Read Huli Obadaia 1 Bible Online

Obadaia 1 - Huli bible

Obadaia 1

¹Anduane Homogo Bibahende Haru Haame kago ibugua Idomo wali agalinaga dindihaore ogodagua bule ngeledo lalu Obadaia ibugua latagi helo lamini. Anduane Homogohanda ibunaga bi lamiaga agali mbira dindi bibahendeha piai hole pu layagola bi latagi hama penego ogoni ibugua bi layago ina hale harima. Ibugua lalu, Idomo baba wai bu mali̱ya manda manda bu halimu, laya.

²Anduane Homogohanda Idomoali hearuhondo lalu, I̱na tínaga hongo bo podalu bope holebero. Anidagua berogola wali agali hameigini tara tara palu karume tí erembira ngialu yo hondolebira.

³Tínaga balagala haga mana ngamigome tíni mo hondo henego kamigoni. Tínaga tano wai pabe ege to̱le̱me bu yu mabu bini kagoni. Tí hari neneha haga kami. Ani howa tíni laga bialu lalu, Ina bope habehe ai haruadabe mbirali naheore ndobe, laga kamigoni.

⁴Anigo i̱na tíhondo langerogo ega bodo hariaweme hari nene daligaoreha pialu hari bareore ngagoria anda bu paliagadagua tígua daligaore yakundi bu karuha anda bu ha kamiyaguabi nde horo mbiru i̱na tí dindini bo haealape holebero.

⁵Pagealime mbiraga ibalu mbirale ti hameleda alego mo yu pialu maru ngelo wahaga ndobe. Ani bialu wali agalime pu mbira mini gerebi lini do wialu howa maru delo wahaga. Anigoyu tí waitigi bu karume ibiragola tí balu bo bibaore hai holebira.

⁶Iso hameigini kamiru tínaga munirubi dabudabu tara tara ngamirubi bibahende mo yu piai holebira.

⁷Hameigini maru tí haru mandagi haga biarume tíhondo ke̱ halu mo hondo holebira. Urunime tí bo batagi haragola tínaga dindi yu wahalu tagira piai holeberami. Hameigini maru tí haru mandagiore haga biarume tíni baba wai bialu tí bope holebira. Tínaga nenegeore tí baba mandagi biruwa tomo naga hayarume tí gonoha dalimulo gono wu holebira. Anidagua gono wedagoha tí do ngamigola uruni tigua lalu, Idomoalirunaga mini giga bulene biago ai agoha ngabe, lolebira,

⁸I̱na Idomo wali agali pani merongi tinaga agali manda timbunibi karuni bibahende bo wahai halu tinaga mini gigabi ngaruni mo ereba hai holebero.

⁹Ani berogola nde Temana tanoali wai bulenenaga manda timbunibi howa bogabiore karuni bibahende gi hai holebira. Ani bialu Iso hameigininaga dindini ami agali hongohe bu karuni ti bibahendebi bo wahai holebero, lalu Anduane Homogohanda laya, lene.

¹⁰Anduane Homogohanda laabo halu lalu, Idomoali tígua tí hamene Yagaba hameigini bu karunaga mbirale wiaru mo pagebu yu piai halu tini homelo bo wahai harimigoni.[1] Ani birimigonaga i̱na tí mo taga timbuniore halu tínaga mini mo ko hai holebero.

¹¹Yudanaga waitigi bu hearume ibalu Yarusaleme tanonaga wai pabe heago bo gialalu anda puwa tanoha munibi dabudabu wiarubi mo yai howa talebu ta haga bialu hearia tígua nde mbirale uruni aria mbira mo ya nabi bame howa Yudabi biamogo bialu mo wia nabi dege harimigoni. Ani birimigome tíbi nde pageali o hayadarubi dege harimigoni ndobe.

¹²Tí hamene Yudahondo mana ko liahe dewaore bialu harimi. Yuda mo ko hayagola tínaga bu miniha turu halu dungulo harimigoni. Ti mo ko hene heagola tígua mine halu handape ho harimi.

¹³I̱naga wali agaliru genda yu heagola tigua tanoha anda puwa tandaga nalu wiagola tí turu haga birimi. Ani bialu tinaga dabudabu bayale wiaru mo yarimi.

¹⁴Tígua hariga gebaga wigi biagoria handayaho howa Yuda wali agali ibida pole pugu biyaria tígua minu yania haga buwa tinaga waitigi hearuhondo minu migi birimigoni. Tígua mana urunidagua bialu harimigo mana koorene ko birimigoni, lene.

¹⁵Anduane Homogohanda laabo halu lalu, Horo mbira i̱na wali agali bibahende dabaki bulene winigo ai ibulene kaware haragoni. Idomo wali agaliru-o tígua maruhondo birimidagua tínihondo nde anidagua dege bulebira. Tígua mana ko birimigonaga pani tínihondo biadai bulebira.

¹⁶Ainde i̱naga wali agali bibahende i̱ninaga Hari Saiono loma bia hene biagoria bu haga hearuhondo pani iba kaubi ale nelo mirugoni ndobe. Ani birudagua wali agali hameigini dindi tara tarani bu karuni tibi nde pani nelo iba kau timbunibi ale hambu mulebero. Ani merogola ti iba ogoni nai halu bibahende biba haiore helolebero, lene.

¹⁷Anduane Homogohanda laabo halu lalu, Wali agali maru Hari Saiononi yu wahene karu ti mo ko nahe bayale halu i̱ninaga Hari Saionobi loma bia hene bayale haabo holebira. Yagaba aguanene bu karu tinaga dindi i̱na mirugobi tinime mo yu dai bialu karulo holebira.

¹⁸Ani howa wali agali Yagaba aguanene bu karubi ibu igini Yosebe aguanene bu karubi ti gibiore ira hungu bialuhe ale howa irame dangi gabuni yobi ngagoha ira hedope haragola hungu kiau lalu emene hangubi mbira ibira nahe do mundulo ai̱ hagadagua bialu tigua Iso hameigini mbiraore hangubi mbira yu wanahe bo hilo wahai holebira. I̱ Anduane Homogo i̱na bi o ledogoniore.

¹⁹Isaraele wali agali Yuda dindinaga abene unurahayagi dindi hobane mini Negebe ngagoria karu tigua Idomo dindiha Isonaga hari ngaru karulo holebira. Ani bialu Yuda wali agali ni paliragohayagi hari bare bare ngaruha haga bidaru tigua Pilidia wali agalinaga dindi ngago karulo holebira. Ani bialu Isaraele wali agali marume Eberaimi hameiginirunaga dindi ngago karulalu Samaria dindibi karulolebira. Beniyamini hameiginirume dindi iba Yodana doma edeyagi ni tagira ibiragohayagi Gileada dindi hobane ngagobi karulai holebira.

²⁰Isaraele wali agali dindi abene uyurahayagi haga karu ti nde dindi taraha garabaya pu hayago golaragola tini dalu dai bulebira. Dai buwa tigua Ponisia hameiginirunaga dindi ngago karulaga bima pialu uyuraore Sarebada tano ngagoria puabo holebira. Yarusaleme wali agali Sadisi tanoni garabaya pu hayaru ti garabaya golalu dai bialu Negebe dindiha tano bu ngaru karulai holebira.

²¹Yarusaleme agali wai bialu wayali hayarume Idomo dindiha pialu wai buwa Idomo wali agalirunaga dindi hari ngaru ti karulo howa tigua handayaho holebira. Ani kagola i̱ Anduane Homogo i̱ni tinaga kini holebero, lalu Anduane Homogohanda Obadaiaha howa latagi hene.