Read Huli Nahumu 2 Bible Online

Nahumu 2 - Huli bible

Nahumu 2

¹Waitigirume ibalu tí mo ko hai halu tínaga mbirale wimiru mo yu piai hayagoyu ai Anduane Homogohanda Isaraele lone mini lene ala haraligobi heladai bilolebira. Ninibaliru-o tínaga waitigime tí baba wai bule ibiragoni. Tí mo ko halu bo wahai haga biaru kaware ibiragoni. Tanoha ami agali mamage haga karume tanonaga wai pabe andani mamage helo heladaba. Hariga tene ngaruha mamage haga haga bidaba. Ani bialu wai bule hongo howa manda manda bu hadaba.

³Waitigirume wai humbi daramabi yalu tinaga wai yáribi daramabi dege mo karulai halu tí baba wai bule ibiragoni. Tínaga waitigi biaru gerai lalu ibiragola tinaga wai biaga garo ale karisiru ngiringara lalu ira hungu ale bialu tinaga yandareru ira guraya aleme wabini luni yidarume kilinge̱le̱ lalu wai huaro laruagoni.

⁴Tinaga wai biaga garo ale hosime gililaga karisi biarume hariga wiadagua gerai lalu wali agali ngoai haga hama wiagoria gerai galuyu puíbu bialu ka. Tini ira hungu ale howa gerai lalu hari daba ale biradagua biya.

⁵Ami haru haga haguane hearume ami agali bu hearuhondo pudaba layagola ami agali o biaru abale pialu hearia ege to̱le̱me tinaga ge bobidi laya. Tigua tanonaga wai pabe heagoria abale anda pialu tanonaga wai pabe heago bo gialolenaga mbirale mbira guruyagu̱ ale wabuwa pabe heagoria wiapara haya.

⁶Guruyagu̱ ale biagome tanonaga wai pabe panga abene iba poragohayagi kaware heago bo gialo wahayagola panga dugua haya. Anidagua biyagola wali agali kini andagaha biru wiaru bibahende gi halu mogolai ho haya.

⁷Waitigime Asirianaga kini heago minuwa heyu helaya. Ani bialu kuini wali bereagonaga aga baya karulo bereago golo wahai halu ibuni garabayabu yalu piya. Ani biyagola ibunaga biabe biaga wali berearume tinaga bu miniha gengedai howa mini burugu lowa dugu biai haya. Tigua dara timbuni halu tininaga gi homame galu kunini balu haya.

⁸Niniba tano bambaore howa iba kuyama hundia nabi biraho wiaga ngaligobi wini. Ani biaga winigo ai iba pelo gana bia haragola iba pora bialu poralidagua wali agali pora bialu tanoha howa purogo laya. Wali agali marume hongo howa ga̱ ladaga halu lalu, Ibida pu nabi hondo hadaba. Hondo hadaba, lalu haya. Ani lalu heagola mbiraoreli hangumebi mbira dai nabi bibahende ibida piai haya.

⁹Ani piai hayagola tinaga waitigi ibiyarume tini aria ibiyaruhondo lalu, Muni siliba ngolobi bibahende mo yai hama. Tinaga tanoha mbirale bayale dewaore winidago mo yai hama, laya.

¹⁰Niniba mo ko howa bo gialabaga biyagola tanoha anda pabe bu hearu bo gialabaga bini wiaru ona alugumu wima pea. Wali agali bu hearume tano yu wahalu ibida piai haya. Tigua gi timbuni halu tinaga gi geru diri duru lalu haya. Anidagua biyagome tinaga hongo pirilape hai hayagola tinaga dengui gade bugimbu biai haya.

¹¹Ala tano ogoni budi ale gabua timbuni laiononaga anda ale hongoheore winigo ai áyu mo ko henego ngagoni. Ala Niniba tano hongoheore laiono dalua ale wialu laiono wangabebi angibunibi iginibi bibahende mo mogobu haga wiagola waitigime anda pobe nahe ngaligobi wiaga wini. Laiono wangabe kagome nogoru bo yalu ibirago igini angibuni karu bibahende nai helo budu ta haga biaga. Ani bialu nogo tara tararu bo yalu ibalu anda to̱laga. Urunidagua biaga anda biago agoha kabe. Bo gialo wahayadago.

¹³Anduane Homogo Hongo Haiheore kago ibugua Niniba wali agalihondo lalu, Tínaga waitigi i̱ore kogoni. I̱na tínaga wai biaga karisi ngamiruni irani mo delai holebero. Tínaga ami agali bu karubi bibahende waime bo wahai haragola homolebira. Tigua dindi tara tara ngaruha howa mbirale tara tara mo yu íbu wirimiru bibahende i̱na mo yu dai biai holebero. Wali agali dindi tara taraha bu hearuhondo tínaga bi lo yalu pudaba larimirunime bi larago tigua hale naholebira laya, lene.