Read Huli Yona 2 Bible Online

Yona 2 - Huli bible

Yona 2

¹Unuraore wena tombeneni wuwa Yonahanda Anduane Homogo ibunaga Ngode Datagaliwabehondo bi lamini.

²Anduane Homogo-o ai mini burugulo wuwa i̱na í̱ olarugo hale halu ladai biri. Unuraore homa dindiha hewaria í̱na i̱ biamogo bia lalu yi lalu kogoni í̱ hale ho kegoni.

³Í̱na i̱ iba solowara uli gibiore unuraha nalene hiriribi wiagoria minu bape harigoni. Ogoriani iba gibi berearume i̱ biruyu mabu bialu iba yaribu timbuni hongohe ibilarirume i̱ yu mabu bu hinaga bialu hayagoni.

⁴I̱na manda bialu hewaria ainde í̱naga wanakui nahondoleneniore minu wahalu í̱naga anda baya burugule biagobi hondo dai nabuliyanagaore birida, lene.

⁵Ai iba berearume i̱ berewagoria ibalu namu lalu solowara berearume i̱ bira dambiore ho wahayagoni. Iba gagua wiarumebi ibalu i̱naga haguane hubabu mabu biyagoni.

⁶I̱ dindi nalene hari pini panga paya tagiho wiaho wiaabo haga mbiraha pupe ho harugoni. Ani bu hewago hondowa Anduane Homogo i̱naga Ngode Datagaliwabe-o í̱na i̱ unura homoleneha hewaria haru dai bu helarigoni.

⁷I̱ homolene anda ibayuago hondowa ai Anduane Homogo í̱hondo bi langirugoni. Ani birugola í̱na í̱naga anda baya burugule biagoria howa hale harigoni.

⁸Maru ti mbirale nahabane bi pupu wule gime wabinigohondo bi pupu wiaga karume tinaga galone mbira bia holiya larego bia naholebira manda buwa í̱naga bi mo wahaga.

⁹Anigo i̱na í̱naga mini yaraga halu iba gana lalu mbirale mbira í̱hondo bo lomabia ho ngulebero. Ani bialu i̱na mbirale bule laruru biaore bulebero. Gini miaganebi biamogo biaganebi haru halu tagira ibaganebi pele miaganebi Anduane Homogo ibuha nga, lalu lene.

¹⁰Ani layagola Anduane Homogohanda wena timbuni biagohondo, Yona ede iba angeni puwa magu tagu batagiha, lene. Ani laya handala wena biagome puwa Yona iba angeni magu tagu batagihe lene.