Read Huli Esegiele 38 Bible Online

Esegiele 38 - Huli bible

Esegiele 38

¹Anduane Homogohanda i̱hondo lalu,

²Dindiali-o í̱na Magogo dindiha Gogo karia de handa amu habelo hameledo. Gogo ibu Mesege dindi Tubala dindilanaga kini timbuni ka. Í̱na Gogo ibu mo ko holene nga lalu bi latagi habe.

³Ibuhondo bi ogodagua labe. Mesege hameigini Tubala hameigini kago labonaga kini timbuni dunini kego í̱na bi ogo hale habe. I̱ Anduane Homogo Bibahende Haru Haame Ho Haga kogo i̱na í̱la waitigi ho kogoni.

⁴I̱na í̱ mo beregedalu í̱naga ne hanganeha wena hugume hende howa í̱naga ami agali heba gililo yu dai bulebero. Í̱naga ami agaliru dewaore karubi nogo hosirubi ami agali maru nogo hosini biralu piagaru ti aminaga agaru mo karulalu wai humbi yalu wai biagane ayu tiburu yu karubi tí bibahende gililo yu dai bulebero.

⁵Pesiali amirubi Sudanali amirubi Libiali amirubi bibahende tigua ege manda karulalu humbiru yu howa í̱ heba mandagi holebira.

⁶Ani bialu Gome dindinaga ami agali wai hongo howa biaga karubi Bede Togama dindi abene uyurahayagi tanonaga ami agali bu karubi í̱ heba dege holebira. Dindi tara taranaga ami agalirubi í̱ heba holebira.

⁷Kini Gogo í̱ wai bule manda manda bu habe. Í̱naga ami agali í̱na haru haga bu karu tibi nde wai bule manda manda bu helo í̱na ti bayuwa handayaho habe.

⁸Mali dewaore howa wai bu pole mo mogo bule manda manda bu habe. Mali dewaore pedagola dindi mbira bamba mo ko ho winigo ai áyu tinaga tano lone mo tiga bialu biadai buwa waitigiru gi holene ereba halu dungulo kago ti baba wai bu pobelo pu lolebero. Wali agali uruni ti dindi taraha garabaya pu henego áyu i̱na ti lone haru dai binigo ai Isaraele dindi hari bare bare ngaruha daibu heledogoni.

⁹Kini Gogo í̱nibi í̱naga ami agali bu karubi ami agali maru dindi taraha howa haru íbu hene karubi tígua wali agali tinaga dindi dai bu karu baba wai bule poleberemi. Ani poramingi tí dewaore howa iba dalu timbuni puyabu heba ibagadagua ibalu dindi bibahende karulai halu ginu hagua aleme tinaga dindi ngago bibahende bu dambi hai holeberemi.

¹⁰I̱ Anduane Homogo Bibahende Haru Haame Ho Haga kogo i̱na Gogo í̱hondo bi ogo laro. Í̱na ti baba wai bule porengi í̱naga bu mini abaleore heyalu ohalu bulene mbira manda manda bulebere.

¹¹Wali agali uruni ti baba wai bulene mbira nahebe toba howa tiha mo ko holene mbira naanda ibulebirabe tobaho karia í̱na wai bule anda polebero, lo mitangi bulebere. Tinaga tano ngagoha mbirali ibuligonaga wai pabe bu mabu nabi kagoni manda bulebere.

¹²Ani manda bialu í̱na wai bule anda puwa tinaga dabudabu bayale tara tara ngaru í̱ karulole manda bulebere. Wali agali uruni ti dindi taraha pu henego ai lone dai buwa tinaga tano lone biadai biai halu tinaga nogo sibi bulumagarubi mbirale bibahende bayale dameneru wua ka. Ani bialu tinaga dindi maru ngaru ti dege dombeneha nga.

¹³Tígua dindi ogoni bole eberemingi hameigini maru Seba dindiha padarubi Dedana hameigini padarubi Sebena dindiha biyinaya biabe biaga bu karumebi tí eberemigo de hondowa tíhondo hale halu lalu, Í̱naga ami agali bu karu mo mogo bialu wai bule ibuwa tinaga mbirale ngaru karulai holeberemibe. Ngolo dewa ngarubi siliba ngarubi nogo bulumaga bu karubi mbirale maru tara tara ngarubi tígua mo yai holeberemibe. Anidagua bulenego bayaleoreda, lolebira.

