Read Huli Yoele 3 Bible Online

Yoele 3 - Huli bible

Yoele 3

¹Anduane Homogohanda lalu, Horo ogoningi wali agali Yarusalemeha karubi Yuda dindiha karubi ti bibahendeore i̱na mo bayale hai helolebero.

²Ani helowa dindi ulini mbira mini Mana Ko Birago Dabaki Biaga laga ngagoria wali agali hameigini bibahende dindi tara tarani bu karu i̱na haru ibai howa mo mogo bu helolebero. Ani íbu kagola tigua i̱naga wali agali hearuhondo mana ko biyagonaga i̱na ti dabalu pani mulebero. Agali uruni tigua i̱naga Isaraele wali agali hearu dindi tara tara kaundia wiaruha waratagi halu purogo lelowa i̱naga dindi wirurubi ti dege karulai hayagonaga ani bulebero.

³Agali uruni bibahendeme Isaraele wali agaliru ai ibu mirabe hondole tigua tadu bialu tadume mbira mbira migi migi biya. Tigua Isaraele wali agalirunaga waneigini bu hearu garabaya biabe ale biahaga helo muni muwa muni urunime wali kayu yaga berearu kayu yule yolo bialu waini ibaru yolo bigi bini.

⁴Taia tano wali agali kamirubi Saidono tano wali agali kamirubi wali agali Pilidia dindi bibahendeha kamirubi tígua i̱hondo mbira agi bule beremibe. I̱na birugo ko ale biruyane tígua i̱hondo pani ngule mandabu kamibe. Ani mandabu kamiyagua nde tígua birimigonaga i̱na tíhondo pani ala biadai bulebero.

⁵Tígua i̱naga mbirale bayale muni ngolo silibarubi wiwaru bibahende mo yalu puwa tínaga gime wabini biarunaga andaha yalu puwa mo wiai kamigoni.

⁶Tígua Yarusalemeha howabi Yuda dindiha howabi wali agali bibahende dindi tara kaundiaha haru puwa Girigiali hearume yolo ngilo muni taguialu uruninaga garabaya biabe ale biahaga helo pelarimigoni.

⁷Ani birimiruni ti dindi uruni wahalu dai bilo i̱nime haru dai biai holebero. Tígua urunihondo birimidadagua i̱na tíniha bia dai bulebero.

⁸Ai tígua birimigodagua Yuda wali agali tigua nde tíninaga waneigini karu minalu kaundiaore Sabea dindiha howa ibirarume muni ngiragola tinaga garabaya biabe ale biahaga helo dindi kaundia uruniha pelai holebira. I̱ Anduane Homogo i̱na bi o ledogoniore, lene.

⁹Yoelehanda Anduane Homogonaga bi ogodagua lamialu, Bi ogo wali agali dindi tara tara bibahendeni karu lamialu Wai bule manda manda bu halimu. Ami agaliru wai bu pole olo mogo buwa manda manda bu hadaba lalimu.

¹⁰Dindi aliaga aeane ngamiru hiruwa bo tiga bialu wai biagane ayu tibu wabilimu. Tomo gandu laga ayu tibu yu kamiru hiruwa bo tiga bialu yandare wabilimu. Agali hongo nahe mbira kayagua ogoni ibunde wai bule hongo howa holene nga.

¹¹Wali agali dindi tara tarani kamiruni bibahende abaleore ibalu dindi ulini unu ngagoria mo mogo bu hadaba laya, lalu Yoelehanda lene. Ai Anduane Homogo-o í̱naga wai biaga ami agali biaru abale agali uruni baba wai bilo ibilabe, laro.

¹²Anduane Homogohanda lalu, Wali agali hameigini dindi tara tara bibahendeha bu karu abale ibalu dindi ulini mbira mini Mana Ko Birago Dabaki Biaga laga unu biagoria mo mogo bu hadaba. Ani íbu kamigola tígua mana birimigonaga Anduane Homogo i̱nime dabaki buliya.

¹³Wali agali o karuni ti ko ngubiore kagoni. Ti ani kago manda buwa wali agalime tomo widi boga bialu gandu lagadagua bialu agalime pu mbira mini gerebi lini waini iba wabiaga ege to̱le̱ uli timbuni ngagoha ngelowa pingidole geme hengeda hagadagua halimu. Waini iba biru to̱latagi halu piagadagua uruni tiha mana ko to̱lai howa koorene ko henego kagoni, lene.

¹⁴Wali agali daosini dewa dagalabe naheore dindi ulini mbira mini Mana Ko Birago Dabaki Biaga laga ogoria godi lolenaga íbu ngoai ho ka. Dindi ogoriani Anduane Homogonaga Horo haragola ibunime dabaki bulene kaware ngagoni.

¹⁵Ani ibiragola ege nibi hundiai halu yakundibi lone nadolebira.

¹⁶Anduane Homogo ibugua Hari Saiono biagoria howa bi timbuni lowa Yarusaleme howa ibunaga bi laragome hari kilikulu laradagua bialu bi laruagome dindi haribi ema bialu birila gimbu biai holebira. Ani biragola Anduane Homogohanda ibunaga wali agali karu ibunime handayaho kagola ti mo ko nahe bayale holebira.

¹⁷Ibugua lalu, Isaraelealiru-o i̱na ani berogola tígua i̱ni Anduane Homogo tínaga Ngode Datagaliwabeore henedane hondowa manda biai holeberami. Hari Saiono i̱ninaga loma bini ngagoriani kogoni. Yarusaleme i̱ninaga tano loma biniore ngelolebero. Ani ngeledogoria waitigirume Yarusaleme ogoni lone ibalu karu nalolebira.

¹⁸Ani berongi hari bibahendeni gerebi lini daganenaga irane karume anda haame holebira. Hari bare bare ngaruha nogo bulumagarume dewaore haame holebira. Yuda dindiha dalu karulape ibalu iba bayaleore piaho wiaabo holebira. Ogoningi iba mbira Anduane Homogo andaga biagoha howa dugua tagi halu unurayagi dindi ulini mini Ira Agasia Buguni laga bu ngagoha pupe halu dindi ogoni mo gomba halu polebira.

¹⁹Iyibi dindi ko howa gaea timbuni bialu Idomo dindibi wali agali mbira nahe dindi dabulu wulebira. Dindi kira ogonialime Yuda wali agali ko mbira tiha nawi hearu baba wai buwa bameore bo wahai hayagonaga ani bulebira.

²⁰Anduane Homogo i̱na agali uruni tigua irane nawini wali agali bameore bo wahayagonaga i̱na tihondo pani mialu paipai biadai bulebero. Agali mana yole biaga uruni aria mbirago yopialu napelolebero. Anigo Yarusalemenibi Yuda dindiruhabi wali agali haabo holebira. Ani bidagola Anduane Homogo i̱ni Hari Saiononi haabo holebero, lalu Anduane Homogohanda ibunaga mana latagi haga Yoeleha howa bi ogoni latagi hene.