondowa Saidono wali agali tígua i̱niore Anduane Homogoore henedane hondoleberemi, laya lalu lamibe, lene.

²⁴Anduane Homogo i̱na bi laabo halu ogodagua laro. Isaraele wali agalinaga waitigi bu karuni ti igibu ani ale howa wali agali kenda poradagua biaga bu ka. Anigo mani lone ani nabulebira. Horo ogoningi Isaraele wali agalibi waitigi bu karubi ti bibahendeme i̱ Anduane Homogo Bibahende Haru Haame Ho Haga kogo i̱niore henene henedane hondolebira, lene.

²⁵Anduane Homogo Bibahende Haru Haame Ho Haga kogo i̱naore larogo, I̱na Isaraele wali agali dindi tara tara ngaruha garabaya pu helaruruni bibahende haru dai bialu tininaga dindi tene wiyagoria helolebero. Ani berogo hondowa hameigini tara tara bu karume i̱ taraore howa mana bayale tigabi biaga kogoni manda bulebira. Isaraele wali agali tininaga dindi henene ngelo lowa i̱na i̱naga biabe biahaga Yagabahondo mirugoria ibalu haabobo bu holebira.

²⁶Ani howa tinaga anda bialu tinaga gerebi maburu hangalu ti bayaleore helo helolebero. Ani kagola tinaga waitigi abale Isaraele wali agali ti mo ko halu haga bu hayaruni pani mialu ti minu bolebero. Anidagua berogola Isaraele wali agali tigua i̱ni Anduane Homogoore tinaga Ngode Datagaliwabe henedalo manda bu holebira, lalu Anduane Homogohanda lene.