Read Huli Hosea 11 Bible Online

Hosea 11 - Huli bible

Hosea 11

¹Anduane Homogohanda laabo halu lalu, Isaraele ibu ala bamba waneigini gali ale heangi i̱na ibu gubalini halu i̱ni iginiore lowa turu halu Iyibi dindi howa haru tagira íbu helarugoni.

²I̱na ibu i̱ni koria dai bilonaga olalu hewaria ibu hale nahe tingi howa erembira ngialu piya. I̱naga wali agaliru tigua mbirale gime wabini mini Balahondo bi pupu wialu mbirale loma buwa bo delalu maru wiaruhondobi uruninaga lomabu delaga dabuni ira hagua ngabilo mini inisenesi wiaru delalu biya.

³Isaraele ibu hariga tigabi ngagoria pialu helonaga biawai haga i̱niore kogoni. I̱na i̱naga wali agali i̱ni gime taba yalu baya hanguore handayaho harugo helowa tigua ani biyadalo manda buwa dege la nabi hayagoni.

⁴I̱nime ti gubalini howa turu halu i̱naga gubaliniha minu yamuwa ti mo turu howa tomobi baya hangu nelo mialu harugoni.

⁵Tigua i̱ni kogoha daibua nahe kagodago nde ti Iyibi dindi daibuwa Asirianaga haru hagame ti handayaho helo polene nga.

⁶Ani bilonaga wai timbuniore bialu tinaga tano timbu ngaruninaga pabe panga hongohe karuni bo gialo wahai halu tinibi bo biba hai holebira. Irane i̱naga wali agali uruni tigua i̱ni yu wahalu puwa tini hame leago bima piyagome urunidagua bulebira.

⁷I̱ni helo wahalu piyagonaga i̱na pani timbuni merogola ti yo pialu mbira napolebiraore. Tiha genda timbuniore tagira ibiragola tigua dugu timbuniore bulebira. Dugu bialu kagola agali mbirame ladebodebo bialu mo wahabe tobahe wulebira.

⁸Isaraelealiru-o i̱na tí yu wanaholebero. I̱na tí helalubi napolebero. I̱na Adama dindibi Seboimi dindibi mo ko halu bo gialo waharudaguabi nabule dege. I̱na tí gubalini timbuniore ho kogome tí mo ko nahole.

⁹I̱na tíhondo keba howa pani nangulebero. I̱na tí lone mo koore naholebero. I̱ni Ngode Datagaliwabe kogome i̱naga mana agalinaga ngaru ale ndo i̱naga mana taraore ngogoni. I̱ Mbirali Loma Bia Hene kogo tí yu wanahe tí baba holebero. I̱ tí kamiria keba howa ndo ibulebero, lalu Ngode Datagaliwabehanda lene.

¹⁰Anduane Homogohanda laabo halu lalu, I̱na budi gabua ale laionome bi hongo howa ngororo laradagua bialu ti waitigi bu karu olarogola i̱naga wali agali ti gi howa dindi ni paliragohayagi ngaru yu wahalu abale i̱ni talima ibulebira.

¹¹Tigua Iyibi dindi howa abale egame yagalo yalu ibiradagua bialu Asiria dindi howa ega malibu ale ibiradagua bulebira. Ani biragola tininaga dindi wiyagoriaore helo haru dai bulebero. I̱ Anduane Homogo i̱na bi o ledogoniore, lene.

¹²Anduane Homogohanda laabo halu ogodagua laya. Isaraele wali agali tigua i̱hondo ko dewa bialu ke̱ tara halu haabo ka. Anigo Yuda wali agali tibi i̱ erembira ngialu tinaga Ngode Datagaliwabe mana tigabi bayale hangu biaabo haga kogo i̱ni andaneha íbu nabi ti mana ko dege biaabo halu kagoni.