Read Huli Amoso 7 Bible Online

Amoso 7 - Huli bible

Amoso 7

¹Anduane Homogo Bibahende Haru Haame Ho Haga kagome i̱hondo de gandeba mbira mo walia haya. I̱na handalu hewaria pagaya ale wabuni timbuni mbira ibilaya. Agali biabe biahaga hearume datani hearu gandulo yu pialu kininaga nogo bulumaga hearu nelo minigo ai mani teneha howa pudu lalu andaho aribia halu heaore dege pagaya ale uruni tibi nde tagira ibiya.

²Ani handalu hewaria pagaya ale uruni tigua datani dindi bibahendeha hearu nai hayane handaru. Ani biyago hondowa i̱na lalu, Anduane Homogo Bibahende Haru Haame Ho Haga-o í̱naga Isaraele wali agali karuninaga ko ngaru domo wahai ha. Ti dewali ndo emene ko hangu howa hongo naheore karunidago í̱na ti mana lalu pani miriyagua nde ti mani agua bialu bayale holobadabe, laru.

³Ani larugola Anduane Homogo ibugua mini wiadai bialu lalu, Ai áyu de handariruni tagira naibulebira laya, lene.

⁴Anduane Homogo Bibahende Haru Haame Ho Haga kagome de gandeba mende ogobi walia haya. Anduane Homogohanda ibunaga wali agali pani mule lowa ira timbuni delo manda manda biago handaru. Ira ogonime iba kuyuma timbuniore dindiha bereago dalu do hundi lowa ai dindini dama irigi hayane handaru.

⁵Ani biyago hondowa i̱na lalu, Aiore Anduane Homogo Bibahende Haru Haame Ho Haga-o anidagua nabuleore. Í̱naga wali agali ti dewa ndo emene ko hongo nahe karunidago í̱na ti mana lalu pani miriyagua nde mani ti agua bialu bayale holobadabe, laru.

⁶Ani larugola nde Anduane Homogo ibugua mini wiadai bialu lalu, Áyu handarigoni tagira naibulebira laya, lene.

⁷Anduane Homogohanda de gandeba tebone walia hayagola handalu hewaria Anduane Homogo ibuni anda hái mbirani hapara ho hearia handaru. Agalime anda bialu howa pu tiga handaga emene mbiraha aeane emene dege mbira pu ngunini pongo biaho helowa anda háidago tigabi kabe hako hayadabe hondole tiga handaga pu heleneyago Anduane Homogohanda yaniaho hearia handaru.

⁸Ani yaniaho howa ibugua i̱hondo lalu, Amoso-o o hendedegoni agiledabe, laya. Ani layagola i̱na ibuhondo ladai bialu lalu, Pu mbira ngunini aeane pongo biahedago hendedo, laru. Ani larugola ibugua i̱hondo ogodagua laya. Pu ogonime i̱naga wali agaliru ti tigabi henedabe be yole henedabe hondolenaga yarugo. Ai anda hái hako hene ula amuhe kaligobi henedane hendedogoni. I̱na mini wiadai bialu dara nahe howa ti pani nelo mulebero.

⁹Isaraele wali agali Aisaganaga aguanene karu tinaga lotu lo ngoai haga dindi wiyadaruni bibahendeore bo gialobagabu wahai holebero. Kini Yaroboamanaga damene karu mbiraore hangubi yu wanahe bo wahaiore holebero laya, lene.

¹⁰Bedele tanoha agali mbira mini Amasaia henego ibu loma binigo mo miaga howa ibugua Isaraele wali agalinaga Kini Yaroboamahondo bi ogodagua lo pelene. Ibugua lalu, Kini-o Amosohanda í̱naga bi hale nahe wahalu í̱la waitigi helo lowa Isaraele wali agaliha ndelope hama ibaga bialu ka. Í̱na ibu ani lalu helo wahariyagua nde ibunaga bi ogonime inanaga dindi ogo mo ko timbuniore holebira.

¹¹Amoso ibugua bi ogodagua laga bialu ka. Kini Yaroboama wai bialu karia agali waime bo wahalu Isaraele wali agali bibahende dindi mendeha garabayabu yalu polebira, lalu kagoni, lene.

¹²Ani lowa Amasaiahanda Amoso hearia puwa ibuhondo lalu, Ngode Datagaliwabenaga bi latagi haga-o í̱ Bedele dindi ogoria nahe áyu ogoniore pialu Yuda dindiha hama dai bibe. Ngode Datagaliwabenaga bi Yuda dindiha howa latagi hama poregola Yuda wali agalime í̱ yolo bilo ani bule pu.

¹³Bedele dindi ogoria howa í̱na bi labelo ina turu nahe kamagoni. Irane dindi ogohayagi kini ibuni lotu haru haga kagoni. Ani bialu Ngode Datagaliwabenaga anda kago Isaraele wali agali bibahendenaga kagoni, lene.

¹⁴Ani layagola Amosohanda ladai bialu lalu, I̱ Ngode Datagaliwabenaga bi mana latagi haga howa maru yolo mialu karuni ale ndo kogoni. I̱ nogo sibi haru hagabi poge irane karu handayaho hagabi kogoni.

¹⁵Ai i̱ninaga biabe uruni bialu hewaria Anduane Homogohanda i̱ dabo helalu bi ogodagua langiya. Í̱ pialu i̱naga Isaraele wali agali karuhondo bi ogodagua lamule pu laya handala ibinigo kogoni.

¹⁶Ani birugo ai i̱na Anduane Homogohanda bi langiyago larogo hale habe. Ibunaga bi Isaraele wali agaliru lamulene yidogo lamuliya nale wahalu pu larigoni.

¹⁷Amasaia-o í̱na ani larigonaga Anduane Homogohanda ibunaga bi podene í̱ha ngeleda. Ani bidagome í̱ one ibu tano ogoha agali page yama ibaga biaga birulebira. Ani bialu bedagola waitigirume ibalu í̱ waneigini bu karuni bibahende bo wahai holebira. Waitigime í̱naga dindi ngeruni karulai howa ti tuwa ta holebira. Tigua í̱ dindi tara Ngode Datagaliwabe manda nabiaga karunaga dindiha garabayabu yalu poragola dindi ogoniha í̱ homolebere. Waitigi uruni tigua Isaraele wali agalirubi dindi taraha garabayabu yalu polebira laya, lalu Amosohanda lene.