Read Huli Dagalenego 7 Bible Online

Dagalenego 7 - Huli bible

Dagalenego 7

¹Mosese ibugua Anduane Homogonaga Balai Anda biago bu helene. Balai Anda ogoni biai hayadangi dege anda biagobi mbirale ogoniha wiarubi lomabu delaga dabu biagobi mbirale dabu ogoriani biabe biaga wiarubi bibahende Anduane Homogo ibunaga wiabagi heneore ngelonaga weli odo ha̱i̱ haga winiyago mo yuwa odo ha̱i̱ haga bini.

²Ani biyagola Isaraele hameigini mbira mbiranaga agali haguane mbira mbira hayadagua tigua tinaga loma biniru Anduane Homogohondo mule yalu ibugu bini. Agali haguane uruni ti Isaraeleali agali henego dege ibini. Isaraele wali agalinaga mini gili bialu agali dagalayago biabe agali uruni tigua haru bamba howa handayaho hene.

³Agali uruni tigua tinaga loma biniru Anduane Homogohondo mule yalu ibiyaru uru ale. Dabudabu yulene garo ale waragaria yalu ibalu nogo bulumaga homberia (12) haru ha bialu Anduane Homogonaga Balai Anda heagoria ibuwa ibunihondo mini. Dabudabu yulene garo mbirago agali kiralime lomabu mule yalu ibalu nogo bulumaga mbira dege dege agali haguane tini hangu hangu ta howa haru halu uruni bibahende Anduane Homogohondo lomabu mule ibini.

⁴Tigua mbirale yalu ibai hayagola Anduane Homogohanda Mosesehondo lamialu lalu,

⁵Tigua mbirale lomabu yalu ibiyaru yamuwa Mosese í̱na Libai hameigini karume Balai Andaha biabe bulene ngadagua bilo uruni bibahende tigua mo yulene wulebirago tihondo mo mibe, lene.

⁶Ani lamiyagola Mosese ibugua dabudabu yulene garo biarubi nogo bulumaga biarubi Libai hameigini hearuhondo mini.

⁷Ibugua dabudabu yulene garo kira mialu nogo bulumaga maria lowa Gesono aria hearu tinaga biabe bulene wiaru bilo mini.

⁸Ani bialu Merari aria hearu tinaga biabe bulene wiago bilonaga dabudabu yulene garo maria mialu nogo bulumaga halira lowa mini. Ani mialu Arono igini Idama ibugua Merari aria hearunaga biabe bulene wiago haru howa biabe bilonaga handayaho hene.

⁹Anigo Kohada aria hearu tigua bulenego duniniore payani hangu yulene wiagola Mosesehanda nogo bulumaga dabudabu yulene garo mbira nami wahene.

¹⁰Lomabu delaga dabu biago Anduane Homogonagaore helo loma biaho ngelolene horoore hayagola Isaraeleali agali haguane hearu tigua loma biniru mo yalu ibini. Agali haguane uruni tigua loma ogobi dege dege yalu ibugu bini. Tigua ndisi be silibame wabini genda magi kilogarama mbira bolanguahe dege dege yalu ibini. Ani bialu beledi mbira dege dege genda magi garama handari halira (800) silibame wabinigo yalu ibini. Ani yalu ibalu howa ndisi be ogonihabi beledi ogonihabi balawa bayaleoreru olibe lininaga weli wiago odo biamaga howa widi lomabu mule yalu ibugu ibugu bini. Ani bialu agali haguane mbira mbira biaru tigua beledi ngolome wabini baya taraoreru genda magi garama handari mbirani pira (110) yalu ibugu ibugu bini. Beledi ngolome wabini ogoriani ira hagua ngabilo delaga inisenesiru wu to̱lowa ogobi dege dege yalu ibuwa migi bini. Ani bialu agali haguane mbira mbira uruni tigua nogo bulumaga wangabe dalua mbirabi sibi wangabe dalua mbirabi sibi igini hongolo mali mbira hangu pene mbirabi bo loma buwa (...)

⁸⁴Ani biai heagola tigua agali haguane homberia (12) biarume mbirale bibahende lomabu mulebi lomabu delaga dabu biagobi Anduane Homogonagaore helo lomabia holebi mbirale yalu ibiyaru damenego daga ogodagua silibame wabini ndisi homberia beledi homberia dege dege lowa wini.

⁸⁵Ndisinaga genda magibi beledinaga genda magibi biamaga howa handalu hemiria kilogarama pira kirani halira (28) hene.

⁸⁶Beledi ngolome wabini homberia (12) biarunaga genda magi garama daosini mbirani handari tebirani pira kira (1,320) hayane hendene. Beledi uruni mbira mbira bibahendeni ira hagua ngabilo delaga mini inisenesi dewa berelowa yu ibinigobi wini.

⁸⁷Ani bialu nogo bulumaga wangabe homberia (12) sibi wangabe homberia (12) dege haru ibalu sibi igini hungubalua mali mbira hangu pene homberiabi (12) loma irani dai helo lomabu bo delole haru íbu helene. Ani buwa widi lomabu delolenebi nogo uruni heba lomabu delamaga hole yu ibalu ngela dege bini. Ani bialu ko domo wahelonaga nogo meme lomabu bo delole homberiabi (12) haru íbu helene.

⁸⁸Ani bialu Anduane Homogola ho gimbu bulenaga loma buwa bo delole nogo bulumaga wangabe pira kirani mariabi (24) sibi wangabe dege pira waragariabi (60) meme wangabe pira waragariabi (60) haru íbu helalu sibi igini hongolo mali mbira hangu pene pira waragariabi (60) bibahende anidagua loma buwa bo delole haru halu ibugu ibini. Ani bialu tigua lomabu delagane dabu biago ala Anduane Homogo ibuninagaore helo mo loma biaho ngelene. Ani biai howa mbirale uruni bibahendeore Anduane Homogohondo mo lomabu miai hene.

⁸⁹Mosese ibu Anduane Homogo heba bi lole Balai Anda heagoha anda puwa Habo Nalolenenaga Bi lo winigonaga Mbogoyi panga ngagoria dahuliyali handalehe kira nguni mende mendelani handa ai̱ na̱i̱ bu heleago dombeneni wali agalinaga ko domaga ngagoria Mosese ibugua Anduane Homogo bi larago hale haga hene.