Read Huli Yoele 1 Bible Online

Yoele 1 - Huli bible

Yoele 1

¹Anduane Homogohanda Peduele igini Yoelehondo bi ogodagua lamini.

²Wali agali wahe kamiru-o tí hale hadaba. Yuda wali agali kamiru-o tíguabi hale hadaba. Áyu ogoni dege mbirale bulebirarunaga tíhondo hale harogoni. Mbirale uruni ale mbira áyu tí kamingibi abale tínaga mamali heneyangibi tagira ibinibe be naibibe. I̱na manda bialu koria naibiniore lo manda bido.

³O biraruninaga tígua tínaga waneiginiru lamilimu. Tigua nde mani tinaga aguanene hama polebiraruhondo bi te ogoni la a̱i̱ a̱i̱ bialu helo lamilimu.

⁴Pagaya ale dewaoreme tidi yalu ibalu mbirale yuni damenego bibahende naiore hene. Pagaya ale pigane ibiyarume nai nahe yu wahayaru wabuni halu mende ibiyarume nene. Halu tebone mane halubi tidi yalu ibugu biyarume lone naga bialu mbira yu wanahe naiore hene.

⁵Agali lulu iba nowa lulu yu haga kamiru-o ai heyu howa dugu bidaba. Waini iba hambu nowa lulu yaga kamiru-o tínaga waini iba hambia aribia holene pu mbira mini gerebi lini do aribia hayago pagaya aleme nai hayagonaga tí dugu bidaba.

⁶Pagaya ale tidini dewaore ami agali ibiradagua ibalu inanaga dindi nahandabeheore dambi ho wa kagoni. Ti dewa hongoheoreni ami agalime daga labe nahe. Tinaga neru gadeleore budi gabua laiononaga ne alehe kagoni.

⁷Tigua inanaga pu mbira lini daga mini gerebi irane mo ko halu pogebi bibahende naiore hayagoni. Ira uruninaga nagane hearu nai halu dongonebi heba bu nai hayagola irane pele hangu pana halu gabu hai hayagoni.

⁸Wandarime igiri ibu poleore lalu lawinigo homaragola dara timbuniore halu dugu biagadaguaore dugu biai hadaba.

⁹Lomabu mulene tomobi waini ibabi nawida. Loma binigo mo miaga karume Anduane Homogonaga andaha puwa ibunihondo lomabu mulene nawidagola dugu biragoni.

¹⁰Mabuha mbirale mbira nahe bameore dindi hangu ngagoni. Ani bidagonaga dindi ibubi nde dugu bialu ka. Dugu biragonaga irane mabuha tomo anda hagane damenego gerebi lini gau lalu olibe irabi bibahende gau lai hayagonaga dugu biragoni.

¹¹Agali mabuha biabe bialu e hangaga kamiru-o dara holene nga. Gerebi lini daga pu ale hondo hagaru-o tí dugu bidaba. Tínaga mabuha balowa wabiaga widi balirubi tomo damene bibahende ereba hai hayadago ai dugu daraore bidaba.

¹²Pu mbira lini daga mini gerebibi pogebi bibahende gau lai hayada. Ira lini naga ale daga hearunibi bibahende gau lai hayadagoni. Ani biyadagome wali agalinaga turu holene ereba hayada.

¹³Loma binigo mo miagaru-o tí lomabu mulene dabu biabe biaga kamiru-o tígua yayawi dindi dugu hiruwa dara halu dugu bidaba. Tígua daraho kamigo walia halu yayawi dindi dugu hiralu Anduane Homogo andaha puwa dugu dege bialu egabi lelolene nga. Waini ibabi tomobi tínaga Ngode Datagaliwabehondo lomabu mulene mbira nawidagonaga ani bulene nga.

¹⁴Tígua wali agali lamialu agali haguane karubi Yuda wali agali karubi bibahendeme tomo nane wahalu tí bibahende Anduane Homogo tínaga Ngode Datagaliwabenaga andaha mo ngoai howa ibuhondo bi lalu dugu bialu holene nga.

¹⁵Anduane Homogo ibugua Horo ibunaga pongobo winigo áyu kaware ibiragonaga aniore bulene nga. Horo ogoningi Anduane Homogo Hongo Haiheore kagome mo ko holene timbuniore ibilolebira. Horo ogoningi inaha genda holene koore yu anda ibulebiragonaga i̱ dara ho kogoni.

¹⁶Tomo mbirale ngaru mo koore harago hondowa iname mbirale mbira bibe nahe kamagoni. Anduane Homogo inanaga Ngode Datagaliwabe andaga pu poleberamago ogonihabi turu holene mbira nawi dege.

¹⁷Dindiha yobi iba nabere ngagome tomo egeneru hengederia anda naholebira. Anigo tomobi mani nolenenaga do holene nawi. Ani biragome tomo bu yu mogobu ngelaga anda karubi tabuanda hai holebira.

¹⁸Nogo bulumaga karu tibi nde datani nolene nahedagola ha̱a̱ lama lulu yalu ibaga bialu ka. Nogo sibi karubi nde tomo garibi lowa obi ona bu hama pedagoni.

¹⁹Anduane Homogo-o ira datani karubi bibahende irame bo daradagua bialu gau lai hayadagonaga i̱na í̱ olarogo.

²⁰Ainde datani karubi gau lai halu iba bedarubi hundiai hayagola ema bialu piaga karume í̱hondo dugu bu ngialu kagoni.