Read Huli Dagalenego 9 Bible Online

Dagalenego 9 - Huli bible

Dagalenego 9

¹Isaraele wali agali ti Iyibi dindi wahalu tagira pu heane mali mendegonaga ege mbira hayagola ti Sainai dindi ko iba dalu naibaga wiagoria hene. Ani heagola Anduane Homogohanda Mosese lamialu lalu,

²Ege áyu kamagonaga horo dene (14) laragola alendohayagi Isaraele wali agali bibahendeme nogo sibi igini loma bialu bo dawalimu. Ani bialu horo i̱na tí mo wialu pelarugo mitangi bialu tomo naga mana wiyadagua bialu bo dawalu nalimu. Tomo ogoni horo ogoningiore nolene nga. Tígua tomo ogoni nalu howa mana biaga wiyarunidagua bialu nalimu, lene.

⁴Ani layagola Mosese ibugua Isaraele wali agali lamialu, Bolangua Halu Penegonaga Horo mitangi bialu tomo nagane winigo nami̱ya, lalu lamini.

⁵Ani lowa ege mbiranaga horo dene (14) ogoningi alendo hayagola Isaraele wali agali tigua Sainai dindi ko iba dalu naibaga wiagoria howa tomo ogoni dawa nene. Ani bialu howa Isaraele wali agali tigua Anduane Homogohanda Mosesehondo ogodagua bilimu lalu lamiyago biai hene.

⁶Anigo agali marume wali agali homene tingini wiaru ela haga hearu ti Ngode Datagaliwabenaga deni bayale ndo dodohe hene. Ani howa uruni tigua Bolangua Halu Penegonaga Horo mitangi bialu tomo ogoni nabe nahe hene. Aniyagola tigua Mosese Aronola hearia puwa

⁷libuhondo lamialu lalu, Iname homenerunaga tingini ela howa ina Ngode Datagaliwabenaga deni bayale ndo dodoheore kama. Ani kamago ai ina wali agali maru karu baba mandagi mo mogobu biruwa Anduane Homogohondo loma ogoni bo mibe nahedago irane aginagabe, lalu hale hene.

⁸Ani hale hayagola Mosese ibugua ladai bialu lalu, I̱na Anduane Homogo ala hale holiya emene hondo hadaba, lene.

⁹Ani layagola Anduane Homogo ibugua Mosesehondo lalu,

¹⁰Í̱na Isaraele wali agaliru bi ogodagua lamibe. Tí kamiruni ariamebi tínaga aguanene holebirarumebi tí bibahende homa ela howa i̱naga deni bayale ndo dodohe kamiyaguabi dindi taraha ibaga bialu pirimiyaguabi urunidagua buwa Bolangua Halu Penegonaga Horo mitangi bialu tomo nolene wiyaru noa biyagua nde nolene nga.

¹¹Tígua tomo nolene ogoni ege mendegonaga horo dene (14) ogoningi alendo haragola dawalu nolene nga. Tígua nogo sibi igini bo dawa nalu mberedi yidi nahe hirini ngago nalu palena ale kaubigo dugu peha buwa ogoni heba nolene nga.

¹²Bolangua Halu Penegonaga tomo ogoni dawa nalu biruwa mana biaga wiyaru biaiore holene nga. Nogo sibi balu naramigo aria podo ibira hene iriria maru yawi nole nawilimu. Nogo podalu howa kuni podolani napodalimu.

¹³Anigo agali maru ti i̱naga deni ko mbira nawi bayale howabi dindi mendeha ibaga bima tagira nape howabi tigua ege áyu ogonaga Bolangua Halu Penegonaga tomo dawalu nolene ngago nane hayagua ti i̱naga wali agali bu karuni aria ndo ti tara kago i̱naga wali agali baba mandagi nahelo bo taliatagi halimu. Anidagua larogoni irane tigua i̱hondo lomabu ngulene horo wiyangi ngulenego nangi manga haragoninaga ani bilimu. Anidagua bo batagi haramigola mana ko tini biyagonaga genda tinime yu helo anidagua bilimu.

¹⁴Ainde wali agali dindi tara howa ibini tí baba mandagi kayagua tiguabi tomo tí naramidagua noa biyagua nde nalu mana biaga wiyaru dege talialu biai holene nga, lene.

¹⁵Anduane Homogonaga Balai Anda biago biai hayadangi beraliba mbirame ibuwa anda biago yi hene. Mbiraga hayagola beraliba biagoni ira dene ngaralo wiradagua bini.

¹⁷Beraliba biagome Balai Anda biago helalu piyagola Isaraele wali agali tinaga andabi gialo hubua bialu puwa beraliba biago dalu wiyagoria tinaga anda bu hene.

¹⁸Anduane Homogohanda, Pilimu, layadaguabi, Halimu, layadaguabi tigua anda gialo yalu pialu anda bu haga bini. Beraliba biagome Anduane Homogonaga Balai Andani wiaabo hayagua wali agali tibi hama ogoriani haabo hene.

¹⁹Beraliba biagome Balai Anda biago helalu pu a̱i̱ nahe haabo hayagua tigua Anduane Homogonaga bi hale halu pu a̱i̱ na̱i̱ nabiaga ogoriani haabo hene.

²⁰Marungi horo dewa nahaga biradagoni bibahende anda gialalu piyaguabi nape hondo hayaguabi Anduane Homogonaga bi hale howa layadagua hangu biaga hene.

²¹Horo marungi alendo hangu ibalu egerebagi hayagola heyalu piaga. Beraliba biago ema bialu piyagola wali agali tibi nde piaga hene.

²²Horo kiru hayaguabi ege mbira hayaguabi mali mbira hayaguabi ndo mali dewa hayaguabi hayadagoni beraliba biagome Balai Anda biago yiho wiagola ogoriani haho wialu beraliba biagome ema bialu piyagola wali agali tibi piaga hene.

²³Anduane Homogohanda anda bidaba lalubi gialo yalu pudaba lalubi Mosesehondo bi lamiyagola wali agali tigua hale halu biaga hene.