Read Huli Dagalenego 14 Bible Online

Dagalenego 14 - Huli bible

Dagalenego 14

¹Ogonibi layago hale halu mbiraga howa wali agali biarume gi̱gi̱ lalu dugu bialu hangu heane gao lene.

²Tigua dugu bialu howa Mosese Aronolahondo lalu, Iyibi dindiniyaguabi dindi ko wali agali nahaga ogorianiyaguabi homedemale karulapedale.

³Anduane Homogohanda dindi ogoniha agibule haru piaruabe. Tigua ina bo wahai halu inanaga one waneiginiru ti haru holebada. Ogoria howa Iyibi dindi dai bulenebi ko ndo dege, lene.

⁴Ani lowa tini dege dege lamigimigi bialu howa lalu, Iyibi dai bimi̱ya haru bamba holene agali mbirali dabama, lene.

⁵Ani laga biyagola Mosese Aronolame wali agali biaru wanakuini bulu palu ibira hene.

⁶Ani biyagola agali dindi hondo wule piyago aria kirali Nunu igini Yosuala Yabune igini Kalebelame genda timbuni howa libuninaga aga budaki haga haga bini.

⁷Ani buwa libugua wali agali hearuhondo lalu, Dindi iname handarimadagoni baya gibiore handarima.

⁸Anduane Homogo ibugua ina heba turu kayagua dindi bayale ibane bere ogoni ina ngulebira.

⁹Anduane Homogohondo mine howa yu wa nahadababe wali agali odaruni hondowa gibi nahadababe bame balu dindi karuloleberamago. Anduane Homogo ibugua ina heba howa ti dama lowa mbirale irame wabiniruhondo bi pupu wialu hearuni balu ina wayali holeberamago gi nahadababe, lene.

¹⁰Ani layagola wali agali bibahende hearume Yosua Kalebela to̱le̱me balu homelole hongo howa hene. Ani bule bialu hemira Anduane Homogonaga wá holene timbuni Balai Anda biagoria íbu hayago hondowa ogolabo ba nabi wahene.

¹¹Anduane Homogohanda Mosesehondo lalu, Wali agali urume i̱naga bi agira halu mo waholebirabe. I̱na nahendene ale dewaore birugolabi hondowa tigua i̱hondo mini mbiraore nawi kago agibe.

¹²Ani biragonaga warago ko mbira ti kagoria ibilowa bo wahai halu í̱ dege wali agali maha holebirarunaga aguanene heloliya. Wali agali odaruni áyu karubi ndo hongohe dewaore helolebero, lene.

¹³Ani layagoyu Mosesehanda Anduane Homogohondo lalu, Í̱ninaga hongome wali agali uruni Iyibi dindi howa haru halu tagira ibirigoni. Iyibi wali agalirume í̱ninaga wali agali biaruhondo ogodagua biriya larago hale howa tigua wali agali ogoria padaruhondo lamulebira.

¹⁴Wali agali ogoria karume Anduane Homogo í̱ ina heba ke lo mandabu ka. Í̱niore ibuwa hari beralibaha howa ha pani haga kelo manda bida. Ani buwa horombengi hari beralibaha íbu halu mbiraga ira hunguha íbu howa ina halu bamba haga kelo manda bida.

¹⁵Áyu í̱na wali agali uru bibahende bo wahai hariyagua wali agali dindi bibahendeni howa í̱na dewa biriru hale hayarume ogodagua lolebada.

¹⁶Tinaga Anduane Homogohanda ibunaga wali agali haru halu ibiyaru ibunime dindi mulebero lo wiyagoria haru polene hongo nakarulapeyagola bibahende dindi ko wali agali nahe ogoha bo wahai hayada lolebada.

¹⁷Ani lolebadago Anduane Homogo-o í̱naga hongo biago áyu walia halu bulebero lalu lo wirigodagua bibelo hameledo.

¹⁸Í̱na bi ogodagua larigoni Anduane Homogo i̱ emene mbirame abale mo lembo nahaga ko. I̱na gubalini holeneorebi mini bilinahebi kagua bialu i̱ baba wai birarubi biadai nabiruli. Ani anigo tinaga waneigini mani hararu daba tebone mane dabanibi ti aba ai̱yarume ko biragonaga tandaga naho wiaabo holebira, larigoni.

¹⁹Anigo Anduane Homogo-o í̱naga gubalini holene beregeda nabiaga luniore wirigome wali agali Iyibi yu wahalu ibalu howa ko biragola domarilidagua áyu birarubi domabe laro, lalu Mosesehanda lene.

²⁰Anduane Homogo ibugua ladai bialu lalu, Í̱na bia laridagua tigua ko biyaru domo waharu.

²¹Ani buleberogoyu bi henene buleberodagua mbira lo wero. I̱ninaga haabo holenebi wá holenebi hongo holenebi dindi bibahendeha wiame kagome bule ledogo biaore bulebero.

