Read Huli Dagalenego 1 Bible Online

Dagalenego 1 - Huli bible

Dagalenego 1

¹Isaraele wali agali ti Iyibi dindi wahalu tagira penego mali mendegonaga ege mendeni horo mbira hayagola Sainai dindi ko yobi iba dalu naibaga wiagoria Anduane Homogohanda ibunaga Balai Anda heagoha howa Mosesela bi lene.

²Anduane Homogohanda lalu, Í̱ Aronola libugua Isaraele agali karu dagalalu tinaga mini gilibu wiai halibu. Mini gilibu wialu ti damene mbira mbira hayadagua hameigini hangu hangu dagalalu gilibu wiai halibu.

³Agali maru ami agali habehe mali pira kira (20) bolangua hene karu dagalai halibu.

⁴Ani bialu libuni biamogo bilonaga agali hameigini kadagua agali haguane mbira mbira dabo helalibu, Anduane Homogohanda lene.

⁵Ani lowa lalu agali haguane maru libu biamogo bilonaga dabo helenedaruni uru. Lubene aria Sederu igini Elisu helene. Simiono aria Surisadai igini Selumiele helene. Yuda aria Aminadaba igini Nasono helene. Isaga aria Suara igini Nedanele helene. Sebulunu aria Helono igini Eliaba helene. Eberaimi aria Amihudu igini Elisama helene. Manase aria Pedasu igini Gamaliele helene. Beniyamini aria Gidioni igini Abidana helene. Dana aria Amisadai igini Ahiese helene. Ase aria Ogorana igini Pagiele helene. Gada aria Duele igini Eliasaba helene. Nabadali aria Enana igini Ahira helene.

¹⁷Ani lamiyagola hale howa Mosese ibugua Isaraele agali hameigini mbira mbiranaga agali haguane uruni ti ibilo olo ngoai hene.

¹⁸Ibiyagola Mosese Aronobi agali haguane homberiali (12) dabo helayarubi tigua ege mendegonaga horo mbira hayagola Isaraele wali agali bibahende íbu ngoai hadaba layagola ti bibahende íbu ngoai hene. Ani ibiyagola agali haguane biaru tigua bibahendenaga mini tini hameigini hayadagua gilibu wigi wigi bini. Ani bialu agali mali pira kira (20) bolangua hene agira kabe hondole dagalalu tinaga mini gilibu wini.

¹⁹Anduane Homogohanda ala Sainai dindi ko iba dalu naibaga wiagoria Mosesehondo lamiyadagua ani biai hene.

²⁰Ani bialu agali mali pira kira (20) hayarubi maru pira kira bolangua hene hayarubi bibahende ami agali habehe biaru mini gilibu wialu dagalai hene. Tigua ani bule howa hameigini mbira mbira aba igini mbira mbira headagua agali ami habeheru Yagaba igini wahene Lubene hameigini howa ala dagalalu mini gilibu wini. Agali hameigini headagua tinaga mini ogodagua gilibu wini. Lubene aria daosini dege pira mariani waragaria halu handari duria (46,500) bibahende hene. Simiono aria daosini dege pira duriani dira halu handari tebira (59,300) bibahende hene. Gada aria daosini dege pira mariani duria halu handari waragaria pira duria (45,650) bibahende hene. Yuda aria daosini dege pira kariani maria halu handari waragaria (74,600) bibahende hene. Isaga aria daosini dege pira duriani maria halu handari maria (54,400) bibahende hene. Sebulunu aria daosini dege pira duriani karia halu handari maria (57,400) hene. Eberaimi aria daosini dege pira mariani handari duria (40,500) bibahende hene. Manase aria daosini(...)

⁴⁷Tigua agali bibahendenaga mini dagalalu gilibu wiai hayangi hameigini mbiraore Libai ibu aria dege dagalalu nagilibu wini.

⁴⁸Anidagua binidagoni irane abale Anduane Homogohanda Mosesehondo lamialu lalu,

⁴⁹Í̱na ami agali habehe karu dagalalu mini gilibu wialu howa Libai hameigini ti dege mini gili bialu daga lamaga nahabe.

⁵⁰Ani bulene nawiore. Libai hameigini tigua i̱naga Balai Anda kagoha biabe bialu howa anda ogoni handayaho haga helo helabe. Ani helowa tininaga balai andabi i̱naga bu heledagoria dege mandagi helo lenelene bu mabu bidaba labe.

⁵¹Tígua dindi mbirani balai anda bu harimigo gialo yalu dindi mendeha poramingi i̱naga Balai Anda kagobi mbirale i̱ anda ogoniha wini ngarubi bibahende Libai agali karume mo yalu pugu bilo. Agali maru Libai hameigini aria ndo kamiru tígua i̱naga Balai Anda kagoria haparaho harimiyagua nde tíni homolene nga.

⁵²Isaraeleali hameigini maru kamiru tí nde tíninaga hameigini emene hagahaga birimidagua balai anda bu hagahaga buwa tíni hameigininaga pelagi helagalaga bilimu.

⁵³Anigo Libai hameigini tigua dege tinaga balai anda i̱naga Balai Anda kagoria buyu mabu buwa anda ogoni handayaho helo. Ai bi larugo mo wahalu mbirali i̱naga Balai Anda ogoni kagoha pialu karia i̱naga keba holene timbu halu Isaraele wali agali bo wahai holigo Libai aria tigua i̱naga Balai Anda mamage helo helolene nga, lene.

⁵⁴Ani layagola hale howa Mosese ibugua bi uruni Isaraele wali agaliruhondo lamiyagola tigua Anduane Homogohanda layadagua talialu biai hene.