Read Huli Habagugu 3 Bible Online

Habagugu 3 - Huli bible

Habagugu 3

¹Bi mana latagi haga Habaguguhanda Anduane Homogohondo bi lalu iba gana lole howa ngida ale balu lenego ogo.

²Anduane Homogo-o í̱na bini layaru hale howa í̱ timbuni gibi taraore ke manda buwa i̱na bi agi ale loabe toba ho ko. Bamba í̱na biabe hongohe tara tara bialu hariru áyu ina kamangi biabe urunibi lone bibe. Inahondo keba holene irane ngagoyu ai í̱na dara halu biamogo bibe.

³Ngode Datagaliwabe ibu Idomo dindihayagi howa lone ibira. Ibu baya buruguleore howa Parananaga dindi hombene hombene ngaruha howa ibira. Ibunaga wá holene timbuniore hari daligaha dungame halu ibunaga mana baya buruguleore buleneme dindini mbirale bibahende ngarumebi karumebi ibunaga mini yaraga haralo handabeheore nga.

⁴Ibunaga wá holene egerebagi ni tagira ibiraligobi howa ngiringarame ibunaga gi hongo ya do kagoha howa tagira ibaga.

⁵Ibugua warago tara tararu ala bambaha lalu homa í̱na maha talima ibabe laga.

⁶Ibu hondo kagola dindi dumbirumbi bialu ibugua emene de leneme hangu handaragola wali agali dindini karu bibahende duru lai haga. Hari haabo hole mbaule wedaruni podobaga bialu dindi hombene bambaore wini o ngaruni ibuni ibalu penego áyu ogoni dindiha anda pu bereba helolebira.

⁷Kusana dindini wali agali hearuni giho hearia handaru. Midiana dindini wali agalibi gi howa durulo heane handaru.

⁸Anduane Homogo-o í̱na puyabu ibilalu puyabume iba porarubi iba solowarabi hongo howa mo yaribu bia helarigoni. Ani birigoni iba urunihondo keba howa biribe. Beraliba porarunaga biru yalu piaga harigo kegoni. Í̱naga wali agali karunaga wai bia hole howa iba dalu timbuni ibule beraliba mindibi ngarunaga mo garo ale mini karisi bu hinalu ibuwa í̱naga wali agali mo wayali helariligoni.

⁹Í̱na danda yamuwa timurume bogole manda manda buwa harigoni. Í̱naga timu hari dabaha howa ibiyagola dindi gaibu baga buwa iba timbuniru uruniha pelo mo ibira harigoni.

¹⁰Hari timbuni wedarume í̱ hondowa duru lalu mogo timbuni lowa iba timbuni hariha howa dalidali biyagoni. Iba dindiha berearumebi tula lalu hegene damindini bo laya.

¹¹Í̱naga timuru ala pugupugu buwa hari daba ale piyaru handalubi í̱naga yandare didone piyago handalubi ni egela libu ema nabi hondo hene.

¹²Í̱na dindi bibahendeni hearu baba lembo timbuni howa ami wai bule poradagua pialu wali agali í̱na dindi tara tarani hearu hengedo paya bu hari.

¹³Anidagua birigome í̱ninaga wali agalibi kini í̱na dabenegobi heba pele mialu biamogo biri. Mini kowi hearunaga haru haga koore timbuni biaga heagobi ibunaga talima piaga hearubi bo hilo bagabu wahari.

¹⁴Puyabu hongo howa ibagadagua ami agali haguaneme ibuninaga ami haru halu ibuwa ina balu purogo lelole ibalu hearia í̱na ibuninaga yandare yiniyago yamuwa emboneni yandare harigoni. Tigua mine halu ina mo ko howa balu bo purogo lelole hearia í̱na ani biri.

¹⁵Í̱na iba solowarani nogo hosirunaga biru yalu pirigola iba mbolia baragaraga biya.

¹⁶I̱na bi uruni hale howa mogo timbuni lo ko. Ani buwa bi hai bialu ne hambu duru lalu i̱naga dongone gimbu binihayagi homowa amburi biyagola ge ibubi nira duru lalu ka. Ngode Datagaliwabe ibunaga horo harangi inahondo ko biraru ibugua ti pani mialu belo i̱ ema nabi hendore hondo holebero.

¹⁷Pogeru lini da nabiyaguabi Pu mbira mini gerebi lini nade hayaguabi Ira mini olibe lini ko hai hayaguabi Mabuni tomo bibahende gau lai hayaguabi Nogo sibiru homai hayaguabi Nogo bulumagaru nahe tinaga anda bame tabuanda hayaguabi

¹⁸Uruni bibahende ani biyaguabi waha i̱ turu halu holebero. Irane i̱naga Anduane Homogo Ngode Datagaliwabe ibugua i̱ pele ngiaga ka manda buwa turu halu holebero.

¹⁹Anduane Homogo Bibahende Haru Ho Haame Haga kago ibugua i̱ hongo ngiaga. Ibugua nogo tara mini dia ge hongoheme hagadagua i̱ mo heleda. Ani bialu dindi hari daliga neneni pialu koria ibugua i̱ pi naloliya haru haga ka, lalu Habuguguhanda bi ogoni Anduane Homogohondo lai hene.