Read Huli Nahumu 1 Bible Online

Nahumu 1 - Huli bible

Nahumu 1

¹Anduane Homogonaga bi mana haga agali Nahumu ibugua de gandeba handalu hearia Anduane Homogohanda bi lamini. Nahumu ibu Elegosoali henego howa tano dunini timbuni Niniba wiagonaga de gandeba hendene.

²Anduane Homogo ibuni Ngode Datagaliwabeore howa wali agalime mbirale dama mitangi bialu gime wabini bu ngaruhondo bi pupu wialu helo ibugua henge namiaga ka. Ibugua wali agali ibuhondo mine haga karu pani mialu minu bagaore ka. Ibugua uruni biaga karuhondo keba howa tini ko biyagonaga yolo miaga ka.

³Anduane Homogo ibu keba abale tongolope nahaga ka. Anigo ibu hongoheore howa ibugua wali agali mana ko biaga karu pani nelo miagaore ka. Anduane Homogo ibu poragoha iba dalubi puyabu dalu dindigunibi ti haru piaga. Beraliba ibunaga geha be abalu tau laradagua biaga.

⁴Ibugua iba solowara bedagohondo hundia laragola bibahende hundu tegelaga. Iba timbuni pedarubi hundiai helaga ka. Mabu bayale Basana dindini ngarubi Hari Kameloha ira bayale karubi palawaya bayaleru Lebanono dindini anda ho karubi uruni bibahende Anduane Homogohanda mo gaula hai helaga.

⁵Anduane Homogonaga deni howa hari timbuni wedarume ema biai halu hari emene ngaru do elai halu iba poradagua biaga. Anduane Homogo ha pani haga birangi dindi bibahende ema biagimbu bialu wali agali bibahendeore mogo lalu duru lai haga.

⁶Anduane Homogohanda keba ho kangi mbirali ai ibu bayale habehebe. Ibugua mo ko holene ibilarangi mbirali ai ibu yo pobehebe. Ibugua keba howa ibunaga de daramabi ira hungu ale kagola ege to̱le̱ ngaru dodahole bialu be abalu haga.

⁷Anduane Homogohanda inahondo bayaleore biaga ka. Genda tagira ibirangi ibunaga wali agali bu karunaga ha do anda ibuni kagoni. Wali agali ibuni karia poraru ibugua ti biamogo biaga ka.

⁸Ibu iba li hongohe poraligobi howa ibugua Niniba tano bo gialahole bialu mo ko hai holebira. Mbirali ibunaga bi mo wahaga karu homelo bo wahai haga ka.

⁹Waitigi kamiru tígua Anduane Homogohondo agile bulene paraho bi lalu kamibe. Tí bibahende bo wahai holenego dege manda bu halimu. Mbiralime ibuhondo ko haluki bulene nawiore.

¹⁰Tí lulu iba nowa luluyu haradagua kamiria ibugua tí bibahende mbirale anihe kenda polene ale ngaru irani delagadagua delalu dangi yobi ngaru delaradagua bialu tí bo delai holebira.

¹¹Ninibali kamiru aria mbirame mini ko wu howa ibugua Anduane Homogo mo ko hole lowa bi lalu hea.

¹²Ani layagoyu Anduane Homogohanda ibunaga Isaraele wali agaliruhondo lalu, Asiria wali agali áyu hongohe dewaore ha kagonigo mani i̱na ti bo biba halu erebahai helolebero. I̱naga wali agaliru tíha genda timbuni i̱nime mo wia harugo ai uruni bibahende mani lone nawulebira.

¹³Asirialime tí handayaho ha hayagonigo ainde áyu i̱na tinaga hongo bope harogola tigua tí lone garabaya nabulebira, laya.

¹⁴Anduane Homogohanda Asirialiruhondo bi hongohe mbira lo wialu lalu, Tínaga aguaneneru yu wahene mbiraore hangubi mani naholebiraore. Tínaga bi pupu wiaga anda bu karuha mbirale dama mitangi bialu bi pupu wule gime wabu ngamiruni bibahende bo gingirulo bagabu wahaiore holebero. Tí koorene ko dindini habe nahedago tínaga homali ina manda manda bu wia kogoni.

¹⁵De handadaba. Agali mbira bi bayale galoneore mbira yalu amu hari nene ngagoria howa dalipe halu ibiragoni. Ibugua lalu, Iname wai biai halu wayali harimagoni, lalu lama ibiragoni. Anigo Yuda wali agali tígua horo dunini mbira íbu ngoai haga wirangi ngoai halu Ngode Datagaliwabe ibunihondo mitangi bialu lotu lalu halimu. Ani bialu mbirale maru ibuhondo mule lalu lo wirimiruni ibuhondo milimu. Ani beramigola agali ko biaga karume tínaga dindi lone karulole naibulebira. Ngode Datagaliwabehanda ti bo wahaiore haya.