²²Wali agali mine haga uruni damenego bibahende dindi ngulebero larugoria anda napolebira. I̱naga wá holenebi nahendene ale Iyibini howa birurubi dindi ko wali agali nahe ogoria howa birugobi handaya. Ani hondowa dege i̱naga bi larugo hale naholene halu i̱ ba hondolene pi halu bialu i̱ mo genda haya.

²³Tinaga mamaliruhondo dindi ngulebero lo wirugoria anda napolebira. I̱ yo handaga biaru damene bibahende anda napolebira.

²⁴Anigoyu i̱naga biabe biahaga Kalebe ibunaga mana bayale biyagonagabi ibugua i̱ yu wanahe i̱la haabo hayagonagabi dindi biago hendelo ibu haru anda polebero. Haru anda pialu dindi ibugua hondo wima ibaga biyago ibunibi ibunaga aguanenerubi ti helo mulebero.

²⁵Dindi ogoriani Amalegealiru Kenanalirubi ti áyu padagoni. Ai yawi beregedalu wali agali nahe biahayagi dai bilimu. Ani buwa iba solowara Daramabi bedagoha Agabahayagi pilimu, lene.

²⁶Anduane Homogohanda Mosese Aronolahondo lalu,

²⁷Wali agali ko urunime i̱hondo gimigomo lalu karuni angi lairi holobadabe. Tinaga gimigomo ogoni haruore hale ko.

²⁸Ai Anduane Homogo i̱ heneneore haabo haga kogome larodagua libugua lamidaba. Tígua i̱hondo hale harimiru dege tíhondo i̱na bulebero. I̱ Anduane Homogo i̱na bi o ledogoniore.

²⁹Homaramigola tínaga tingini hangu dindi ko wali agali nahe ngagoria homopaya bima polebira. I̱hondo gimigomo larimigo yasianaga daga layangi bibahende mali pira kira (20) bolangua hene kamigo dindi ngulebero larugoria anda napoleberami.

³⁰Tí dindi ogoriani halimulo ngulebero lalu lo wirugo napoleberami. Kalebe Yosuala libu hangu anda polebira.

³¹Tígua lalu tínaga waneigini wai tigialime karulai holebira lalu dindi ogonibi tí manga larimigoyu i̱na tínaga waneigini karulelo haru halu anda polebero. Ani berogola tigua tinaga dindi henene ogoniha turuho holebira.

³²Tí kamiru nde dindi ko wali agali nahe ogoha homai holeberami.

³³Tígua mini mbiraore nawirimigonaga tínaga waneiginirume pani nalu mali pira maria (40) dindi ko wali agali nahaga ogoha ibaga hangu bialu tí wahe kamiru bibahendeore homamaro bilimulo ibaga bialu haabo holebira.

³⁴Dindi biago de hondo wule pialu hemiria horo pira maria (40) piyagonaga mali mbira horo mbira biagonaga dagalo ngido. Kagua birimigonaga mali pira maria (40) pani naabo halu holeberami. Mali ogonibi ngerogonime tí heba i̱na keba ogobi kada lo manda bilimulonaga bido.

³⁵I̱na heneneore larogo wali agalime kagua bule mini mbira ho karu i̱na dindi ko wali agali nahe o ngaruha homamaro bilolebero. I̱ Anduane Homogo i̱na bi o ledogoniore, lalu lene.

³⁶Mosesehanda ala agali maru dindi hondo wule pudaba layarume handalu dai buwa wali agali hearu mo hondo howa lalu, Dindi ogoni kooreya layarume wali agali bu hearu Anduane Homogohondo mo gimigomo la hene. Anigo mo hondo hagadaruni Anduane Homogohanda abaleore waragome bo homelai hene.

³⁸Agali dindi hondo wule pene biaru aria homai halu Yosua Kalebela hangu yupe howa helene.

³⁹Mosese ibugua Anduane Homogohanda layadagua lamiyagola Isaraele wali agali biarume dugu ndoore gibi bini.

⁴⁰Ani buwa tigua lalu, Ai dugu timbuniore birimagoni ko birima lalu mo walia harimagoni lowa egerebagi hayagola tigua wali agali hariha palearu baba wai bule pene.

⁴¹Ani pole piyagola Mosese ibugua tihondo lalu, Anduane Homogonaga bi mo wahalu poramigo agibe. O beramigonime wayali naholeberami.

⁴²Anduane Homogo tí heba nahego napudababe tínaga waitigi

⁴³Amelegeali Kenanaliru baba wai beramigola homoleberami. Tígua Anduane Homogohanda bia layadagua nabi waharimigome ibu tí heba naholebira, lene.

⁴⁴Ani layagola helalu Mosesebi Anduane Homogonaga Habo Nalolene Bi lo winigonaga Mbogoyi biagobi anda bu harimigoria ngelalu napobe layagoyu tini ti hongo timbuniore halu pene.

⁴⁵Ani pialu hearia Amelegeali Kenanalibi paleneyarume bama talima puabo halu Homa tanoha bo porabia hene.