Read Huli Nahumu 3 Bible Online

Nahumu 3 - Huli bible

Nahumu 3

¹Niniba wali agalime ke̱ taraore halu wali agali homelo bo wahaga ka. Wali agalinaga dabudabu bayale tara tara wiaru mo yalu ibuwa tinaga tanoha wu to̱ ka. Anidagua bu kagonaga Anduane Homogohanda wali agali uruni bo wahaiore holebira.

²Nogo hosi bo daila haragola tibu tolia lalu nogo hosi gerai laragola ge ngilinguli lalubi wai biaga karisinaga ge harigani kilinge̱le̱ lama ibaruagobi hale hadaba.

³Wai biaga ami agaliru nogo hosini biralu gerai ibiragola tinaga wai biaga ayu tibu yandareru iba wa̱i̱ ale ngiringaraleda. Ani bialu tigua wali agali dagalabe nahe dewaore bo wahai hayagola homenerunaga tingini mo mogo buwa alugumu wiyagola dagalabe naheore wiya. Agali tigua pialu howa homene tingini wiaru hengedalu pugu biya.

⁴Niniba tano ogoni ibu bayanda wali ale winigo ibugua mana ko biyagonaga pani mo ko holene timbuniore mo yu anda ibiya. Ibunaga dengui baya taraore biruwa ibugua agali tara tara bu karunaga bu mini ibuha ibilo ba mulenaga ndole tara tara bialu biragaya. Ibugua mana urunibi bialu wali agali dewaore ibu daluha haru íbu to̱lai howa wali agali kayu yalu ibunaga garabaya biabe ale bialu helaga ka.

⁵Anduane Homogo Hongo Haiheore kago ibugua lalu, Niniba-o i̱na í̱ mo ko halu minu bolebero. Bayanda wali-o í̱naga aga bideruni bibahende minu golo wahai harogola í̱ tibabe birulebere. Hameigini dindi tara taraha bu karume í̱ aga nabi tibabe bederia handaya haragola taga timbuniore ho birulebere.

⁶I̱na í̱ handabe manga howa mbirale ko ngubi ngarume í̱ bu dambi ho ngelolebero. Ani berogola wali agali dindi tara tarani bu karume í̱ de hondowa ti mogo lalu gi timbuni holebira.

⁷Maru í̱ de handararume ti mogo lalu tiga bebege dai bulebira. Ani dai buwa tigua lalu, De handadaba. Niniba biago mo ko hai hayada. Mbiralime ibu dara nahayada. Mbiralime ibunaga bu mini mo palia halu bi lolenebi naheda, lolebira.

⁸Niniba-o í̱na manda bu handalu keria í̱ mini lene timbuniore Iyibi dindiha tano timbuni mini lene Tebese wiyago bolangua hene ngobe toba kebe. Tano ogoni ibubi nde ibunaga tigi pabe iba timbuni Naili peda.

⁹Tebese tano ogonime Iyibi dindi bibahende handameho howa Sudana dindibi ibugua dege handameho henego. Ani heagola dindi mendeha ibunaga waitigi hearume ibunaga hongo bope habe naheore wini. Ani wiagola dindi mende Libia paleagola libu mo mbiraore halu wai tagira piaga hene.

¹⁰Ani henego horo mbirungi ibunaga waitigime ibuwa Tebese tanoha wali agali hearu bope howa tinaga garabaya biabe bialu helo haru halu piai hene. Tinaga waneigini bu hearu hariga gebage wiaru bibahendeni bo payapaya bini wiaria hendene. Ani bialu tinaga waitigime Tebesenaga agali haguane hearu pu senime minu hende howa waitigi tini talebu tahalu tinaga garabaya biabe bialu helo haru halu piai hene.

¹¹Niniba-o tíbi nde lulu iba nowa luluyu haradagua bialu Iyibi wali agali biyadagua biai holebira. Tinaga mini mo lingilungu bia haragola tíni dindini odopebe biai holeberami. Ani bialu tí waitigiru helalu ibida pole manda buleberemi.

¹²Ani poramigola ti waitigi ibiragome tano ngamigo hinahe abale karulolebira. Tínaga tano ngamiruni ira lini ibire daradagua bidago. Ai tí waitigime ira iraneni howa yu ema biragola ira lini ibirego damene dogolope haradagua biragola ira teneha ne ha̱la ho ngagoha dogolope haradagua bialu tigua tano ogoni karulai holebira.

¹³Tínaga ami agali bu karu ti bame wali ale dege kagome hongo halu wai biadai nabulebira. Tinaga wai pabenaga panga irame bengena baga hongohe kago do taga laragola tanonaga panga dugua holebira.

¹⁴Niniba wali agaliru-o tí waitigime tano ho hagira bule ibulebiragonaga manda manda bialu iba nalu hole tanoha iba dadabu yalu anda ibilelalimu. Gade dindi dugu puwa ege timeni wabulenaga geme hengedo waru howa timeni wabiaga mbogoyi ngagoha ngelalimu. Ani bialu ege timeni ogonime tanonaga ege pabe kago arema bilimu.

¹⁵Anigo tigua uruni beremigolabi mbirale urunime tí biamogo bialu mo wia nabulebira. Waitigime ibalu tínaga tanobi tíni heba irame bo heda haragola homai holeberami. Bamba tí dewaore pagaya ale tidiyu biragadagua tidiyu harimigoni. Ani birimigo ai pagaya aleme datani karu nai hagadagua waitigirume tí bo wahai holebira.

¹⁶Ani howa tínaga biyinaya dewaore dagalabe nahe harini yakundi bu kagobi wirimi. Anigo áyu tínaga biyinaya uruni pagaya harane howa yagalalu purogo laralidagua pu ereba hai haya.

¹⁷Tínaga agali haguane hayaru ti dagare biaga horo tagira ibirangi wai pabe andaneha pagaya bira do hagadagua bira do ka. Ani binigo ai ni daragola pagaya uruni ti yagalalu agoha piyabe tobahe pugupugu bialu pu ereba hai hagadagua piya.

¹⁸Asirianaga kini kego í̱na bi ogo hale habe. Í̱naga agali haguane biarubi agali timbuni hayarubi bibahende homai henego tinaga tingini bu payapaya bidagoni. Í̱ waitigi biarume í̱naga wali agali biaru bibahende hari wiaruha bo purogo lai helayago ai uruni lone mo mogo bialu haru dai bulene mbirali naheoreda.

¹⁹Í̱naga dere bu keruni dabi helo ha̱i̱ holene marasinibi mbira nawioreda. Abale í̱na agali maruhondo mana ko bialu harigola ti ibida pobe nahe hayago. Ai áyu í̱ mo ko hene ke laga biyaru hale howa ti turu halu gi habe balu holebira, Anduane Homogohanda laya lalu Nahumuhanda lene.