¹⁴Ai dindiali-o í̱na Kini Gogohondo i̱naga bi ogodagua lamibelo hameledo. Kini Gogo í̱na bi ogo hale ha. Anduane Homogo Bibahende Haru Haame Ho Haga kogo i̱naga Isaraele wali agali ti tininaga dindiore ngagoria bayale kangi í̱na ogodaua manda bulebere.

¹⁵Í̱na ami agali dewaore haru halu í̱naga dindi uyurahayagi wahalu tígua wai bule ibuleberemi. Ami agali uruni ti dindi tara tara ngaruha howa íbu hene karu bibahende nogo hosini biralu í̱ni heba mandagi ibuleberemi.

¹⁶Tígua i̱naga Isaraele wali agali baba wai bule ibuleberemi. Eberemingi tí dewaore hari beraliba aleme dindi bibahendeha ho namulai kamiria ti hondolebira. Kini Gogo-o í̱na ani bibelo mo bia holeberogo irane hameigini tara tara dindi taraha padarume i̱naga mini tigabi mana bayaleoredane hondowa i̱ kogoniore manda bilo ani bulebero. Hamaro bulene horo kaware ngelowa mbirale uruni tagira ibulebira.

¹⁷Bamba i̱naga biabe biahalu bi mana latagi haga Isaraeleali bu hearume mani buleberogonaga mbiwia helo i̱na lamigi bialu lalu, Mani howa i̱na tínaga waitigi mbira haru halu ibulebero, laga bialu harugo waitigi ogoni Kini Gogo í̱ kegoni manda bialu larugoni. Ani birugola tigua mali dewaoreni biabe ogoni bialu howa bi latagi halu hene. Anduane Homogo Bibahende Haru Haame Ho Haga kogo i̱na bi o ledogoniore, laya lene.

¹⁸I̱ Anduane Homogo Bibahende Haru Haame Ho Haga kogo i̱naore laro. Kini Gogo ibugua Isaraele baba wai bule ibirangi i̱na ibula keba timbuniore holebero.

¹⁹I̱naga miniha keba timbuniore howa i̱na bi ogo laro. Horo ogoningi Isaraele dindi bibahendeni dumbirumbi bialu dindi ema biai holebira.

²⁰Anidagua biragola ibaha wena bedarubi ega bedarubi nogo tara tara emene timbuni bu karubi wali agali dindi bibahendeni karubi i̱ ogonibi kogonaga mogolalu durulo haiore holebira. Hari wedaru podai halu dindi ngaruni gaibu baga bialu mo ko haiore holebira. Tanonaga wai pabe egeme bu mabu bini hongohe karu podai halu dindini haealapaya biai holebira.

²¹I̱na Kini Gogo mo gi halu ko holene dewa ibuha ibilolebero. I̱ Anduane Homogo Bibahende Haru Haame ho haga kogo i̱na bi ogodagua laro. I̱na Isaraele dindini hari bare bare ngaruha wai timbuni mo bia halu ibunaga ami agalirume tinaga ayu tibume tini degedege bagabaga bialu homelaga bulebira.

²²I̱na Gogo ibuha warago tara tara ibilalu waibi nde ibila dege bialu ibu pani nelo mulenaga ani bulebero. I̱na iba dalu dindiguni heba timbuniore ibilalu ege to̱le̱ do kundibiore hariha howa ibira helalu urunime ibubi ibunaga ami agali karubi agali dindi taraha howa ibu biamogo bule íbu karubi ti bibahende bo wahai holebero.

²³I̱na ogonidagua berogome hameigini tara tara dindi taraha karu bibahende i̱ni tinaga hongo haihe howa mini tigabi mana bayaleore biaga kogo mo walia holebero. Ani berogola tigua i̱ni Anduane Homogo henene ogobiore henedalo manda bulebira, lene.